မန္တလေး-မြစ်ကြီးနား မီးရထားလမ်းပိုင်းပေါ်ရှိ နဘားနဲ့ ပင်ဝယ်ကြားက မီးရထားသံလမ်း ရေတိုက်စားခံနေရပြီး ရထားစီးခရီးသည်တွေ အန္တရာယ်ဖြစ်မှာကို စိုးရိမ်တာကြောင့် အမြန်ဆုံးပြုပြင်ပေးစေလိုတယ်လို့ နဘားကျေးရွာအုပ်ချုပ်ရေးမှူး ဦးညီညီဝင်းက ပြောပါတယ်။
ဇူလိုင် ၂၂ ရက်က မိုးသည်းထန် စွာရွာသွန်းမှုကြောင့် စစ်ကိုင်းတိုင်းဒေသကြီး၊ ကသာခရိုင်၊ အင်းတော်မြို့နယ်၊ ဟနဘားကြီးကျေးရွာအနီး မန္တလေး-မြစ်ကြီးနား မီးရထားလမ်း တံတားအမှတ် ၄၄၁ မှာ နဘားကြီးချောင်းရေ တိုက်စားနေတာပါ။
နဘားကျေးရွာ အုပ်ချုပ်ရေးမှူး ဦးညီညီဝင်းက “၂၂ ရက်ညက ရွာတဲ့ မိုးပါ။ နေ့လယ်ပိုင်းလောက်ကို သိတာပေါ့လေ၊ မီးရထားသံလမ်းဘက်ကို ရေစားနေပြီလို့ ကောင်လေးတစ်ယောက်က ကျနော့်ကို Messenger ကနေ ဓာတ်ပုံတွေ ရိုက်ပြီးပို့တယ်။ အဲ့တံတားဟာ အရင်နှစ်ကလည်း ရေတိုက်စားခံရပြီးသား၊ ဒီရထားလမ်းက မြစ်ကြီးနား-မန္တလေး အထက်ပိုင်းမှာ အဓိကတနေရာလေ။ ဒီဟာကို ရေစားသွားမယ်ဆိုရင် အချိန်မီ မပြုပြင်ရင် ရေစားသွားမှာပဲလေ။ ရထားလမ်းပိုင်း ပိတ်တာတွေ၊ ဘာတွေ ဖြစ်သွားနိုင်တာပေါ့။ မဖြစ်ခင် မီးရထားကနေမှ အချိန်မီ ပြုပြင်ထိန်းသိမ်းဖို့ လိုအပ်တာပေါ့” လို့ ပြောပါတယ်။
နဘားကြီးရွာမှ ဦးသန်းရွှေက “၂၂ ရက် ည ၁ နာရီမှာ ရွာတဲ့မိုးမှာပါ။ မနေ့က အင်းတော်က ပြန်လာတော့ သတင်းကြားတော့ လာကြည့်တယ်။ မီးရထားက မြို့ပြ အင်ဂျင်နီယာ ဦးစိုးမြင့်ကို မီးရထားက ၄၄၁ တံတားက ကုက္ကိုလ်ပင်ကို ရေထိုးနေပြီဈ ဒီကုက္ကိုလ်ပင်လဲသွားရင် မီးရထားမြေပါ သွားနိုင်တယ်လို့ ကျနော် သတင်းပို့ ထားပါတယ်။ ဒီချောင်းက ရေကြီးပြီတဲ့ဆိုရင် မိုးသာသည်းလိုက်ရင် တောင်ကျရေကိုဗျ ဒလဟော လာတာပဲ။ မိုးမဆက်ဘူးဆိုရင် ၁ နာရီခွဲလောက်ဆို ကျသွားတယ်။ ရေထိုးမြန်တယ်၊ သန်တယ်” လို့ ပြောပါတယ်။
မန္တလေး-မြစ်ကြီးနား မီးရထားလမ်း မိုင်တိုင်အမှတ် ၉၅၁/ ၁ နှင့် ၂ ကြားရှိ တံတားအမှတ် (၄၄၁) မှာ နဘားကြီး ချောင်းရေတိုက်စားမှု ဖြစ်ပေါ်နေပြီး ရထားသံလမ်းနဲ့ ချောင်းမှာ ၅ ပေလောက်သာ ကျန်ရှိနေတာ ဖြစ်ပါတယ်။
မိုးသည်းထန်စွာ ရွာသွန်းလို့ မီးရထားသံလမ်းဘေးရှိ မြေတွေ ရေတိုက်စားခံရပြီး ရထားစီးခရီးသည်တွေ အန္တရာယ်ဖြစ်ပေါ်မှာကို ဒေသခံတွေက စိုးရိမ်နေကြတာပါ။
မန္တလေး-မြစ်ကြီးနား မီးရထားလမ်းပေါ်မှာ နေ့စဉ် အမြန်ရထားများ၊ လူစီးရထားတွေ၊ ကုန်ရထားတွေ နေ့စဉ် ဖြတ်သန်းသွားလာနေတဲ့ ရထားခရီးလမ်းကြာင်းတခုလည်း ဖြစ်ပါတယ်။
ကိုကိုလင်း(အင်းတော်)
