အလဲဗင်းမီဒီယာအုပ်စုရဲ့ အမှုဆောင်အရာရှိချုပ် ဒေါက်တာသန်းထွဋ်အောင်နဲ့ အလဲဗင်း သတင်းစာအယ်ဒီတာချုပ် ဦးဝေဖြိုးတို့ကို တာမွေရဲစခန်းက လာရောက်ဖို့ ဆင့်ခေါ်လိုက်ပါတယ်။

ဝန်ကြီးချုပ်တဦး ဒေါ်လာ ၁ သိန်းတန်နာရီ စီးပွားရေးသမားထံက လက်ဆောင်ယူခဲ့တယ်ဆိုပြီး ရေးသားခဲ့တဲ့အတွက် အလဲဗင်းမီဒီယာကို ရန်ကုန်တိုင်းအစိုးရအဖွဲ့က ဆက်သွယ်ရေးပုဒ်မ ၆၆(ဃ) နဲ့ အမှုဖွင့်လိုက်ကြောင်း ၀န်ကြီးချုပ် ဦးဖြိုးမင်းသိန်းက ပြောဆိုပြီးနောက်မှာ ရဲစခန်းက ခုလို ဆင့်ခေါ်စာပေးပို့လိုက်တာ ဖြစ်ပါတယ်။

မနေ့ည ၉ နာရီကျော်လောက်ကလည်း ရန်ကုန်မြို့ တာမွေမြို့နယ် တောင်မြင်းပြိုင်ကွင်းလမ်းမှာရှိတဲ့ အလဲဗင်းမီဒီယာရုံးချုပ်ကို တာမွေရဲစခန်းက ရဲတပ်ဖွဲ့ဝင်တွေ သွားရောက်မေးမြန်းမှုတွေ လုပ်ခဲ့တယ်လို့ သိရပါတယ်။

အဆိုပါနာရီကိစ္စနဲ့ပတ်သက်ပြီး ရန်ကုန်တိုင်းဝန်ကြီးချုပ် ဦးဖြိုးမင်းသိန်းက မိမိအနေနဲ့ ဒေါ်လာ ၁ သိန်းလောက်တန်တဲ့ Patek Phillipe နာရီ ဝတ်ဆင်ထားတယ်ဆိုတာ မဟုတ်ဘဲ မိမိပတ်ထားတဲ့နာရီဟာ ရိုးလက်စ်နာရီသာဖြစ်ကြောင်းနဲ့ အဆိုပါနာရီကို ဝန်ကြီးချုပ်မဖြစ်မီ အချိန်ကတည်းက ပတ်ထားတာဖြစ်တယ်လို့ မနေ့က သတင်းစာရှင်းလင်းပွဲမှာ ပြောပါတယ်။