မင်းထက်မုန်း

စစ်အာဏာသိမ်းမှုကို ဆန့်ကျင်သည့် လူထုအာဏာဖီဆန်ရေးလှုပ်ရှားမှု (CDM) မှာ ဧရာဝတီတိုင်းက ရဲအရာရှိ ၁ ဦး စတင်ပါဝင်လာခဲ့တယ်လို့ ဒေသခံတွေဆီက သိရပါတယ်။

ဧရာဝတီတိုင်း​ဒေသကြီး၊ ငွေဆောင်မြို့ နယ်​မြေရဲစခန်းမှူး ရဲအုပ်ညီညီနိုင်​ဟာ CDM အစီအစဉ်​မှာ ပူးပေါင်းပါဝင်လာတဲ့အပြင် ရဲတပ်ဖွဲ့ကပါ တပါတည်း နုတ်ထွက်ခဲ့တာလို့ ဒေသခံတွေက ပြောပါတယ်။

"သူက CDM အစီအစဉ်​မှာ ပါ၀င်​လာတာ။ ​လော​လောဆယ်​​တော့ သူ့ကို ဖမ်းတာဆီးတာ​တွေ လုပ်​တာ မရှိ​သေးဘူး။ သို့​သော်​လည်း ပဏာမစုံစမ်းစစ်​​ဆေး​ရေး အဖွဲ့​တော့ လာမယ်​ထင်​တယ်​။ လှုပ်​လှုပ်​ရှားရှား ဘာမှမရှိ​သေးဘူး။ သူလည်း ​ရှောင်​တိမ်း​နေတယ်​။ ဆန္ဒပြပွဲမှာ ၀င်​ပါတာ​တော့ မရှိဘူး။ ပံ့ပိုး​ရေးအဖွဲ့က​တော့ လိုတာရှိရင်​​ပြောလို့ ကမ်းလှမ်းထားတယ်” လို့ ​ငွေ​ဆောင်​​ဒေသခံတစ်​ဦးက ပြောပါတယ်။

​ငွေ​ဆောင်​မြို့ခံတွေက CDM အစီအစဉ်​ပါ၀င်​လာတဲ့အတွက် ပံပိုး​ရေးအဖွဲ့က ရဲအုပ်​ညီညီနိုင်​ရဲ့ မိသားစုအတွက် ဖိအားများမဖြစ်​​စေဖို့ ပုသိမ်​ CDM ပံ့ပိုး​ရေးအဖွဲ့နဲ့ ချိတ်​ဆက်​ကာ ​ကူညီပေးထားတယ်လို့ ဆိုပါတယ်။

ရဲအုပ်​ညီညီနိုင်​နဲ့အတူ ​ငွေ​ဆောင်​နယ်​မြေ ​ရဲစခန်းက ရဲတပ်သားဖုန်းခိုင်လည်း ​ဖေ​ဖော်​ဝါရီ ၁၂ ရက်​​နေ့မနက်ပိုင်းက စတင်ပြီး ရဲတပ်ဖွဲ့တာဝန်တွေကို ထမ်းဆောင်မှု မရှိတော့​ဘူးလို့ သိရပေမယ့် CDM အစီအစဉ်​မှာ ပါ၀င်​တာ ဟုတ်​၊ မဟုတ်​ သီးခြားအတည်​ပြုချက်​ မရရှိ​သေးပါဘူး။

ရဲအုပ် ညီညီနိုင်​ကတော့ ဖေဖော်ဝါရီလ ၁၁ ရက်နေ့ ရက်စွဲနဲ့ပြည်ထဲရေးဝန်ကြီးဌာနထံ လိပ်မူပြီးရေးထားတဲ့ လက်ရေးမူစာထဲမှာတော့ စစ်အာဏာရှင်လက်အောက်မှာ တာဝန်ထမ်းဆောင်လိုခြင်းမရှိတဲ့အတွက် ရဲတပ်ဖွဲ့ကနေ နုတ်ထွက်ခွင့်ပြုဖို့၊ အခုလို နုတ်ထွက်တာဟာ ရဲတပ်ဖွဲ့အပေါ်သစ္စာဖော်တာ မဟုတ်ဘဲ စစ်အာဏာရှင်ကိုအလိုမရှိလို့ ရုံးမတက်ပဲ ရုန်းထွက်ခြင်း ဖြစ်ကြောင်း ရေးသားထားပါတယ်။

စာရဲ့အောက်ဆုံးမှာ မှတ်ချက်အနေနဲ့ သူ့အနေနဲ့ ရဲတပ်ဖွဲ့က ထုတ်ပေးထားတဲ့ လက်နက်နဲ့ ဆက်သွယ်ရေးစက်တွေကို ယူဆောင်သွားမှာမဟုတ်ဘူးလို့ ထည့်သွင်းရေးသားဖော်ပြခဲ့ပါသေးတယ်။

မင်းထက်မုန်း