ရှမ်းပြည်နယ်အရှေ့ပိုင်း၊ အထူးဒေသ(၄)နယ်မြေ မိုင်းလားမြို့မှာ ၂၁ ရက်ကြာ Facility Quarantine နေထိုင်ခဲ့တဲ့ ရွေ့ပြောင်းလုပ်သား ၅၆၆  ဦးကို နေရပ်ပြန်ပို့ဖို့ မြန်မာအစိုးရ အာဏာပိုင်တွေထံ လွှဲပြောင်းပေးလိုက်ပါတယ်။

အဆိုပါရွှေ့ပြောင်းလုပ်သားတွေဟာ တရုတ်နိုင်ငံ ယူနန်ပြည်နယ်ထဲက သီးနှံစိုက်ခင်းတွေမှာ သွားရောက်အလုပ်လုပ်ခဲ့သူတွေဖြစ်ပြီး မြန်မာနိုင်ငံကို မိုင်းလားမြို့ကနေတဆင့် ပြန်ဝင်လာလို့  အထူးဒေသ (၄)အဖွဲ့က Facility Quarantine (၂၁) ရက်စောင့်ကြည့်ပြီး လိုအပ်တဲ့ ကျန်းမာရေးစစ်ဆေးပြီးမှ နေရပ်ပြန်ခွင့်ပြုခဲ့တာလို့ မိုင်းယန်း မြို့နယ်အုပ်ချုပ်ရေးမှူးက ပြောပါတယ်။ 

အဆိုပါရွှေ့ပြောင်းလုပ်သားတွေအထဲမှာ ရှမ်းပြည်နယ်က ၂၄ ဦး၊ မန္တလေးတိုင်းက ၁ ဦး၊ စစ်ကိုင်းတိုင်းက ၅ ဦး၊ နေပြည်တော်က ၁ ဦး၊ မကွေးတိုင်းက ၄၁ ဦး၊ ပဲခူးတိုင်းက ၄၀ ဦး၊ ရန်ကုန်တိုင်းက ၁၀ ဦး၊  ဧရာဝတီတိုင်းက ၂၁ ဦးနဲ့ ရခိုင်ပြည်နယ်က ၄၂၂ ဦးတို့ ပါဝင်ပါတယ်။

အဆိုပါနေရပ်ပြန်ရွှေ့ပြောင်းလုပ်သားတွေကို  မိုင်းယန်း၊ ကျိုင်းတုံ၊ တောင်ကြီးမှတဆင့် မော်တော်ယာဉ် ၁၀ စီးနဲ့ နေရပ်ဒေသအသီးသီးကို ပို့ဆောင်သွားမှာဖြစ်ပြီး သူတို့ နေရပ် ပြန်ရောက်ချိန်မှာလည်း Facility Quarantine ဆက်လက်ထားရှိမယ်လို့ သိရပါတယ်။

အောင်ဇေယျ