“သမီးဖြစ်ချင်တာက ဂီတနဲ့ ဆေးကုတဲ့သူ ဖြစ်ချင်ပါတယ်။ တခြားနိုင်ငံတွေမှာတော့ အဲဒီလိုလုပ်တာတွေ ကြားဖူးတယ်။ အဲဒါနဲ့ပတ်သက်ပြီး လေ့လာနေပါတယ်” လို့ သဇင်သီရိခေတ်လို့ ခေါ်တဲ့ ချောချောက သူရဲ့အိပ်မက်တခုကို ဖွင့်ဟပြောဆိုလာပါတယ်။
ချောချောဟာ ၂ဝ၁၇–၂ဝ၁၈ ပညာသင်နှစ်မှာ တက္ကသိုလ်ဝင်တန်းကို ဂုဏ်ထူး နှစ်ဘာသာနဲ့ အောင်မြင်တဲ့သူတယောက်ပါ။ သာမန်သူတွေထက် ခက်ခက်ခဲခဲ ပိုကြိုးစားရတဲ့ သူမအတွက် ဒီဂုဏ်ထူးနှစ်ဘာသာကလည်း ကျေနပ်အားရစရာ ဖြစ်ပါတယ်။
သူမဟာ မွေးဖွားစဉ်တုန်းက ကိုယ်လက်အင်္ဂါ ကျန်းကျန်းမာမာနဲ့ မွေးဖွားလာသူပါ။ ဒါပေမယ့် ၄ လသား အရွယ်လောက်မှာတော့ သူမရဲ့ လက်မောင်းရိုး စတင်ကျိုးလာပါတယ်။ အဲဒီကစပြီး ဆက်တိုက်ဆိုသလို အရိုးကြွပ်ရောဂါကို ခံစားလာရကာ သူမ အသက် ၆ နှစ်အရွယ်လောက်မှာတော့ ခြေသလုံးရိုးကျိုးခဲ့ပြီး လမ်း မလျှောက်နိုင်တော့တဲ့အထိ ဖြစ်ခဲ့တာပါ။
ဂီတနဲ့ ဆေးကုတဲ့သူ ဆိုတာကတော့ ကိုယ် တတ်ထားတဲ့ ဂီတအနုပညာနဲ့ စိတ်မကျန်းမာတဲ့သူတွေ၊ ခန္ဓာကိုယ် မကျန်းမာတဲ့သူတွေနဲ့ စိတ်ဓာတ်ကျနေတဲ့သူတွေကို စိတ်ခွန်အားဖြည့်ပေးတဲ့ စွမ်းရည်ရှိဖို့ လိုအပ်တာမျိုးပါ။
ဂီတကို အခြေခံကာ လူတွေရဲ့ စိတ်ဓာတ်ကို မြှင့်တင်ပေးတဲ့အရာလို့လည်း ဆိုနိုင်ပါတယ်။ အမျိုးသမီးတွေအပေါ် အကြမ်းဖက်မှု ဆန့်ကျင်ရေးနေ့၊ နိုင်ငံတကာ အမျိုးသမီးများနေ့၊ ကလေးသူငယ် အခွင့်အရေးဆိုင်ရာ အခမ်းအနားတွေနဲ့ လေလွင့် ကလေးငယ်တွေနဲ့ ပတ်သက်တဲ့ ပရဟိတပွဲတွေမှာ ဝှီးချဲလို့ ခေါ်တဲ့ လက်တွန်းလှည်းပေါ်ကနေ တဆင့် စင်မြင့်ပေါ်ကို တက်ကာ ဂီတာတလက်နဲ့ ဖျော်ဖြေနေတဲ့ ချောချောရဲ့ အနုပညာကတော့ ချီးကျူးစရာပါ။
“မွေးလာတုန်းက အကောင်းတိုင်းပါပဲ။ ဘာမှမဖြစ်ဘူး။ လူကောင်းအတိုင်းပဲ မွေးလာတယ်။ ၄ လသမီး အရွယ်မှာ ဘယ်ဘက်လက်မောင်းရိုး စကျိုးတယ်။ နောက်ပိုင်းမှာ အရိုးတွေ ဆက်တိုက်ကျိုးတယ်။ ခြေသလုံးရိုး ကျိုးတာကျတော့ အတန်းထဲမှာ ဆရာမက မတ်တတ်ရပ်ခိုင်းတော့ အားလုံး မတ်တပ်ရပ်နေတဲ့အချိန်မှာ ထောက်လိုက်တော့ ကျိုးသွားတာ။ မွေးရာပါ နှလုံးရောဂါကနေ ဖြစ်လာရာကနေ အရိုးကြွပ်ရောဂါပါ ဖြစ်လာတယ်။ တခုခုနဲ့ ထိလိုက်ပြီဆိုတာနဲ့ အရိုးကျိုးတာတွေ ဖြစ်တယ်။ အခန့်မသင့်ရင် ကျိုးတတ်တယ်။ အခုတော့ ကျိုးတာတွေ ဘာတွေ မရှိတော့ပါဘူး” လို့ ဆိုပါတယ်။
