၂၀၂၆ ဖီဖာကမ္ဘာ့ဖလား ၁၆ သင်းအဆင့်ရှုံးထွက်ပွဲစဉ်မှာ လက်ရှိချန်ပီယံ အာဂျင်တီးနားအသင်းက ၂ ဂိုး အရေးနိမ့်နေရာကနေ နောက်ကပြန်လိုက်ကစားပြီး အီဂျစ်အသင်းကို (၃-၂) ဂိုးနဲ့ အနိုင်ရကာ ကွာတားဖိုင်နယ် တက်သွားပါတယ်။
အမေရိကန်နိုင်ငံ၊ ဂျော်ဂျီယာပြည်နယ်၊ အတ္တလန်တာ အားကစားကွင်းမှာ ဇူလိုင် ၇ ရက်က ယှဉ်ပြိုင်ကစားခဲ့ကြတာမှာ ပထမပိုင်း ၁၅ မိနစ်မှာပဲ အီဂျစ်ကစားသမား ယာဆာ အီဘရာဟင်က ခေါင်းတိုက်ဂိုးသွင်းယူခဲ့လို့ အီဂျစ်အသင်း အံ့အားသင့်ဖွယ် ဦးဆောင်နိုင်ခဲ့ပါတယ်။
ပွဲအစပိုင်းတွေမှာ အီဂျစ်ဂိုးသမား ရှိုဘေယက မက်ဆီရဲ့ ပင်နယ်တီသွင်းဂိုး အပါအဝင် အာဂျင်တီးနားအသင်းရဲ့ ဂိုးပေါက်ခြိမ်းခြောက်မှုတွေကို လက်စွမ်းပြကာကွယ်နေလို့ အာဂျင်တီးနားအသင်း ဂိုးရဖို့ ခက်ခဲနေခဲ့ပါတယ်။
အီဂျစ်အသင်းက ဇီကိုက တဂိုးသွင်းယူခဲ့ပေမဲ့ အာဂျင်တီးနားနောက်ခံလူ မာတီနက်ဇ်ကို ပြစ်ဒဏ်ဘောကျူး လွန်ခဲ့တယ်ဆိုပြီး ဂိုးပယ်ဖျက်ခံခဲ့ရပါတယ်။
သိပ်မကြာခင်မှာပဲ ပွဲချိန် ၆၇ မိနစ်မှာတော့ အီဂျစ်အသင်း တန်ပြန်တိုက်စစ်ဆင်လာပြီး ဟိုင်ဆမ်ဟာဆန်ရဲ့ ပေးပို့မှုကနေ ဇီကိုက အီဂျစ်အသင်းအတွက် ဒုတိယ ဦးဆောင် ဂိုးကိုသွင်းယူပေးခဲ့ပါတယ်။
အာဂျင်တီးနားအသင်း ၂ ဂိုးပြတ် ရှုံးနိမ့်နေချိန် ပွဲချိန် ၇၉ မိနစ်မှာတော့ အာဂျင်တီးနားအသင်းက ရိုမီရိုက ပထမ ချေပဂိုးကို သွင်းယူနိုင်ခဲ့ပြီး ၈၃ မိနစ်မှာတော့ မက်ဆီက အာဂျင်တီးနားအတွက် ဒုတိယ ချေပဂိုး သွင်းယူပေးခဲ့ကာ ပွဲအစောပိုင်း ပင်နယ်တီ ကန်သွင်းချက် မဝင်ခဲ့တာကို အဖတ်ဆယ်နိုင်ခဲ့ပါတယ်။
ပွဲချိန် မိနစ် ၉၀ အပြီး နာကျင်အချိန်ပို ၂ မိနစ်မှာတော့ ဖာနန်ဒက်စ်က အာဂျင်တီးနားအတွက် အနိုင်ဂိုးသွင်းယူနိုင်ခဲ့လို့ အာဂျင်တီးနားတို့ ကွာတားဖိုင်နယ်တက်သွားပြီး အီဂျစ်အသင်းကတော့ ပြိုင်ပွဲကနေထွက်သွားရပြီ ဖြစ်ပါတယ်။
ဒီပွဲ အနိုင်ရရှိတဲ့ အာဂျင်တီးနား အသင်းဟာ ကွာတားဖိုင်နယ်မှာ ဆွစ်ဇာလန်ဒါမှမဟုတ် ကိုလံဘီယာအသင်းနဲ့ ရင်ဆိုင်ရမှာဖြစ်ပါတယ်။
