ပြင်သစ်သမ္မတ အီမန်နျူရယ် မက်ခရွန်ဟာ အောက်တိုဘာ ၁၈ ရက်မှာ ဝန်ကြီးတွေနဲ့ အရေးပေါ်အစည်းအဝေးတရပ်ကို ဦးဆောင်ကျင်းပခဲ့ပါတယ်။

အကြမ်းဖက်ဆန္ဒပြမှုတွေဖြစ်ခဲ့တဲ့ တနေ့တာအပြီးမှာ နိုင်ငံသူနိုင်ငံသားတွေကို ပြောတဲ့ မိန့်ခွန်းအတွင်း အကြမ်းဖက်မှုတွေကို ရှုတ်ချခဲ့ပါတယ်။

စနေနေ့က နိုင်ငံတဝန်း ဆန္ဒပြပွဲတွေက အဓိကရုဏ်းတွေအဖြစ် ပြောင်းလဲသွားခဲ့ပါတယ်။

နိုင်ငံတဝန်းက မြို့ကြီးတွေမှာ အကြမ်းဖက်အုပ်စုတွေနဲ့ ရဲတပ်ဖွဲ့တို့ ထိပ်တိုက်တွေ့ဆုံခဲ့ပြီး မြို့တော်ခန်းမတခု မီးရှို့ခံရသလို ဆိုင်ခန်းတွေ ဖျက်ဆီးလုယက်ခံရပြီး အဆောက်အအုံတွေပေါ်မှာ ဆေးမှုတ်ရေးဆွဲတာ ခံခဲ့ရပါတယ်။

ပါရီမြို့တော်က ဆန္ဒပြပွဲအတွင်း ဆန္ဒပြသူတယောက် နှလုံးရပ် သေဆုံးခဲ့ပါတယ်။

ပြင်သစ်နိုင်ငံတဝန်းမှာ ရဲတပ်ဖွဲ့က လူပေါင်း ၂,၀၀၀ ကျော်ကို ဖမ်းဆီးခဲ့ပြီး ရဲတပ်ဖွဲ့ဝင် ၆၀၀ ကျော် ဒဏ်ရာရခဲ့တယ်လို့ ပြည်ထဲရေးဝန်ကြီးက ပြောပါတယ်။

နေထိုင်မှုစရိတ် မြင့်တက်လာတာနဲ့ ပြည်သူ့ဝန်ဆောင်မှုတွေ ကျဆင်းလာခြင်းတို့အပေါ် ဒေါသထွက်နေကြတဲ့ လူထောင်ပေါင်းများစွာဟာ လမ်းမတွေပေါ်ကို ထွက်လာခဲ့ကြပြီး နှစ်ပေါင်းများစွာအတွင်း နိုင်ငံရဲ့ အကြမ်းဖက်မှုအများဆုံး ဆန္ဒပြပွဲတွေထဲက တခု ဖြစ်လာခဲ့ပါတယ်။

ပါရီမြို့တော် တောင်ပိုင်းက မာဆေးလ်မြို့၊ အနောက်တောင်ပိုင်းက တူးလူစ်မြို့၊ အနောက်ပိုင်းက အန်ဂျေးမြို့နဲ့ အရှေ့အလယ်ပိုင်းက လိုင်ယွန်မြို့တို့ အပါအဝင် နေရာအများအပြားမှာ မျက်နှာဖုံးစွပ်ထားသူတွေ ပါဝင်ပတ်သက်နေတဲ့ အကြမ်းဖက်ဖြစ်ရပ်တွေ ဖြစ်ပွားခဲ့ပြီး နေ့လယ်ပိုင်းအချိန်အထိ လူပေါင်း ၂၇၂ ယောက်ကို ဖမ်းဆီးထားတယ်လို့ ပြည်ထဲရေးဝန်ကြီးဌာနက ပြောပါတယ်။

ဆန္ဒပြသူတွေကတော့ လူအများစုက ငြိမ်းငြိမ်းချမ်းချမ်း ဆန္ဒပြခဲ့ကြတယ်လို့ ပြောပါတယ်။

အကြမ်းဖက်မှု အများစုက ပျက်စီးဆုံးရှုံးတာတွေ ဖြစ်အောင်၊ ရဲတပ်ဖွဲ့နဲ့ ထိပ်တိုက်တွေ့အောင် ရည်ရွယ်လာကြတဲ့ အဖျက်အမှောင့်သမားတွေကြောင့် ဖြစ်တာလို့ ပြောခဲ့ပါတယ်။

ခုဖြစ်ရပ်ဟာ ပြင်သစ်နိုင်ငံမှာ နှစ်ပေါင်းများစွာအတွင်း အဆိုးရွားဆုံး နိုင်ငံမတည်ငြိမ်မှုအဖြစ် မီဒီယာတွေက ဖော်ပြပါတယ်။

Source: Reuters