ချောချောဟာ ငယ်စဉ်ကတည်းက ကျောင်းက စာစီစာကုံးပြိုင်ပွဲ၊ ကွန်ပျူတာပြိုင်ပွဲ၊ အက်ဆေးပြိုင်ပွဲတွေနဲ့ တခြားပြိုင်ပွဲတွေမှာလည်း ထူးထူးချွန်ချွန်နဲ့ ဆုတွေ ရရှိခဲ့ပြီး ၈ တန်းနဲ့ ၁ဝ တန်းမှာလည်း အထူးချွန်ဆုံး ကျောင်းသူဆုကို ရရှိခဲ့ပါတယ်။ ကျောင်းပညာရေးမှာလည်း ထူးချွန်သလို ဝါသနာပါရာ ဂီတအနုပညာမှာလည်း ခေသူ မဟုတ်ပါ။
သူမဟာ ၃ တန်းအရွယ်လောက်မှာ ဂီတာတီးတာကို စတင်သင်ကြားခဲ့ပြီး မသန်စွမ်းအဖွဲ့ တခုက ပြုလုပ်တဲ့ ပရဟိတပွဲမှာ သီချင်းဆိုရာကနေ အနုပညာအလုပ်တွေကို တောက်လျှောက်လုပ်လာခဲ့ပါတယ်။
သူမ ၅ တန်း အရွယ်လောက်မှာတော့ Future Music Band ဆိုတဲ့ ဂီတအဖွဲ့ကို တည်ထောင်ပြီး အဖွဲ့နဲ့အတူ ပရဟိတပွဲတွေမှာ ပါဝင်ကူညီပေးခဲ့ပါတယ်။ အခုဆိုရင်တော့ ကိုယ်ပိုင်သံစဉ်တွေနဲ့ သီချင်းတွေကို ရေးစပ်ပြီး ဖျော်ဖြေရတဲ့အထိ အောင်မြင်မှု ရရှိနေခဲ့ပါပြီ။
ချောချောမှာ အစ်ကိုနှစ်ယောက် ရှိပါတယ်။ သူမကတော့ အငယ်ဆုံးသမီးပါ။ အစ်ကို အကြီးဆုံးကတော့ ပညာရေးကို ထောက်ပံ့ပေးသလို အစ်ကိုအငယ်ကတော့ Idiots Music Band က Bass ဂီတာတီးတဲ့သူလည်း ဖြစ်တာကြောင့် သူမရဲ့ ဂီတအနုပညာကို အထောက်အကူ ဖြစ်စေခဲ့ပါတယ်။
“သက်ငယ်မုဒိမ်းနဲ့ ပတ်သက်တဲ့ပွဲတွေ အမျိုးသမီးကော်မတီက လုပ်တဲ့ ရင်ခွင်မဲ့ ကလေးငယ်တွေအတွက် ပွဲတွေ လမ်းဘေး လေလွင့်ကလေးငယ်တွေအတွက် လှူဒါန်းတဲ့ ပွဲတွေမှာလည်း ပါဝင်ကူညီခဲ့ပါတယ်။ သမီးတို့သာ မိဘအစုံအလင်နဲ့ နေရပေမယ့် တချို့ ကလေးတွေကျတော့ မိဘတွေ မရှိဘူး။ ခိုးကိုးရာမဲ့ကြတယ်။ တခြားသူတွေရဲ့ ကဲ့ရဲ့ခြင်းတွေ၊ ရှုတ်ချခြင်းတွေ ခံရပြီးတော့ သူများတွေ အထင်သေး ပြောဆိုတာတွေကိုလည်း ခံနေရတယ်။ အဲဒီလိုမျိုးတွေလည်း ကြားနေရတော့ စာနာစိတ်နဲ့ ကူညီပေးဖြစ်တာပါ။ လမ်းဘေး ကလေးငယ်တွေကို ကူညီရင်းနဲ့လည်း ဒီလို ပရဟိတစိတ်တွေ ပိုပြီးဖြစ်ပေါ်လာခဲ့တာပါ”
