ထိုင်းနိုင်ငံအလယ်ပိုင်း အယုဒ္ဓယခရိုင်ထဲမှာ တရားမဝင် ဝင်လာတဲ့ မြန်မာနိုင်ငံသားတွေနဲ့ အလုပ်သ မားတန်းလျားထဲက မြန်မာတွေ စုစုပေါင်း အယောက် ၆၀ ကျော် ဖမ်းဆီးခံရတယ်လို့ ထိုင်းသတင်းတွေအရ သိရပါတယ်။ 

ပထမဖြစ်စဉ်မှာ အယုဒ္ဓယခရိုင်၊ ဝမ်းနွဲ့မြို့နယ်၊ လမ်းဆိုင်းရပ်ကွက်အပိုင်းရှိ ဖဟွန်ယိုးထင်း အဝေးပြေးလမ်းမကြီးထဲ မောင်းဝင်လာတဲ့ အိမ်စီးကား ၃ စီးထဲကနေ တရားမဝင် မြန်မာ အယောက် ၂၀ နဲ့ ယာဉ်မောင်း ၃ ယောက်တို့ကို ဖမ်းဆီးရမိတယ်လို့ ထိုင်းအဝေးပြေးရဲတပ်ဖွဲ့က ဇူလိုင် ၁၄ ရက်မှာ ထုတ်ပြန်ပါတယ်။ 

နယ်မြေထဲမှာ တရားမဝင် လုပ်သားတွေ ဝင်ရောက်လာဖို့ရှိကြောင်း ကြိုတင်သတင်းရတာကြောင့် အဝေးပြေးလမ်းလုံခြုံရေး ရဲတပ်ဖွဲ့၊ နယ်မြေခံ လဝက ရဲတပ်ဖွဲ့နဲ့ သဘာဝဝန်းကျင်ဆိုင်ရာ ရာဇဝတ်မှုနှိမ်နင်းရေး ရဲတပ်ဖွဲ့က  တာဝန်ရှိသူတွေပါတဲ့ ပူးပေါင်းအဖွဲ့ဟာ အဝေးပြေးလမ်းမကြီးပေါ်  စောင့်ကြပ်စစ်ဆေးခဲ့တယ်လို့ ဆိုပါတယ်။ 

ဒီအချိန်မှာ တိုယိုတာ ဆလွန်းကား ၃ စီး ရှေ့ဆင့်နောက်ဆင့် မောင်းဝင်လာတယ်၊ ကားမှန်တွေကို စတစ်ကာအမည်းကပ်ထားပြီး  တန်ပိုအလေးချိန် တင်ဆောင်လာဟန်ရှိတာကြောင့် တာဝန်ရှိသူတွေက တားဆီးစစ်ဆေးတာမှာ အထောက်အထားမဲ့ မြန်မာနိုင်ငံသားတွေ တင်ဆောင်လာတာကို စစ်ဆေးတွေ့ရှိခဲ့ပါတယ်။ 

ပထမတစီးမှာ ထိုင်းနိုင်ငံသား နိုင်းဆူဖချိုင်း မောင်းနှင်ပြီး တရားမဝင် မြန်မာ ၇ ယောက် တင်ဆောင်လာတယ်၊ ဒုတိယတစီးမှာ မြန်မာနိုင်ငံသား ဟိန်းမောင်မောင် မောင်းနှင်ပြီး မြန်မာ ၈ ယောက်နဲ့ တတိယတစီးမှာ လင်းလင်းအောင် မောင်းနှင်ပြီး မြန်မာ ၅ ယောက်တို့ကို တင်ဆောင်လာတယ်လို့ ထုတ်ပြန်ချက်မှာ ဖော်ပြပါတယ်။ 

သူတို့ကို ဆရပူရီခရိုင်ကနေ အယုဒ္ဓယမြို့ထဲ ပို့ပေးဖို့ ပွဲစားက တဦးလျှင် ဘတ် ၁,၅၀၀ နဲ့ ဆက်သွယ်လာတာကြောင့် တင်ဆောင်လာရတယ်၊ သူတို့မှာ အထောက်အထားမရှိမှန်းလည်း သိပါတယ်လို့ ယာဉ်မောင်း ၃ ယောက်က ဖွင့်ဟဝန်ခံခဲ့ပါတယ်။ 

