ဥရောပ ချန်ပီယံလိဂ် ၁၆ သင်းအဆင့် ဒုတိယအကျော့ လက်ကျန်ပွဲတွေကို ဒီနေ့မနက်ပိုင်းမှာ ကစားခဲ့ရာမှာ လီဗာပူး၊ ဘိုင်ယန်မြူးနစ်၊ အက်သလက်တီကိုနဲ့ ဘာစီလိုနာအသင်းတို့ ကွာတားဖိုင်နယ်အဆင့်ကို တက်သွားပါတယ်။
ဂါလာတာစာရေးအသင်းကို ပထမအကျော့က ၁ ဂိုး ဂိုးမရှိနဲ့ ရှုံးခဲ့တဲ့ လီဗာပူးအသင်းဟာ အိမ်ကွင်းမှာ ၄ ဂိုး ဂိုးမရှိနဲ့ ပြန်အနိုင်ယူပြီး နောက်တဆင့်တက်သွားတာ ဖြစ်ပါတယ်။
အက်သလက်တီကိုမက်ဒရစ်အသင်းကတော့ စပါးအသင်းကို ၃ ဂိုး ၂ ဂိုးနဲ့ ရှုံးနိမ့်ခဲ့ပေမဲ့ ပထမအကျော့မှာ ၅ ဂိုး ၂ ဂိုးနဲ့ နိုင်ထားတာကြောင့် နှစ်ပွဲပေါင်းရလဒ် ၅ ဂိုး ၇ ဂိုးနဲ့ ကွာတားဖိုင်နယ်တက်သွားတာပါ။
ပထမအကျော့မှာ အတ္တလန္တာအသင်းကို ၆ ဂိုး ၁ ဂိုးနဲ့ နိုင်ထားတဲ့ ဘိုင်ယန်မြူးနစ်ကတော့ အိမ်ကွင်းမှာလည်း ၄ ဂိုး ၁ ဂိုးနဲ့ ထပ်နိုင်ပြီး နှစ်ကျော့ပေါင်း ၁၀ ဂိုး ၂ ဂိုးနဲ့ နောက်တဆင့်တက်သွားပါတယ်။
ပထမအကျော့တုန်းက နယူးကာဆယ်အသင်းကို အဝေးကွင်းမှာ တဂိုးစီသရေကျထားတဲ့ ဘာစီလိုနာအသင်းကလည်း ဒီနေ့ပွဲမှာ ၇ ဂိုး ၂ ဂိုးနဲ့ ဂိုးပြတ်အနိုင်ယူပြီး ကွာတားဖိုင်နယ် တက်သွားတာဖြစ်ပါတယ်။
ဥရောပချန်ပီယံလိဂ် ကွာတားဖိုင်နယ်အဆင့်ရဲ့ ပထမအကျော့ ပွဲစဉ်တွေကိုတော့ ဧပြီ ၈ ရက်နေ့ စပြီး ကစားကြမှာဖြစ်ပါတယ်။
