ကယားပြည်နယ်အတွင်း ပြည်နယ်ဝန်ကြီးချုပ်အပါအဝင် ၂၀၂၀ရွေးကောက်ပွဲ ဝင်ရောက် ယှဉ်ပြိုင်မယ့် ကိုယ်စားလှယ်လောင်း ၂၇၂ ဦးရှိပြီး ဝင်ရောက်ယှဉ်ပြိုင်မယ့် ပါတီ ၁၃ ပါတီရှိတယ်လို့ ပြည်နယ်ရွေးကောက်ပွဲအရာရှိ ဦးကျော်ဆန်း၀င်းက ပြောပါတယ်။
“၂၇၂ ယောက်က ကိုယ်စားလှယ်လောင်း၊ ပါတီက ၁၃ ပါတီ၊ တသီးပုဂ္ဂလပါရင်တော့ ၁၄ ပေါ့နော်။ တသီးပုဂ္ဂလက ပြည်သူမှာ ၃ နေရာ၊ အမျိုးသားမှာ ၄ နေရာ၊ ပြည်နယ်မှာ ၆ နေရာ။”
အဆိုပါကိုယ်စားလှယ်လောင်းတွေကို ကိုယ်စားလှယ်လောင်း အရည်အချင်း သတ်မှတ်ချက်တွေနဲ့ ကိုက်ညီမှု ရှိ၊ မရှိ ဒီကနေ့ ဩဂုတ် ၁၇ ရက်နေ့ နောက်ဆုံးထား စိစစ်နေပြီး မနေ့ကအထိ စိစစ်ပြီးသလောက် ပယ်ဖျက်ထားတဲ့ ကိုယ်စားလှယ်လောင်း မရှိသေးဘူးလို့ ပြောပါတယ်။
ကယားပြည်နယ်မှာ မြို့နယ် ၇ မြို့နယ်ရှိပြီး ရွေးကောက်ပွဲ ဝင်ရောက်ယှဉ်ပြိုင်နိုင်တဲ့နေရာ ၃၄ နေရာရှိပါတယ်။
၂၀၂၀ အထွေထွေရွေးကောက်ပွဲအတွက် ကယားပြည်နယ် တပြည်နယ်လုံးမှာ အသက် ၁၈ နှစ်ပြည့်ပြီးတဲ့ မဲဆန္ဒပေးပိုင်ခွင့်ရှိသူပေါင်း ၂၀၄,၆၇၇ ဦး ရှိတယ်လို့ ပြည်နယ်ရွေးကောက်ပွဲ ကော်မရှင်ရဲ့ ပထမအကြိမ် ထုတ်ပြန်တဲ့ စာရင်းအရ သိရပါတယ်။