ဖမ်းဆီးခံရသူတွေကလည်း သူတို့ဟာ ထိုင်းမှာ အလုပ်လာလုပ်ဖို့ မြန်မာဘက်ခြမ်းကနေ လှေစီးပြီး တောလမ်းကနေ တာ့ခ်ခရိုင် မဲဆောက်မြို့နယ်ဘက် ဝင်လာတယ်၊ အတွင်းပိုင်းဝင်ရောက်ဖို့  ပွဲစားကို တဦးလျှင် ဘတ် ၁၅,၀၀၀ မှ ၂၀,၀၀၀ ထိ ပေးခဲ့ရတယ်လို့ ဆိုပါတယ်။ 

တာဝန်ရှိသူတွေက ယာဉ်မောင်း ၃ ယောက်၊ ကား ၃ စီးနဲ့ တရားမဝင်မြန်မာ အယောက် ၂၀ တို့ကို လဝက ဥပဒေနဲ့ အရေးယူဖို့ ဝမ်းနွဲ့မြို့နယ်ရဲစခန်းမှာ ထိန်းသိမ်းထားကြောင်း ထိုင်းသတင်းတွေမှာ ဖော်ပြပါတယ်။ 

နောက်ဖြစ်စဉ်တခုမှာတော့ အယုဒ္ဓယခရိုင် အူထိုင်းမြို့နယ် နောင်နမ့်ဆုမ့်အုပ်စု ရပ်ကွက် ၄ ရှိ အလုပ်သမားတန်းလျားမှာ ပတ်ဝန်းကျင်အနှောင့်အယှက်ပေးတဲ့အထိ ဆူညံအသံပြုနေကြောင်း တိုင်တန်းချက်ရတာကြောင့် နယ်မြေလုံခြုံရေးတပ်ဖွဲ့၊ မြို့နယ်ရုံး၊ ရပ်ကျေးအုပ်ချုပ်ရေးနဲ့ ရပ်ရွာလုံခြုံရေး အရန်တပ်ဖွဲ့ဝင်တွေပါတဲ့ ပူးပေါင်းအဖွဲ့ဟာ ဇူလိုင် ၁၅ ရက် မနက် ၆ နာရီက သွားရောက်စစ်ဆေးခဲ့ကြပါတယ်။ 

အဆိုပါနေရာပါ ရွှေ့ပြောင်းလုပ်သားတွေ စုပြုံနေထိုင်ရာ ရပ်ကွက်ဖြစ်ပြီး လူပေါင်း ၈၀ ကျော်ရဲ့  အထောက်အထားတွေ စစ်ဆေးခဲ့ရာမှာ ၄၄ ယောက်က နေထိုင်ခွင့်ကတ် အလုပ်သမားမှတ်ပုံတင် အပြည့်အစုံရှိပြီး ကျန်တဲ့ ၄၁ ယောက် (အမျိုးသား ၂၈ ယောက်၊ အမျိုးသမီး ၁၃ ယောက်) က ထိုင်းနိုင်ငံထဲ ဝင်ရောက်ခွင့် ဘာအထောက်အထားမှ မရှိတာကြောင့် နိုင်ငံထဲ တရားမဝင် ဝင်ရောက်နေထိုင်မှုနဲ့ အရေးယူဖို့  အူထိုင်းနယ်မြေရဲစခန်းကို ပို့ဆောင်ထားတယ်လို့   အယုဒ္ဓယခရိုင် လုံခြုံရေးကောင်စီလူမှုကွန်ရက်မှာ ဖော်ပြပါတယ်။ 

Source: MGROnline / အဝေးပြေးလမ်းရဲတပ်ဖွဲ့ / အယုဒ္ဓယခရိုင် လုံခြုံရေးကောင်စီ