အခုလို သူမ ဝါသနာပါရာလမ်းကို တည့်တည့်မတ်မတ် လျှောက်လှမ်းနိုင်ဖို့ အဓိက လမ်းပြပေးသူကတော့ သူမရဲ့မိခင် အငြိမ်းစားကျောင်းဆရာမ ဒေါ်မဉ္ဇူ ဖြစ်ပါတယ်။
ချောချောရဲ့ အမေဟာ အရင်က ကမာရွတ် (၂) ကျောင်းက ကျောင်းဆရာမ တယောက် ဖြစ်ပြီး သမီးဖြစ်သူ ချောချောရဲ့ အရိုးရောဂါအခြေအနေကြောင့် ကျောင်းထွက်ကာ အငြိမ်းစားဘဝနဲ့ သမီးကို ပြုစုစောင့်ရှောက်ခဲ့ပါတယ်။
သမီးတယောက်အတွက် မိခင်ရဲ့ စိုးရိမ်ပူပန်မှုတွေကိုတော့ ဒေါ်မဉ္ဇူက အခုလို ပြောပါတယ်။
“မိဘဆိုတာ ကလေး ကိုယ်ပူပြီး ဖျားရင်တောင် နေမထိထိုင်မသာ ဖြစ်တာလေ။ ကျမကလေးက အရိုးတွေ ကျိုးတယ်။ အဲဒီရောဂါဖြစ်တာကို ၃ နှစ်လောက်မှ သိတာ။ ငယ်ငယ်တုန်းကတော့ လက်တွေ ကျိုးတာ ၄ လကတည်းက စကျိုးတယ်။ တောက်လျှောက် ကျိုးနေတာ ဘာကြောင့်မှန်း မသိခဲ့ဘူး။ နောက်တော့ ဆရာဝန်ကြီး တယောက်နဲ့ တွေ့တော့မှ ဒီရောဂါမျိုးဆိုတာ သိခဲ့တာ”
ကျောင်းတက်နေတဲ့ ကာလတလျှောက်လုံး ကျူရှင်မယူဘဲ မိခင်ဖြစ်သူရဲ့ သင်ကြားပေးမှု အောက်မှာပဲ ကြိုးစားခဲ့ရပါတယ်။ ချောချောရဲ့ ကျန်းမာရေးအခြေအနေ တည်ငြိမ်သွားတဲ့အခါမှာတော့ အမေဖြစ်သူဟာ အပြင်ပုဂ္ဂလိက ကျောင်းတခုမှာ ဆရာမအဖြစ် ဝင်ရောက်လုပ်ကိုင်ခဲ့ပါတယ်။ အခုတော့ သူမရဲ့အမေဟာလည်း အလုပ်ကနေ အနားယူလိုက်ပြီး သူမရဲ့ အနုပညာအလုပ်တွေကို ထောက်ပံ့ပေးသလို မိခင်ကိုယ်တိုင်ကလည်း ပရဟိတလုပ်ငန်းတွေကို ကိုယ်တိုင်လုပ်ဆောင်နေပါတယ်။
ချောချောရဲ့မိခင်ဟာ မိခင်တယောက်အဖြစ်လည်း ပြုစုစောင့်ရှောက်ခဲ့သလို ဆရာမ တယောက်အဖြစ်နဲ့လည်း လမ်းပြသင်ကြားပေးခဲ့သူပါ။ သူမရဲ့မိခင်ဟာ ရန်ကုန်မြို့ရဲ့ အမျိုးသမီးရေးရာကော်မတီမှာလည်း ပါဝင်လှုပ်ရှားနေသူတယောက် ဖြစ်ပါတယ်။
ချောချောဟာ မူလတန်းအရွယ်မှာတော့ ပညာသင်ကြားရတဲ့အခါ အခက်အခဲ မရှိခဲ့ပေမယ့် အလယ်တန်းရောက်တဲ့အခါ မူလတန်းကျောင်းကနေ အထက်ကျောင်းကို ပြောင်းရပါတယ်။ အဲဒီအချိန်မှာတော့ ချောချောအတွက် အခက်အခဲတခု ရှိလာပါတယ်။ ဒါကတော့ အထပ်မြင့်တဲ့ ကျောင်းဆောင်ပေါ်တွေ တက်ဖို့ သူမအတွက် မလွယ်ကူလှပါဘူး။
ဒါကြောင့် ချောချောရဲ့ ကျန်းမာရေးအခြေအနေနဲ့ အဆင်ပြေမယ့် ကျောင်းကို မိခင်ဖြစ်သူက ကြိုးစား ရှာဖွေရပါတော့တယ်။
