ထိုင်းနိုင်ငံ၊ ဘန်ကောက်မြို့က ဝိဘာဝဒီရန်းဆစ်လမ်းမပေါ်မှာရှိတဲ့ ရတ်ချာဝီပါ ခုံးကျော်တံတားပေါ်မှာ ဇွန် ၂ ရက်နေ့လယ်ပိုင်းက ဆိုင်ကယ်သမားတယောက် မိုး ကြိုးပစ်ခံရတာကြောင့် ပြင်းထန်တဲ့ ထိခိုက်ဒဏ်ရာ ရရှိသွားတယ်လို့ Bangkok Post သတင်းမှာ ဖော်ပြပါတယ်။

ဒီဖြစ်စဉ်ဟာ မွန်းလွဲ ၃ နာရီ မိနစ် ၄၀ လောက်က ဖြစ်ပွားခဲ့တာဖြစ်ပြီး မိုးကြိုးပစ်ခံရသူဟာ အသက် ၄၆ နှစ်အရွယ် အွန်လိုင်းပါဆယ်ပို့ဆောင်သူ အမျိုးသားတယောက် ဖြစ်တယ်လို့ အာဏာပိုင်တွေက အတည်ပြုထားပါတယ်။ 

ဖြစ်ပွားချိန်မှာ မိုးသည်းထန်စွာ ရွာသွန်းနေပြီး ဆိုင်ကယ်သမား ခုံးကျော်တံတားပေါ် မောင်းနှင်နေတုန်း မိုးကြိုးပစ်ချခဲ့တာကြောင့် ဆိုင်ကယ်ကို မထိန်းနိုင်ဘဲ လဲကျသွားခဲ့တာလို့ သတင်းမှာ ဖော်ပြပါတယ်။

ပေါ်တက်တုံလူမှုကူညီရေးအဖွဲ့က ကယ်ဆယ်ရေးသမားတွေ အခင်းဖြစ်ပွားရာကို ချက်ချင်းကူညီဖို့ ရောက်ရှိသွားချိန်မှာတော့ အဆိုပါ ဆိုင်ကယ်မောင်းသမားဟာ လမ်းပေါ်မှာ ပက်လက်လန်ကာ သတိမေ့မြောနေတာကို တွေ့ရှိခဲ့ရတ​ယ်လို့ ဆိုပါတယ်။ 

ဒေသတွင်း သတင်းဌာနတွေရဲ့ ဖော်ပြချက်အရ သူ့ရဲ့ လည်ပင်းဘယ်ဘက် အခြမ်းကနေ ရင်ဘတ်အထိ ရှည်လျားတဲ့ မီးလောင်ဒဏ်ရာ အမှတ်အသားတခု ထင်ကျန်နေတာကို တွေ့ရပါတယ်။

အကြိုစုံစမ်းစစ်ဆေးမှုတွေအရ မိုးကြိုးဟာ သူဆောင်းထားတဲ့ ဆိုင်ကယ်စီးဦးထုပ်ကို တိုက်ရိုက်ထိမှန်ခဲ့တာဖြစ်ပြီး ဦးထုပ်မှာ မီးလောင်ကျွမ်းတဲ့ အမှတ်အသားတွေ ထင်ကျန်ခဲ့တဲ့အပြင် သူဆွဲထားတဲ့ ဘုရားဆင်းတု လက်ဖွဲ့ အဆောင်ပါတဲ့ လည်ဆွဲပါ ပြတ်ထွက်သွားခဲ့တယ်လို့ သိရပါတယ်။

Source: Bangkok Post