ပဲခူးတိုင်း၊ သာယာဝတီခရိုင် မင်းလှမြို့နယ်မှာ ဖေဖော်ဝါရီ ၁၅ ရက် ညနေ ၅ နာရီခွဲ လောက်မှာ မင်းလှမြို့နယ်ဆေးရုံကို မြို့နယ်အုပ်ချုပ်ရေးမှူး၊ လဝကဦးစီးအပါအဝင် မင်းလှမြို့နယ် သံဃနာယက ဆရာတော်ကြီးတွေလာရောက်ပြီး CDM လုပ်နေတဲ့ မင်းလှဆေးရုံအုပ်ကြီး ဒေါက်တာလှဝင်းကို အရေးပေါ်လူနာတွေ ကုသစောင့်ရှောက်ပေးဖို့ ဆွေးနွေးခဲ့ပါတယ်။

မင်းလှမြို့နယ် ပြည်သူတွေကလည်း ဆရာဝန်ကြီးကို စစ်တပ်က ဖမ်းဆီးဖို့ လာရောက်ခေါ်ဆောင်တယ်လို့ ထင်မြင်တဲ့အတွက် ဆေးရှံရှေ့မှာ လူစုလူဝေးနဲ့ သွားရောက်တားဆီး ခဲ့ပါတယ်။

မြို့နယ်သံဃနာယက ဆရာတော် ၄၊ ၅ ပါး ‌လာရောက်ပြီး အရေးပေါ်လူနာတွေ လာတဲ့အခါကြည့်ရူစောက်ရှောက်ပေးဖို့ မေတ္တာရပ်ခံခဲ့တာဖြစ်ပြီး   ဆရာဝန်ကြီးကလည်း အရေးပေါ်လူနာတွေကို လက်ခံကုသပေးနေကြောင်းပြောဆိုခဲ့တယ်လို့ ဆိုပါတယ်။

သံဃနာယကဆရာတော်ကြီးတွေနဲ့ အတူလိုက်ပါသွားတဲ့ မင်းလှမြို့နယ်ဓမ္မာရုံဥက္ကဋ္ဌ ဦးဝင်း မြင့်က “စစ်တပ်ကလူ‌တွေ မပါဘူး။ သံဃနာယက ဆရာတော်ကြီး‌တွေက မြို့နယ်ကျန်းမာရေး အတွက် ဆေးရုံကိုသွားရောက်ပြောဆိုတာ” လို့  ဆိုပါတယ်။

ညနေ ၆ နာရီခွဲလောက်မှာတော့ ကားတွေပြန်လည်ထွက်ခွာသွားဖို့ လုပ်ဆောင်နေပြီး ပြည်သူလူထုက ပိတ်ထားတဲ့အတွက် ဆရာဝန်ကြီးက သူပါမသွားကြောင်း   ဆေးရုံဝင်ထဲက ပြောဆိုနေတာ တွေ့ရပါတယ်။ ဒီနောက်  ပြည်သူလူထုက လမ်းရှင်းပေးပြီး လုစုခွဲခဲ့ကြတာတွေ့ရပါတယ်။ 

မင်းလှမြို့နယ်မှာ စစ်အာဏာသိမ်းမှုကို ဆန့်ကျင်ကန့်ကွက်တဲ့အနေနဲ့  ကျန်းမာရေး ဝန်ထမ်း အများစု CDM လှုပ်ရှားမှု ပြုလုပ်နေကြပါတယ်။