ဒဂုံဆိပ်ကမ်းမြို့နယ်ကို သွားရောက်လည်ပတ်ရင်း အခုတက်ခဲ့တဲ့ ကျောင်းဆောင်ကို တွေ့ပြီး ချောချောအတွက် အဆင်ပြေမယ်လို့ စဉ်းစားမိပြီး မင်္ဂလာတောင်ညွန့်ကျောင်းကနေ ပြောင်းရွှေ့လာခဲ့ပါတယ်။ မင်္ဂလာတောင်ညွှန့်ကျောင်းမှာ ရခဲ့တဲ့ ပညာသင်ဆုကိုတော့ စွန့်လွှတ်လိုက်ရပါတယ်။
ဒါပေမယ့် သူမတို့ ထင်ထားသလို ကျောင်းတက်ရတဲ့အခါ အဆင်ပြေချောမွေ့မှုတော့ မရှိခဲ့ပါဘူး။ ၅ တန်းကို စတက်ရတဲ့နှစ်မှာပဲ ၅ တန်းအဆောင်ဟာ ကျောင်းရဲ့ အပေါ်ဆုံးထပ်ကို ရောက်နေပါတယ်။ အစပိုင်းမှာ အဆင်ပြေအောင် ကြိုးစားတက်ပေမယ့် မိုးတွင်းရောက်လာတဲ့အခါမှာတော့ သူမအတွက် ပိုအခက်တွေ့ခဲ့ပါတယ်။
ဒါနဲ့ပတ်သက်လို့ သူမရဲ့မိခင်ကပဲ သူမအတွက် ကျောင်းက ဆရာမတွေနဲ့ တိုက်ပွဲဝင်ခဲ့ရပြန်ပါတယ်။
“ဆရာမကို သွားပြောတော့လည်း ကိုယ့်အပြစ်ပဲ ဖြစ်တာပေါ့။ ကျောင်းအပ်တုန်းက ကိုယ်က သေသေချာချာ မပြောလို့ဆိုပြီး။ အဲဒီတုန်းက တော်တော်စိတ်ဆိုးတာ။ အဲဒီတော့ ဆရာမတွေကို ပြောလိုက်တယ်။ မြေညီထပ် ဒါမှမဟုတ် ပထမထပ်ကို မပြောင်းပေးရင် ဒေါက်တာစိုင်းမောက်ခမ်းဆီ တိုက်ရိုက်ကို သွားပြောမယ်ဆိုပြီး ကျမ နေ့လယ် ၁၂ နာရီလောက်မှာ ပြောလိုက်တော့ ညနေကျတော့ အမေရေ သမီးတို့ ပထမထပ်ကို ပြောင်းရပြီ ဆိုပြီး ပြောလာတယ်။ အဲဒီတုန်းကတော့ ကိုယ့်သမီးအတွက် ဖိုက်ခဲ့ရတာပေါ့နော်။ တကယ်လည်း လိုအပ်လို့ ပြောတာ။ အပိုလုပ်တာလည်း မဟုတ်ဘူးလေ”
အခုလို သူမရှေ့ကနေ ကာဆီးထားတဲ့ အတားအဆီးတွေကို မားမားမတ်မတ်နဲ့ ရပ်တည်ဖြေရှင်းပေးခဲ့တာကြောင့် သူမရဲ့ မိခင်ဟာ သူမရဲ့ စံပြပုဂ္ဂိုလ်တယောက်လို့ ချောချောက ဂုဏ်ယူစွာနဲ့ ပြောပါတယ်။
“အမေက သမီးကို အမြဲတမ်း အနောက်ကနေ လိုက်ပံ့ပိုးပေးတယ်။ အမေ လုပ်ပေးလို့သာ သမီး ဒီလိုဖြစ်လာတာပါ။ အမေက သမီးဘဝရဲ့ တခုလုံးပါပဲ။ ဘာနဲ့မှ နှိုင်းပြလို့ မရဘူး။ အမေ သမီးကို မုန်းသွားမှာ အကြောက်ဆုံးပဲ။ သမီးမေမေကတော့ သမီး အားအကျဆုံး အမျိုးသမီးပါပဲ”
သူမရဲ့အမေကလည်း သူမရဲ့သမီးဟာ မသန်စွမ်းဖြစ်ပေမယ့် ဘဝကို အရှုံးမပေးဘဲ အောင်မြင်အောင် ကြိုးစားနေတဲ့သူတယောက် ဖြစ်တာကြောင့် သမီးအတွက် ဝမ်းသာပီတိ ဖြစ်ရတယ်လို့ ဆိုပါတယ်။
