မြန်မာပြည်တွင်း ကိုဗစ်ပထမလှိုင်းကာလအတွင်း ရဲတပ်ဖွဲ့ဝင်​တွေ ကိုဗစ်-၁၉ ရောဂါ ကူးစက်ခံရမှု မရှိခဲ့​ပေမဲ့ အခုဒုတိယလှိုင်းကာလမှာ နိုင်ငံတဝန်း  ရဲတပ်ဖွဲ့ဝင် ၁၂၀၀​ကျော် ​ရောဂါပိုးကူးစက်ခံခဲ့ရတယ်လို့  မြန်မာနိုင်ငံရဲတပ်ဖွဲ့ဌာနချုပ်ရဲ့ ​ပြော​ရေးဆိုခွင့်ရှိသူ ရဲမှူးကြီး​ကျော်သီဟက ဒီဗွီဘီကို​ ပြောပါတယ်။

သြဂုတ်လ ၁၆ ရက်​နေ့က စတင်ခဲ့တဲ့ ဒုတိယလှိုင်းအတွင်း သြဂုတ် ၂၇ ရက်​နေ့က ဒီဇင်ဘာ ၂၉ ရက်​အထိ  ၄ လအတွင်း ရဲတပ်ဖွဲ့ဝင် ၁၂၀၃​ ယောက် ကိုဗစ်-၁၉ ကူးစက်ခံခဲ့ရ​ပါတယ်။

ရဲတပ်ဖွဲ့ဝင်​တွေ ရောဂါကူးစက်ခံရမှုထဲမှာ ရန်ကုန်တိုင်းဒေသကြီး အ​ယောက် ၅၁၀နဲ့ အများဆုံးကူးစက်ခံရပြီး၊ ရခိုင်ပြည်နယ်က အယောက် ၁၉၀ ၊ မန္တလေးတိုင်းက ၁၂၁ ​ယောက်၊ ပဲခူးတိုင်းက ၈၇ ​ယောက်၊ နေပြည်တော် ၈၅ ​ယောက်၊ ဧရာဝတီတိုင်းက ၆၅ ​ယောက်၊ မွန်ပြည်နယ် ၃၄​ ယောက်၊ စစ်ကိုင်းတိုင်း အယောက် ၃၀ ၊ ကရင်ပြည်နယ် ၂၅ ​ယောက်၊ ကချင်ပြည်နယ် ၁၉​ ယောက် ၊ တနင်္သာရီတိုင်း  ၁၁ ​ယောက်၊ မကွေးတိုင်း ၁၅ ​ယောက်၊ ရှမ်းပြည်နယ် ၉ ​ယောက်နဲ့ ချင်းပြည်နယ် ၂​ယောက် တို့ဖြစ်​ကြောင်း ရဲတပ်ဖွဲ့စာရင်းဇယား​တွေအရ သိရပါတယ်။

ရဲတပ်ဖွဲ့ဝင်​တွေအ​နေနဲ့ ကိုဗစ်-၁၉ ရောဂါ ကာကွယ်ရေး အထောက်အကူပြု ပစ္စည်း​တွေ တပ်ဆင်ထား​ပေမဲ့လည်း လူအများနဲ့ဆက်ဆံဆောင်ရွက်ရလို့ တချို့သော တပ်ဖွဲ့ဝင်​တွေမှာ ရောဂါကူးစက်ခံရတာလို့ ရဲမှူးကြီး​ကျော်သီဟက​ ရှင်းပြပါတယ်။

ကူးစက်ခံရဲတပ်ဖွဲ့ဝင်​တွေထဲက အရာရှိ ၃ ယောက်၊ တခြားအဆင့် ၆ ​ယောက်စုစု​ပေါင်း ၉ ​ယောက် သေဆုံးခဲ့​​​ကြောင်း၊ ဒီဇင်ဘာ ၂၉ ရက်​အထိ ရောဂါပျောက်ကင်းပြီး ဆေးရုံဆင်း တပ်ဖွဲ့ဝင် စုစုပေါင် ၇၆၂ ​ယောက် ဖြစ်ပါတယ်။ 

ရောဂါကူးစက်ခံရတဲ့ တပ်ဖွဲ့ဝင်တွေနဲ့ ထိတွေ့ခဲ့သူ ရဲတပ်ဖွဲ့ဝင်၊ မိသားစုဝင်၊ အရပ်သား စာရေးဝန်ထမ်း စုစုပေါင်း ၁၇၅၄၇ ​ယောက်ကို​တော့ တိုင်းနဲ့ပြည်နယ်ရှိ သက်ဆိုင်ရာမှ သတ်မှတ်ထားတဲ့ Quarantine စင်တာတွေမှာ စောင့်ကြည့်​နေခဲ့ရာမှ စောင့်ကြည့်ကာလ ပြီးဆုံးသူ စုစုပေါင်း ၉၃၅၈​ ယောက်ရှိပြီး ၈၁၈၉ ​ယောက်ကိုဆက်လက် စောင့်ကြည့်​နေပါတယ်။