ဘာစီလိုနာအသင်းဟာ ရေးဆင်းဆန်တန်ဒါ အသင်းကို ၇-၂ ဂိုးနဲ့ အပြတ်အသတ် အနိုင်ရရှိပြီး လာလီဂါပြိုင်ပွဲမှာ ရာနှုန်းပြည့် အနိုင်ရလဒ်ကို ဆက်လက် ထိန်းသိမ်းထားပါတယ်။

ဒီနေ့ မနက်အစောပိုင်း ယှဉ်ပြိုင်ခဲ့တဲ့ ဒီပွဲမှာ ဘာစီလိုနာအတွက် အသင်းခေါင်းဆောင် ရာဖင်ညာက ပင်နယ်တီ ၂ လုံး အပါအဝင် ဟက်ထရစ် သွင်းယူခဲ့ပြီး ဂျိုအို ကန်ဆယ်လို၊ ဂေးဘရီယယ် ဂျေးဇူး၊ လာမိန်း ယာမဲလ်နဲ့ ရေးဆင်းဆန်တန်ဒါ ကစားသမားတယောက် ကိုယ့်ဂိုးကိုယ် သွင်းယူမှုတွေကနေ ဂိုးတွေရရှိခဲ့တာပါ။

ရာဖင်ညာဟာ ဒီရာသီ ပြိုင်ပွဲစုံမှာ ၁၁ ဂိုးအထိ သွင်းယူထားနိုင်ခဲ့ပြီး လာလီဂါမှာ ၉ ဂိုး သွင်းယူကာ ဘာစီလိုနာရဲ့ လာလီဂါ ၆ ပွဲဆက် အနိုင်ရလဒ်ကို ကူညီပေးထားပါတယ်။

နည်းပြ ဟန်စီ ဖလစ်ရဲ့ ဘာစီလိုနာအသင်းဟာ ဒီရာသီမှာ ရလဒ်ကောင်းတွေ ဆက်တိုက်ရရှိနေပြီး ပြိုင်ပွဲစုံ ၇ ပွဲမှာ ၅ ပွဲအထိ ၅ ဂိုးနဲ့အထက် သွင်းယူထားနိုင်ခဲ့ပါတယ်။