ရန်ကုန်တိုင်း၊ ထန်းတပင်မြို့နယ်နဲ့ လှိုင်သာယာ (အနောက်ပိုင်း) မြို့နယ်တွေမှာ ကိုင်းတောတွေနဲ့ တောမီးလောင်မှုတွေ ဆက်တိုက်ဖြစ်ပွားခဲ့တယ်လို့ မြန်မာနိုင်ငံ မီးသတ်ဦးစီးဌာနထုတ်ပြန်ချက်အရ သိရပါတယ်။
ထန်းတပင်မြို့နယ်၊ ရိုးကြီးရိုးလေးကျေးရွာ၊ အနောက်ပိုင်းတက္ကသိုလ်လမ်းမှာ ဧပြီ ၁၃ ရက် မနက် ၂ နာရီလောက်က ကိုင်းတောမီးလောင်မှုဖြစ်ပွားခဲ့လို့ မီးသတ်တပ်ဖွဲ့ဝင်တွေက သွားရောက် မီးငြှိမ်းသတ်ခဲ့ရတယ်လို့ မီးသတ်တပ်ဖွဲ့က ထုတ်ပြန်ပါတယ်။
အလားတူ ည ၇ နာရီကျော်လောက်မှာလည်း ထန်းတပင်မြို့နယ်၊ ပေါက်တောကျေးရွာ၊ အနောက်ပိုင်းတက္ကသိုလ်လမ်းဘေးမှာ ကိုင်းတောမီးလောင်မှုဖြစ်လို့ မီးငြိမ်းသတ်ခဲ့ရတယ်လို့ ဆိုပါတယ်။
ဒါ့ပြင် ထန်းတပင်မြို့နယ်၊ အနောက်ပိုင်းတက္ကသိုလ်လမ်း၊ သပြေခြံကျေးရွာအနီးမှာ ကိုင်းတော မီးလောင်မှုဖြစ်ခဲ့တယ်လို့ သိရပါတယ်။
ဧပြီ ၁၃ ရက် နေ့လယ် ၃ နာရီခွဲလောက်မှာတော့ လှိုင်သာယာ (အနောက်ပိုင်း) မြို့နယ်၊ နည်းပညာတက္ကသိုလ်မှာ ကိုင်းတော မီးလောင်မှု ဖြစ်ပွားခဲ့သလို ဒဂုံမြို့သစ်ဆိပ်ကမ်းမြို့နယ်၊ သုခဒဂုံအိမ်ယာ၊ အမှတ်(၇)လမ်းဘေးမှာလည်း ကွင်းမီးလောင်မှုဖြစ်ပွားခဲ့ပါတယ်။
တရက်တည်းမှာပဲ ရန်ကုန်-နေပြည်တော် အမြန်လမ်းမကြီး၊ မိုင်တိုင်အမှတ် (၅၇/၂) အနီး တောမီးလောင်နေကြောင်း သတင်းရလို့ မီးသတ်တပ်ဖွဲ့တွေ သွားရောက် မီးငြှိမ်းသတ်ခဲ့တယ်လို့ သိရပါတယ်။
ဧပြီ ၁၄ ရက် ဒီနေ့မနက် ၈ နာရီ ၄၁ မိနစ်မှာတော့ သန်လျင်မြို့နယ်၊ အလွမ်းစွတ်ကျေးရွာမှာ ကွင်းမီးလောင်မှုဖြစ်ပွားခဲ့တယ်လို့ မြန်မာနိုင်ငံမီးသတ်တပ်ဖွဲ့က သတင်းထုတ်ပြန်ထားပါတယ်။
အဆိုပါ မီးလောင်မှုတွေမှာ လူတွေ ထိခိုက်သေဆုံး ဒဏ်ရာရတာတွေနဲ့ လူနေအိမ်တွေ မီးလောင် ပျက်စီးတဲ့ သတင်းတွေကတော့ မရရှိပါဘူး။
