မနေ့ကနဲ့ဒီမနက် ဓာတ်ခွဲနမူနာ ၃၄၇ ခုကို ဓာတ်ခွဲစစ်ဆေးတာတွေကနေ ကိုဗစ်-၁၉ ပိုးတွေ့လူနာအသစ်မ ရှိဘူးလို့ ကျန်းမာရေးနဲ့ အားကစားဝန်ကြီးဌာနက ထုတ်ပြန်ပါတယ်။
ဧပြီ ၂၆ ရက်က ဆေးသုတေသနဦးစီးဌာန (DMR) မှာ ဓာတ်ခွဲနမူနာ ၄၈ ခုကို ပမထအသုတ်စစ်ဆေးခဲ့ပြီး အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်) (NHL) မှာ ဓာတ်ခွဲနမူနာ ၂၉၉ ခုကို ၂ သုတ်ခွဲ စစ်ဆေးခဲ့တာ ဖြစ်ပါတယ်။
အရင်ရက်တွေက စစ်ဆေးထားတဲ့ ရလဒ်တွေအရ ဒီမနက် ၇ နာရီ အချိန်အထိ မြန်မာနိုင်ငံမှာ ကိုဗစ်-၁၉ ရောဂါဓာတ်ခွဲအတည်ပြုလူနာ စုစုပေါင်း ၁၄၆ ယောက် တွေ့ခဲ့ပြီဖြစ်ပြီး ဓာတ်ခွဲအတည်ပြုလူနာတွေထဲက ရောဂါပိုးကင်းစင်သူ ၁၀ ယောက်နဲ့ သေဆုံးလူနာ ၅ ယောက်ရှိပါတယ်။
အလှူရှင်တယောက် လှူဒါန်းထားတဲ့ တရက် ၂၄ နာရီကို ဓာတ်ခွဲနမူနာပေါင်း ၁၁၅၂ ခု စစ်ဆေးနိုင်တဲ့ Cobas 6800 စက်ကို ဒီနေ့အပြီး တပ်ဆင်မှာ ဖြစ်ပြီး မေလပထမအပတ်လောက်မှာ စတင်အသုံးချနိုင်မယ်လို့လည်း ကျန်းမာရေးနဲ့ အားကစားဝန်ကြီးဌာနက ထုတ်ပြန်ထားပါတယ်။
