မြောက်အတ္တလန္တိတ် စစ်ရေးမဟာမိတ်အဖွဲ့ (NATO) ရဲ့ အရှေ့ဘက်ခြမ်းနိုင်ငံတွေက ခေါင်းဆောင်တွေဟာ ပူးတွဲဆွေးနွေးပွဲတွေအတွက် ရိုမေးနီးယားနိုင်ငံမှာ မေ ၁၃ ရက် တွေ့ဆုံကြမှာပါ။
ဘူခါရက်စ် ကိုး (B9) လို့ခေါ်တဲ့ ထိပ်သီးအစည်းအဝေးရဲ့ ရည်ရွယ်ချက်က တူရကီနိုင်ငံ အန်ကာရာမြို့တော်မှာ ကျင်းပမဲ့ NATO ထိပ်သီးအစည်းအဝေးမတိုင်မီ ရပ်တည်ချက်တွေနဲ့ အကျိုးစီးပွားတွေကို ညှိနှိုင်းဖို့ အဓိကဖြစ်ပါတယ်။
ချက်သမ္မတနိုင်ငံကို သမ္မတ ပီတာပါဗယ်က ကိုယ်စားပြုမှာဖြစ်ပြီး ဘရာတစ်စလာဗာမှ ဆလိုဗက်သမ္မတနိုင်ငံ ပီတာ ပယ်လီဂရီနီနဲ့အတူ အင်္ဂါနေ့ညနေပိုင်းမှာ ဘူခါရက်စ်မြို့ဆီ သွားခဲ့ပါတယ်။
၂၀၁၄ ခုနှစ်နောက်ပိုင်း ယူကရိန်းနိုင်ငံရဲ့ လုံခြုံရေးအခြေအနေ ယိုယွင်းလာတာကို တုံ့ပြန်တဲ့အနေနဲ့ ရိုမေးနီးယားနဲ့ ပိုလန်တို့က B9 ရဲ့ဖွဲ့စည်းပုံကို အစပျိုးခဲ့ပါတယ်။
B9 အဖွဲ့ဝင်တွေအပြင် နော်ဒစ်နိုင်ငံတွေက ကိုယ်စားလှယ်တွေလဲ ဘူခါရက်စ်မြို့တော်မှာ ကျင်းပမဲ့ ထိပ်သီးအစည်းအဝေးကို တက်ကြမှာပါ။
NATO အတွင်းရေးမှူးချုပ် မာ့ခ် ရူတေနဲ့ ယူကရိန်းသမ္မတ ဗိုလိုဒီမာ ဇလန်းစကီး တို့လည်း အစည်းအဝေးတက်ဖို့ မျှော်လင့်ထားကြပါတယ်။
ထိပ်သီးအစည်းအဝေးမှာ ခေါင်းဆောင်တွေဟာ NATO ရဲ့ အရှေ့ဘက်ခြမ်းက လုံခြုံရေးကိုသာမက ဥရောပတိုက်ရဲ့ လုံခြုံရေးကိုပါ သေချာစေဖို့ ဥရောပရဲ့ ကြီးထွားလာနေတဲ့ အခန်းကဏ္ဍကိုပါ ဆွေးနွေးကြမယ်လို့ ချက်သမ္မတက မြို့တော်ပရာ့ဂ်ကနေ မထွက်ခွာမီ အင်္ဂါနေ့မနက်မှာ ချက်သတင်းထောက်တွေကို ပြောခဲ့ပါတယ်။
ထရမ့်ပ်ကြောင့် NATO အဖွဲ့ရဲ့ အနာဂတ်အပေါ် အလွန်အကောင်းမြင်နေတယ်လို့ NATO အတွင်းရေးမှူးချုပ် မာ့ခ် ရူတေက မေ ၁၂ ရက်မှာ ပြောခဲ့ပါတယ်။
အမေရိကန်သမ္မတ ဒေါ်နယ်ထရမ့်ပ်က ယူကရိန်းစစ်ပွဲနဲ့ မကြာသေးမီက အီရန်စစ်ပွဲမှာ NATO နိုင်ငံတချို့က အမေရိကန်ပြည်ထောင်စုကို လုံလောက်အောင် မထောက်ပံ့ဘူးလို့ စွပ်စွဲအပြီးမှာ NATO အဖွဲ့ကနေ နုတ်ထွက်မယ်လို့ အကြိမ်ကြိမ် ခြိမ်းခြောက်ခဲ့ပါတယ်။
ပြီးခဲ့တဲ့ နှစ်အစမှာ ကာကွယ်ရေးအသုံးစရိတ်က GDP ရဲ့ ၂ ရာခိုင်နှုန်း မပြည့်မီသေးတဲ့ ကနေဒါ၊ စပိန်၊ ဘယ်လ်ဂျီယံနဲ့ အီတလီတို့လို စီးပွားရေး အင်အားကြီးနိုင်ငံတွေ အပါအဝင် မဟာမိတ်အဖွဲ့တခုလုံး အခု ၂ ရာခိုင်နှုန်းမှာ ရှိနေတာ မြင်တွေ့ခဲ့ရပြီး သမ္မတထရမ့်ပ် ပြန်အရွေးခံရတာက ဒီနေရာမှာ အရေးပါတဲ့ အခန်းကဏ္ဍကနေ ပါဝင်ခဲ့တယ်ထင်တယ်လို့ ရူတေက ပေါ့ဂိုရီကာမြို့မှာလုပ်တဲ့ သတင်းစာရှင်းလင်းပွဲမှာ ပြောပါတယ်။
Source: Reuters
