ဧရာဝတီတိုင်း၊ ဓနုဖြူမြို့နယ်၊ ညောင်ချောင်းကျေးရွာအနီးမှာ မတ်လ ၃ ရက်နေ့ ည ၈ နာရီ ခွဲလောက်က ကား ၃ စီး ဆင့်တိုက်မှု ဖြစ်ပွားခဲ့ပြီး လူ ၇ ဦးသေဆုံးကာ ၁၂ ဦး ဆေးရုံပို့ဆောင်ခဲ့ရတယ်လို့ ဓနုဖြူမြို့မရဲစခန်းက သိရပါတယ်။
ဟင်္သာတမြို့ကနေ ရန်ကုန်ကိုသွားတဲ့ ယာဉ်မောင်း ကျော်စိုးခိုင်ထွန်း မောင်းနှင်ပြီး ဘုန်းကြီး ၁ ပါး၊ ကိုရင် ၁ ပါးနဲ့ လူ ၁ ဦး စီးနင်းလိုက်ပါလာတဲ့ကားဟာ ဝါးတွေ တင်ဆောင်လာတဲ့ ကုန်ကားနောက်ပိုင်းကို တိုက်မိခဲ့ပြီး တဖက်ယာဉ်ကြောပေါ် ကန့်လန့်ရောက်သွားရာမှ ရန်ကုန်မြို့ကနေ မင်္ဂလာဆောင်ကနေပြန်လာတဲ့ Daihatsu ကားနဲ့ ဝင်တိုက်ခဲ့တာပါ။
ဘုန်းကြီး ၁ ပါး၊ ကိုရင် ၁ ပါး၊ အမျိုးသား ၃ ဦး၊ အသက် ၈ နှစ်အရွယ်နဲ့ ၅ နှစ်အရွယ် အမျိုးသမီး ၂ ဦး စုစုပေါင်း ၇ ဦးသေဆုံးခဲ့တယ်လို့ ဓနုဖြူမြို့မရဲစခန်းမှုးဒုရဲမှူး အေးမင်းက ပြောပါတယ်။
“တိုက်တာကတော့ မင်္ဂလာဆောင်က ပြန်လာတဲ့ကားကနေ သူ့လမ်းသူ မောင်းလာတယ်ပေါ့။ ဟင်္သာတကနေလာတဲ့ကားက ရှေ့ကဝါးတင်ထားတဲ့ ကားကြီးနောက်ကို ဝင်တိုက်ပြီး သူဟာသူလည်ထွက်ပြီးတော့မှ တဖက်ကမျက်နှာချင်းဆိုင်လာတဲ့ ကားနဲ့ဝင်တိုက်မိတယ်ပေါ့။ ဒဏ်ရာရတဲ့သူတွေကိုတော့ ဓနုဖြူဆေးရုံကနေတဆင့် ဟင်္သာတဆေးရုံတို့ ရန်ကုန်ဆေးရုံတို့ကို ပို့ထားပါတယ်။”
ဓနုဖြူ မြို့မရဲစခန်းက ယာဉ်မောင်း ကျော်စိုးခိုင်ထွန်းကို ယာဉ်မဆင်မခြင် မောင်းနှင်လို့ လူသေဆုံးစေမှု၊ ပြင်းထန်ဒဏ်ရာရစေမှု ရာဇသတ်ကြီးဥပဒေပုဒ်မ-၃၀၄(က) ၃၃၇/၃၃၈ နဲ့ အမှုဖွင့်အရေးယူထားတယ်လို့ သိရပါတယ်။
မြမင်းဦး(ပုသိမ်)
