လက်ဝဲယိမ်း ဘရာဇီးသမ္မတ လူးဝစ် အီနာစီယို လူလာ ဒါ ဆေးလ်ဗားဟာ အောက်တိုဘာ ၂၅ ရက် သမ္မတရွေးကောက်ပွဲမှာ သမိုင်းဝင် ၄ ကြိမ်မြောက် အနိုင်ရခဲ့ပါတယ်။
ရွေးကောက်ပွဲ ဒုတိယအကျော့မှာ သမ္မတဟောင်း ဂျိုင်ယာ ဘော်လ်ဆိုနာရိုရဲ့ သားဖြစ်သူ လက်ယာယိမ်း အထက်လွှတ်တော်အမတ် ဖလာဗီယို ဘော်လ်ဆိုနာရိုကို ကပ်အနိုင်ရခဲ့တာ ဖြစ်ပါတယ်။
ဘရာဇီးရွေးကောက်ပွဲတရားရုံး အတည်ပြုချက်အရ လူလာက ဆန္ဒမဲ ၅၁ ဒသမ ၈ ရာခိုင်နှုန်းနဲ့ ဘော်လ်ဆိုနာရိုက ၄၈ ဒသမ ၂ ရာခိုင်နှုန်း ရရှိခဲ့ပါတယ်။
အောက်တိုဘာ ၄ ရက် ပထမအကျော့မှာ ဘော်လ်ဆိုနာရိုက မဲပိုရခဲ့ပေမဲ့ ဒုတိယအကျော့မှာ လူလာက ပြန်အနိုင်ရခဲ့ပြီး ဒါဟာ ဘရာဇီးနိုင်ငံမှာ ဒီမိုကရေစီစနစ် ပြန်လည်ကျင့်သုံးပြီးနောက် ပထမဆုံးအကြိမ် ဖြစ်ပါတယ်။
အသက် ၈၀ အရွယ် လူလာဟာ စက်ရုံအလုပ်သမားဘဝကနေ အလုပ်သမားသမဂ္ဂခေါင်းဆောင် ဖြစ်လာပြီး နိုင်ငံရေးလောကထဲ ဝင်ရောက်လာသူ ဖြစ်ပါတယ်။
၂၀၀၃ ခုနှစ်ကနေ ၂၀၁၁ ခုနှစ်အထိ သမ္မတသက်တမ်း နှစ်ကြိမ်ဆက် တာဝန်ထမ်းဆောင်ခဲ့ပြီး ဖွဲ့စည်းပုံအခြေခံဥပဒေအရ ရာထူးက ဆင်းပေးခဲ့ပါတယ်။
၂၀၁၈ ခုနှစ်မှာ အဂတိလိုက်စားမှုနဲ့ ထောင်ကျခဲ့ပေမဲ့ နောက်ပိုင်းမှာ သူ့အပေါ် ချမှတ်ထားတဲ့ ပြစ်ဒဏ်တွေ ပယ်ဖျက်ခံခဲ့ရပါတယ်။
၂၀၂၂ ခုနှစ် ရွေးကောက်ပွဲမှာတော့ ဂျိုင်ယာ ဘော်လ်ဆိုနာရိုကို အနိုင်ယူပြီး တတိယအကြိမ် သမ္မတအဖြစ် တကျော့ပြန်လာခဲ့ပါတယ်။ ဒါပေမဲ့ အခုရွေးကောက်ပွဲမှာ ရှုံးနိမ့်ခဲ့တဲ့ ဖလာဗီယို ဘော်လ်ဆိုနာရိုက မဲပေးချိန် နှစ်နာရီတိုးခဲ့မှုကို အကြောင်းပြပြီး မဲရလဒ်ကို လက်မခံဘဲ ပယ်ဖျက်ပေးဖို့ တောင်းဆိုမယ်လို့ ပြောထားပါတယ်။
အဲဒီဆုံးဖြတ်ချက်ဟာ “လက်မခံနိုင်စရာ” ဖြစ်တယ်လို့ သူက ပြောပါတယ်။ ဒါပေမဲ့ မဲပေးချိန်တိုးဖို့ လူလာနဲ့ ဘော်လ်ဆိုနာရို နှစ်ဖက်လုံးက တောင်းဆိုခဲ့ကြတာ ဖြစ်ပါတယ်။ လူလာကတော့ “သမ္မတဟာ လူတိုင်းအတွက် အုပ်ချုပ်ရမယ်” လို့ အနိုင်ရမိန့်ခွန်းမှာ ပြောပါတယ်။
Source: Reuters
