ဗင်နီဇွဲလားရဲ့ ယာယီသမ္မတ ဒယ်လ်စီရိုဒရီဂတ်ဇ်ဟာ ၂၀၁၇ ခုနှစ်ကတည်းက ပြဋ္ဌာန်းခဲ့တဲ့ အငြင်းပွားဖွယ် “သည်းခံခြင်းနဲ့ ငြိမ်းချမ်းစွာ အတူယှဉ်တွဲနေထိုင်ရေးဆိုင်ရာ မုန်းတီးမှုဆန့်ကျင်ရေးဥပဒေ” ကို ပြင်ဆင်ဖို့ ဒီဇင်ဘာ ၂၉ ရက်က အဆိုပြုလိုက်ပြီး ဒီဥပဒေဟာ အလွဲသုံးစားလုပ်ခံခဲ့ရပြီး ဆိုးဆိုးရွားရွား အသုံးချခံခဲ့ရတယ်လို့လည်း ဝန်ခံပြောပါတယ်။

ပေါ်တူဂီပြည်နယ်က ကော်ဖီစိုက်ပျိုးသူတွေနဲ့ ပြုလုပ်တဲ့ အခမ်းအနားတခုမှာ ရိုဒရီဂတ်ဇ်က ဒီဥပဒေ ပြင်ဆင်ချက် အဆိုပြုလွှာကို အမျိုးသားလွှတ်တော်ဆီ ပို့လိုက်ပြီလို့ ကြေညာခဲ့ပါတယ်။ 

ဒါ့အပြင် သည်းခံခြင်းနဲ့ ဒီမိုကရေစီနည်းကျ အတူယှဉ်တွဲနေထိုင်ရေး ဆိုတဲ့ မူလရည်မှန်းချက်တွေကို ထောက်ခံကြောင်း အလေးပေးပြောကြားခဲ့ပြီး ဗင်နီဇွဲလားပြည်သူတွေကိုလည်း “မုန်းတီးမှုနေရာမှာ အချစ်ကို၊ သည်းမခံနိုင်မှုနေရာမှာ အတူယှဉ်တွဲနေထိုင်မှုကို အစားထိုးကြဖို့” တိုက်တွန်းသွားပါတယ်။ 

အမျိုးသားလွှတ်တော်ဥက္ကဋ္ဌ ဟော်ရ်ဟဲရိုဒရီဂတ်ဇ်ကလည်း ဒီအဆိုပြုချက်ကို လွှတ်တော်မှာ မဆွေးနွေးခင် တရားရုံးချုပ်ရဲ့ ဖွဲ့စည်းပုံအခြေခံဥပဒေဆိုင်ရာ ဌာနချုပ်ဆီ ပြန်လည်စိစစ်ဖို့ ပို့ပေးမှာဖြစ်ပြီး၊ အထူးဥပဒေတွေရဲ့ လုပ်ထုံးလုပ်နည်းအတိုင်း  အမတ် ၃ ပုံ ၂ ပုံရဲ့ထောက်ခံချက် လိုအပ်တယ်လို့ လွှတ်တော်အမတ်တွေကို ပြောကြားခဲ့ပါတယ်။ 

လူ့အခွင့်အရေးစောင့်ကြည့်အဖွဲ့ (HRW) နဲ့ အမေရိကန်ပြည်နယ်များဆိုင်ရာ လူ့အခွင့်အရေးကော်မရှင် (IACHR) ရဲ့ အစီရင်ခံစာတွေအရ ဒီမုန်းတီးမှုဆန့်ကျင်ရေးဥပဒေဟာ သတင်းထောက်တွေ၊ တက်ကြွလှုပ်ရှားသူတွေနဲ့ အစိုးရကို ဝေဖန်သူတွေကို ဖမ်းဆီး အရေးယူဖို့အတွက် အသုံးပြုခံနေရတယ်ဆိုပြီး လူ့အခွင့်အရေးအဖွဲ့တွေနဲ့ အတိုက်အခံအုပ်စုတွေရဲ့ ပြင်းထန်တဲ့ ဝေဖန်မှုတွေကို ရင်ဆိုင်ခဲ့ရပါတယ်။

ဒီလိုပြင်ဆင်ဖို့ အဆိုပြုလာတာဟာ ဗင်နီဇွဲလားအစိုးရအနေနဲ့ လွတ်လပ်စွာ ထုတ်ဖော်ပြောဆိုခွင့်နဲ့ ပတ်သက်ပြီး နိုင်ငံတကာရဲ့ ဖိအားတွေ ဆက်လက်ခံနေရချိန်နဲ့ အမေရိကန်က ပံ့ပိုးပေးထားတဲ့ အတိုက်အခံ ကိုယ်စားလှယ်တွေနဲ့ ဆွေးနွေးမှုတွေ လုပ်ဆောင်နေတဲ့ အချိန်မှာ ထွက်ပေါ်လာတာ ဖြစ်ပါတယ်။