ကိုဗစ်-၁၉ ရောဂါ ဓာတ်ခွဲအတည်ပြုလူနာသစ် ၁၈၅ ဦးနဲ့ သေဆုံးသူ ၁ ဦး ထပ်တိုးလာပြီး မြန်မာနိုင်ငံမှာ ကိုဗစ်-၁၉ ရောဂါနဲ့ သေဆုံးသူပေါင်း ၄၀ ဦး ရှိသွားပြီလို့ ကျန်းမာရေးနဲ့ အားကစားဝန်ကြီးဌာနရဲ့ ဒီကနေ့ ည ထုတ်ပြန်ချက်အရ သိရပါတယ်။
ကိုဗစ်-၁၉ ကုသရေးဌာန (ဒဂုံဆိပ်ကမ်း) မှာ တက်ရောက်ကုသမှုခံယူခဲ့တဲ့ အသက် (၇၃) နှစ်အရွယ် ကျောက်ကပ်ရောဂါအခံရှိသူ အမျိုးသမီး (Case-2645)ဟာ ပြင်းထန်အဆုတ်ရောင် ရောဂါကြောင့် ရုတ်တရက်အသက်ရှူလမ်းကြောင်းပျက်စီးပြီး စက်တင်ဘာ ၁၅ ရက် မနက် ၁၀ နာရီ ၁၅ မိနစ်မှာ သေဆုံးသွားခဲ့တာလို့ ဆိုပါတယ်။
အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်) (NHL) မှ (ပထမအသုတ်) ဓာတ်ခွဲနမူနာ ၁၀၁၇ ခု၊ ဆေးသုတေသနဦးစီးဌာန (DMR) ဓာတ်ခွဲနမူနာ (ပထမအသုတ်) ဓာတ်ခွဲနမူနာ ၂၈၂ ခု အပါအဝင် စုစုပေါင်း ၁,၉၅၆ ခု ကို ဒီနေ့ညနေ စစ်ဆေးပြီးစီးခဲ့ရာ လူနာသစ် ၁၈၅ ဦး တွေ့ရှိရတာပါ။
လူနာသစ်တွေနဲ့ပတ်သက်တဲ့ အချက်အလက်တွေကိုတော့ ထုတ်ပြန်ခြင်းမရှိသေးပါဘူး။
စက်တင်ဘာ ၁၆ ရက် ည ၈ နာရီအထိ မြန်မာနိုင်ငံမှာ ကိုဗစ်-၁၉ ရောဂါဓာတ်ခွဲ အတည်ပြုလူနာ ၃,၈၂၁ ဦး၊ သေဆုံးသူ ၄၀ ဦး၊ ဆေးရုံမှ ဆင်းခွင့်ပြုခဲ့တဲ့ လူနာဟောင်း ၉၀၈ ဦး စောင့်ကြည့်လူနာအသစ် ၂၈၀ ဦးရှိတယ်လို့ ကျန်းမာရေးဌာနက သိရပါတယ်။
