အာဂျင်တီးနား အသင်းခေါင်းဆောင် လီယိုနယ် မက်ဆီဟာ အောက်တိုဘာ ၆ ရက်က ကစားခဲ့တဲ့ ဘီနင်အသင်းကို ၃-၀ ဂိုးနဲ့ အနိုင်ရရှိခဲ့တဲ့ နှုတ်ဆက်ပွဲမှာ အာဂျင်တီးနား လက်ရွေးစင်အသင်းအတွက် နောက်ဆုံးအကြိမ် ပါဝင်ကစားပေးခဲ့ပြီး ၁ ဂိုးသွင်းယူကာ ၂ ဂိုး ဖန်တီးပေးသွားခဲ့ပါတယ်။
ဗျူနိုအေးရိစ်မြို့ရှိ ရေးဗားပလိတ်အသင်းရဲ့ အိမ်ကွင်း အက်စတာဒီယို မွန်နူမန်တယ်ကွင်းကြီးမှာ ကစားခဲ့တဲ့ ဒီပွဲ ပထမပိုင်းမှာ ဂိုးမရှိသရေကျနေခဲ့ပြီး ဒုတိယပိုင်းပြန်စလို့ မကြာခင်မှာပဲ အာဂျင်တီနားအသင်းရဲ့ ဗဟိုနောက်ခံလူ နီကိုလပ်စ် အိုတာမန်ဒီက ဦးဆောင်ဂိုး စတင်သွင်းယူခဲ့ပြီး နီကို ပက်ဇ်က ဒုတိယဂိုး ထပ်မံသွင်းပေးခဲ့ပါတယ်။
ပွဲပြီးဖို့ မိနစ် ၂၀ အလိုမှာတော့ မက်ဆီက ပင်နယ်တီမှတဆင့် ဂိုးတိုင်အထက်ထောင့်ထဲကို အပြင်းကန်သွင်းယူကာ သူ့ရဲ့ နိုင်ငံတကာကစားသမားဘဝကို အလှပဆုံးပုံစံနဲ့ အဆုံးသတ်သွားခဲ့တာပါ။
ပွဲသိမ်းခရာမှုတ်ချိန်မှာတော့ မက်ဆီဟာ ပရိသတ်တွေကို စိတ်လှုပ်ရှားစွာနဲ့ နှုတ်ဆက်ခဲ့ပါတယ်။ မက်ဆီရဲ့ မိသားစုတွေလည်း ဒီပွဲကို လာရောက်ကြည့်ရှုတာ မြင်တွေ့ရပါတယ်။
၂၀၂၆ ကမ္ဘာ့ဖလား ဗိုလ်လုပွဲမှာ ရှုံးနိမ့်ခဲ့ပြီးနောက် နိုင်ငံတကာ ဘောလုံးလောကနေ အနားယူမယ်လို့ ကြေညာခဲ့တဲ့ ဘလွန်းဒီအော ကမ္ဘာ့အကောင်းဆုံးဘောလုံးသမားဆု ၈ ကြိမ်ရခဲ့တဲ့ မက်ဆီဟာ သူ့ရဲ့ ကစားသမားဘဝကို ဂုဏ်ပြုတဲ့ အထိမ်းအမှတ် ချစ်ကြည်ရေးပွဲမှာ ပါဝင်ကစားခဲ့တာ ဖြစ်ပါတယ်။
ဒီပွဲမှာ ၂၀၂၂ ကမ္ဘာ့ဖလား ချန်ပီယံဆုရ အာဂျင်တီးနားအသင်းမှ သူ့ရဲ့ အသင်းဖော်အားလုံးကိုလည်း ပါဝင်ကစားပေးဖို့ ဖိတ်ကြားခဲ့တာပါ။
အသက် ၃၉ နှစ်အရွယ် မက်ဆီဟာ သူ့ရဲ့ နိုင်ငံတကာ ကစားသမားဘဝကို အာဂျင်တီးနား လက်ရွေးစင်အသင်းသမိုင်းမှာ ပွဲထွက်အများဆုံးဖြစ်တဲ့ ပွဲပေါင်း ၂၀၈ ပွဲ၊ စံချိန်တင် ၁၂၆ ဂိုးနဲ့ အဆုံးသတ်ခဲ့ပါတယ်။
သူဟာ ကမ္ဘာ့ဖလား ဗိုလ်လုပွဲ ၃ ပွဲမှာ ပွဲထွက်ကစားခဲ့တဲ့ တဦးတည်းသော ကစားသမားအဖြစ်လည်း မှတ်တမ်းဝင်ထားပါတယ်။
Photo: Reuters
