ဧရာဝတီတိုင်းဒေသကြီးအစိုးရအဖွဲ့ရဲ့ စည်ပင်ဝန်ကြီး ဦးကျော်မြင့်ဟာ ဒီဇင်ဘာ ၉ ရက်နေ့ က ဆေးစစ်ချက်တွေအရ ကိုဗစ်-၁၉ ရောဂါကူးစက်ခံထားရတယ်လို့ တိုင်းအစိုးရအဖွဲ့ရုံးက သိရပါတယ်။

စည်ပင်ဝန်ကြီး ဦးကျော်မြင့်ဟာ ရွေးကောက်ပွဲ ငွေစာရင်းရှင်းတမ်းတွေကို လပွတ္တာမြို့ကို သွားရောက်ဆောင်ရွက်စဉ် ရောဂါပိုးရှိသူနဲ့ ထိတွေ့မိလို့ ဟိုတယ်ကွာရန်တင်းဝင်နေခဲ့တာ ဖြစ်ပြီး မနေ့က ဆေးစစ်ချက်အဖြေအရ ရောဂါပိုးကူးစက်ခံရတာကို အတည်ပြုနိုင်ခဲ့တာပါ။

တိုင်းအစိုးရအဖွဲ့ပြောရေးဆိုခွင့်ရှိသူ လျှပ်စစ်၊ စက်မှု လက်မှုနှင့်လမ်းပန်း ဆက်သွယ်ရေးဝန်ကြီး ဦးဝင်းဌေးက " ရွေးကောက်ပွဲ ငွေစာရင်းရှင်းတမ်းတွေလုပ်ဖို့ သွားတာပါ၊ ပထမအကြိမ်စစ်တုန်းက မတွေ့ဘူး ဒုတိယအကြိမ် Swab ယူပြီး NHL ကိုပို့ပြီးစစ်ဆေးချိန်မှာ ရောဂါပိုးတွေ့ရှိခဲ့တာပါ"လို့ ပြောပါတယ်။

ဧရာဝတီတိုင်းအစိုးရအဖွဲ့ရဲ့ အသက် ၆၅ နှစ်အရွယ် စည်ပင်ဝန်ကြီး ဦးကျော်မြင့်ဟာ ကိုဗစ်-၁၉ ရောဂါကူးစက်ခံထားရပေမယ့် လက်ရှိအချိန်မှာ ကျန်းမာရေးကောင်မွန်နေပြီး ပုသိမ်တိုင်းရင်းဆေးရုံကြီးမှာ ဆေးကုသတာတွေပြုလုပ် ပေးသွားဖို့ပြင်ဆင်နေပါတယ်။

ဒီဇင်ဘာလ ၉ ရက်နေ့မှာ တိုင်းအစိုးရအဖွဲ့ရဲ့ စည်ပင်ဝန်ကြီးရောဂါကူးစက်ခံခဲ့ရသလို လွှတ်တော်ရုံးက ဝန်ထမ်း ၁ ဦးလည်း ကိုဗစ်-၁၉ ရောဂါကူးစက်ခံထားရတယ်လို့ သိရပါတယ်။

ဧရာဝတီတိုင်းဒေသကြီးမှာ ဒီဇင်ဘာလ ၉ ရက် မနက် ၉ နာရီအချိန်ထိ ကိုဗစ်-၁၉ အတည်ပြုလူနာ ၃၄၄၁ ဦးရှိပြီး ဆေးရုံဆင်းခွင့်ရသူ ၂၆၅၅ ဦးရှိကာ သေဆုံးလူနာ ၂၃ ဦးရှိတယ်လို့ တိုင်းပြည်သူ့ကျန်းမာရေးဦးစီးဌာနက သတင်းထုတ်ပြန်ထားပါတယ်။

မင်းထက်မုန်း (ပုသိမ်)