စက်တင်ဘာ ၂၀ ရက်က ဂျာမနီပြည်နယ်ရွေးကောက်ပွဲ ၂ ခုမှာ လက်ဝဲစွန်းဝါဒီ ဒီလင်ကာပါတီနဲ့ လက်ယာစွန်း Alternative for Germany (AfD) ပါတီတို့က အသီးသီး ဦးဆောင်နေတယ်လို့ ခန့်မှန်းမဲရလဒ်တွေက ဖော်ပြပါတယ်။
အာဏာရ ဗဟိုလက်ယာယိမ်း CDU ပါတီက ပြည်နယ် ၂ ခုစလုံးမှာ အရေးမလှခဲ့ပေမဲ့ အဓိပတိ ဖရိုင်းဒရစ်ချ်မာ့ဇ်က ရာထူးဆက်ယူမယ်လို့ ပြောပါတယ်။
နိုင်ငံအရှေ့မြောက်ပိုင်း မက်ကလန်ဘတ်-ဖော်ပိုမာန်ပြည်နယ်မှာ AfD က မဲ ၃၈ ဒသမ ၃ ရာခိုင်နှုန်းနဲ့ ဦးဆောင်နေပါတယ်။
AfD ပါတီနဲ့တော့ တခြားအဓိကပါတီတွေက ပူးပေါင်းဖို့ ငြင်းဆိုထားတာကြောင့် ပြည်နယ်အစိုးရဖွဲ့နိုင်ဖို့ မလွယ်ပါဘူး။
CDU ကတော့ မဲ ၄ ဒသမ ၉ ရာခိုင်နှုန်းပဲ ရထားလို့ ပြည်နယ်လွှတ်တော်မှာ ပါဝင်ဖို့ အနိမ့်ဆုံး လိုအပ်တဲ့ ၅ ရာခိုင်နှုန်းတောင် မပြည့်ခဲ့ပါဘူး။
ဒါဟာ CDU အတွက် ၁၉၄၉ ခုနှစ်နောက်ပိုင်း အဆိုးဆုံး ပြည်နယ်ရွေးကောက်ပွဲရလဒ် ဖြစ်လာနိုင်ပါတယ်။ ဒီရလဒ်ကို မာ့ဇ်က “အကြီးအကျယ် ဆိုးရွားတဲ့ ရလဒ်” လို့ သုံးနှုန်းခဲ့ပါတယ်။
ဂျာမနီနိုင်ငံမြို့တော် ဖြစ်သလို ဖက်ဒရယ်ပြည်နယ် ၁၆ ခုထဲက တခုဖြစ်တဲ့ ဘာလင်မှာလည်း လက်ဝဲစွန်းဝါဒီ ဒီလင်ကာပါတီက မဲ ၂၅ ဒသမ ၃ ရာခိုင်နှုန်းနဲ့ ပထမဆုံးအကြိမ် ဦးဆောင်နေပြီး CDU က ၁၉ ရာခိုင်နှုန်းပဲ ရထားပါတယ်။
ပုဂ္ဂလိက အိမ်ရာကုမ္ပဏီကြီးတွေကို နိုင်ငံပိုင်သိမ်းပြီး အိမ်လခတွေ ကန့်သတ်မယ်လို့ ဒီလင်ကာက ကတိပေးထားပါတယ်။ မာ့ဇ်ကတော့ စီးပွားရေးပြန်ကောင်းလာဖို့ အခွန်နဲ့ လူမှုဖူလုံရေး အပါအဝင် ပြုပြင်ပြောင်းလဲမှုတွေကို ဆက်လုပ်မယ်လို့ ပြောပါတယ်။
