ဖိလစ်ပိုင်နိုင်ငံ၊ မင်ဒါနာအိုကျွန်းတောင်ပိုင်း ကမ်းရိုးတန်းမှာ ဇွန် ၈ ရက်က လှုပ်ခဲ့တဲ့ ရစ်ချ်တာစကေး ၇ ဒသမ ၈ အဆင့်ရှိတဲ့ ငလျင်ကြောင့် သေဆုံးသူဦးရေဟာ ဇွန် ၁၆ ရက်မှာ ၆၈ ယောက်အထိ မြင့်တက်လာပြီး ဇွန် ၁၆ ရက် မနက်အထိ လူ ၃၃ ယောက် ပျောက်နေတုန်းပဲလို့ ဖိလစ်ပိုင် အမျိုးသား သဘာဝဘေးအန္တရာယ် လျှော့ချရေးနဲ့ စီမံခန့်ခွဲရေးကောင်စီက ပြောပါတယ်။

အင်အားပြင်းငလျင်ကြောင့် လူပေါင်း ၁၃ သိန်း ၈ သောင်း ထိခိုက်ခဲ့ပြီး အိမ်ခြေ ၆၈,၀၀၀ ပျက်စီးခဲ့တယ်လို့ ကောင်စီက အစီရင်ခံစာ ထုတ်ပြန်ခဲ့ပါတယ်။

အခြေခံအဆောက်အအုံ ဆုံးရှုံးမှုတန်ဖိုး ပီဆို ၁ ဘီလီယံ (အမေရိကန်ဒေါ်လာ ၁၇ သန်း) ကျော်လွန်ခဲ့ပြီး စိုက်ပျိုးရေးဆုံးရှုံးမှုတန်ဖိုး ပီဆို ၂၉ သန်း (အမေရိကန်ဒေါ်လာ ၄ သိန်း ၈ သောင်း) ကျော်လွန်ခဲ့ပါတယ်။

ငလျင်ဟာ ဒေသစံတော်ချိန် မနက် ၇ နာရီ ၃၇ မိနစ်မှာ လှုပ်ခတ်ခဲ့တာလို့ ဖိလစ်ပိုင် မီးတောင်နဲ့ ငလျင်ဗေဒ အင်စတီကျုက ပြောပါတယ်။

၃၃ ကီလိုမီတာ အနက်ရှိပြီး မင်ဒါနာအိုကျွန်းပေါ် ဆာရန်ဂါနီပြည်နယ်က မာဆင်မြို့ ကမ်းရိုးတန်းရဲ့ အနောက်တောင်ဘက် ၃၂ ​​ကီလိုမီတာအကွာကို ဗဟိုပြု လှုပ်ခတ်တာလည်း ဖြစ်ပါတယ်။

အရှေ့တောင်အာရှက ကျွန်းစုနိုင်ငံတခုဖြစ်တဲ့ ဖိလစ်ပိုင်ဟာ ပစိဖိတ်သမုဒ္ဒရာကို ဝန်းရံထားပြီး မြင်းခွာပုံသဏ္ဌာန်ရှိတဲ့ ကျွန်းတွေနဲ့ ဖွဲ့စည်းထားတာပါ။

ပြင်းထန်တဲ့ ငလျင်နဲ့ မီးတောင်လှုပ်ရှားမှုတွေရှိတဲ့ ကျယ်ပြန့်တဲ့ မြင်းခွာပုံသဏ္ဌာန်ဇုန်ဖြစ်တဲ့ ပစိဖိတ် ‘မီးကွင်း’ တလျှောက်မှာရှိလို့ ငလျင်လှုပ်တာ၊ မီးတောင်ပေါက်ကွဲမှုနဲ့  ဆူနာမီလှိုင်းတွေရဲ့ ဒဏ်ကို မကြာခဏ ခံရလေ့ရှိပါတယ်။

Source: Reuters