ကချင်ပြည်နယ်၊ ဖားကန့်မြို့နယ်နဲ့ စစ်ကိုင်းတိုင်း ဟုမ္မလင်းမြို့နယ်အစပ်မှာ ကချင်လွတ်လပ်​ရေးတပ်မ​တော် (KIA) နဲ့ စစ်အာဏာရှင်တပ်ပူး​ပေါင်း ရှမ်းနီ (SNA) တပ်တို့ တိုက်ပွဲဖြစ်​နေတယ်လို့ ​ဒေသခံ​တွေဆီက သိရပါတယ်။

ဖားကန့်မြို့နယ်နဲ့ ဟုမ္မလင်းမြို့နယ်အစပ်က စုံတွဲ​မှော်၊ ​တောင်ဦးရွာ​တွေမှာ တလဝန်းကျင်ကြာ တိုက်ပွဲဖြစ်​နေပြီး ဒီ​နေ့ သြဂုတ် ၁၃ ရက်မှာလည်း တိုက်ပွဲဆက်ဖြစ်​နေတယ်လို့ ဆိုပါတယ်။

ဟုမ္မလင်းမြို့ ​ဒေသခံတ​ယောက်က “ဖားကန့်မြို့နယ်နဲ့ ဟုမ္မလင်းအစပ်​ပေါ့။ ဆယ်ဇင်းရွာတဖက် စုံတွဲ​​မှော်၊ ​​တောင်ဦးမှာ​တော့ တိုက်ပွဲဖြစ်​နေတယ်။ ဆက်တိုက် တိုက်ပွဲဖြစ်​နေတာ” လို့ ​ပြောပါတယ်။

အဲဒီ​ဒေသမှာ စစ်အာဏာရှင်တပ်ပူး​ပေါင်း ရှမ်းနီ (SNA) တပ်​တွေနဲ့ KIA တပ်မဟာ ၉၊ တပ်ရင်း ၂၆၊ နာဂပြည်သူ့ကာကွယ်​ရေးတပ်​တွေ တိုက်ပွဲဖြစ်​နေတာလို့ သိရပါတယ်။

​ဒေသခံတ​ယောက်က “​လေ​ကြောင်းက​နေ ဗုံးကြဲတိုက်ခိုက်တာ​တွေလည်း ရှိတယ်။ နှစ်ဖက် အကျအဆုံး အထိအခိုက်​တွေလည်း ရှိတယ်။ တိုက်ပွဲက​​တော့ ​တော်​တော်​လေး ပြင်းထန်ပါတယ်” လို့ ​ပြောပါတယ်။

အဲဒီဒေသဟာ စစ်ရေးအရ အရေးပါတဲ့ ရွှေမှော်နယ်မြေ​တွေ ဖြစ်တာကြောင့် စစ်ရေးတင်းမာမှု မြင့်မားနေတာ ဖြစ်ပါတယ်။

စုံတွဲ​မှော်၊ ရေပေါ်မီး၊ သဲနုတ်ဆွတ် စတဲ့ကျေးရွာ​တွေကို တော်လှန်ရေး ပူးပေါင်းတပ်ဖွဲ့​တွေက ထိန်းချုပ်ထားတာဖြစ်ပြီး ​တောင်ဦးရွာဘက်ကို စစ်တပ်ဘက်က စစ်ကြောင်းထိုးလာရာက​နေ တိုက်ပွဲ​တွေ ဖြစ်လာတာပါ။

Photo: TLM