“ကိုယ့်သမီးက သူများလို သန်သန်စွမ်းစွမ်းလည်း မဟုတ်ဘူးလေ။ မသန်စွမ်းပေမယ့်လည်း သန်စွမ်းတဲ့ အမျိုးသမီးငယ်လေးတွေကြားထဲမှာ ဒီလိုမျိုး ထူးထူးချွန်ချွန် အောင်မြင်တယ်၊ ကြိုးစားနိုင်တယ်ဆိုတော့ အတိုင်းမသိ ဝမ်းသာမိတာပေါ့ကွယ်”လို့ ဒေါ်မဉ္ဇူက ပြောပါတယ်။
အခက်အခဲတွေကြားက ကြိုးစားနေရပေမယ့်လည်း တခါတလေတော့ ချောချောမှာလည်း စိတ်ဓာတ်ကျစရာတွေ ရှိနေပါတယ်။ မသန်စွမ်းဖြစ်တဲ့ သူမကို ပတ်ဝန်းကျင်က မြင်တဲ့ အမြင်တွေဟာလည်း သူမအတွက် ခက်ခဲစေခဲ့ပါတယ်။
“တခါလေတော့လည်း စိတ်သွားတိုင်း ကိုယ်မပါဘူးပေါ့နော်၊ ခရီးတွေသွားရင်လည်း ပင်ပန်းတယ်။ ဒါပေမယ့် ကိုယ်လုပ်ချင်တဲ့အလုပ် ဖြစ်တာကြောင့် ဇွဲနဲ့ လုပ်ဖြစ်တယ်။ တခါတလေကျရင် ကိုယ့်ကို ပွဲတွေမှာ တခါမှ မတွေ့ဖူးတဲ့သူတွေကျတော့ မထင်ကြဘူး။ စင်ပေါ်ရောက်ရင် ဟုတ်ပါ့မလား လုပ်ရောလုပ်နိုင်ပါ့မလားဆိုတဲ့ အထင်သေးတဲ့ မျက်လုံးတွေနဲ့ အမြဲတမ်း အကြည့်ခံရတယ်။ သွားတိုင်း အဲဒီလို အကြည့်ခံရတယ်”
ဒါပေမယ့် မိခင်ဖြစ်သူကတော့ သူမအတွက် ခွန်အားတွေ ပေးနေဆဲပါ။ သူမရဲ့ မိခင်က သူမကို ဆုံးမနေကျ စကားကတော့ “လောကမှာ မဖြစ်ဘူးဆိုတာ မလုပ်သေးလို့။ အလုပ်တခုကို စနစ်တကျနဲ့ စိတ်ပါဝင်စားလုပ်ရင် မအောင်မြင်ဘူးဆိုတာ မရှိဘူး” ဆိုတာပါပဲ။
အားနည်းချက်တွေ ရှိပေမယ့်လည်း မိခင်ရဲ့ တွန်းအားပေးမှုတွေကြောင့် ချောချောဟာ အခုဆိုရင် ထူးချွန်တဲ့ အမျိုးသမီးတွေထဲကမှ မသန်ပေမယ့် စွမ်းတဲ့ ထူးချွန်တဲ့ အမျိုးသမီးငယ်ဆိုပြီး အသိအမှတ်ပြုခြင်းကို ခံနေရသူ တဦး ဖြစ်နေပါပြီ။
မသန်စွမ်း ကလေးတွေကို ပိုင်ဆိုင်ထားတဲ့ မိခင်တွေအတွက် ချောချောရဲ့မိခင်က အခုလို အားပေးစကား ပြောပါတယ်။
“ကိုယ့်မှာ မသန်စွမ်းကလေးကို ပိုင်ဆိုင်ထားရတယ်ဆိုပြီး သိမ်ငယ်နေစရာ မလိုပါဘူး။ ကလေးတိုင်းမှာ ကိုယ်ပိုင်အရည်အချင်းတွေ ရှိတယ်။ အဲဒီအရည်အချင်းကို အုပ်ထိန်းသူတွေအနေနဲ့ သေချာလေ့လာပြီး မြှင့်တင်ပေးပါ။ အဲဒါဆိုရင် ကျမတို့ရဲ့ ကလေးတွေဟာ ဘယ်သူ့ကိုမှ တာဝန်မပိုစေတဲ့ အကျိုးပြုမယ့် ကလေးတွေ ဖြစ်လာပါလိမ့်မယ်လို့ အားပေးချင်ပါတယ်”
