ဆိုမာလီနွယ်ဖွား အမေရိကန် ဒီမိုကရက်လွှတ်တော်အမတ် အီလ်ဟန်အိုမာရဲ့ ဝါရှင်တန်ဒီစီက နေအိမ်ကို အောက်တိုဘာ ၁၂ ရက် မနက်အစောပိုင်းမှာ အမေရိကန်လဝက တာဝန်ရှိသူတွေက ဝင်ရောက်ရှာဖွေခဲ့ပါတယ်။

အခုလို ရှာဖွေမှုဟာ ရာဇဝတ်မှုဆိုင်ရာ စုံစမ်းစစ်ဆေးမှုရဲ့ တစိတ်တဒေသဖြစ်ပြီး တရားရုံးက ခွင့်ပြုထားတဲ့ ရှာဖွေဝရမ်းနဲ့ ဆောင်ရွက်ခဲ့တာလို့ အမေရိကန် တရားရေးဝန်ကြီးဌာနက ပြောပါတယ်။

အိုမာ ငယ်စဉ်က သူ့ဖခင် ဖြည့်သွင်းခဲ့တဲ့ လူဝင်မှုကြီးကြပ်ရေး စာရွက်စာတမ်းတွေနဲ့ ပတ်သက်ပြီး စုံစမ်းနေတာလို့ သတင်းတွေထွက်ပေါ်နေပေမဲ့ အာဏာပိုင်တွေက အသေးစိတ် မထုတ်ပြန်သေးပါဘူး။

အိုမာဟာ ဆိုမာလီယာပြည်တွင်းစစ်ကြောင့် ကင်ညာနိုင်ငံက ဒုက္ခသည်စခန်းမှာ ၄ နှစ် နေထိုင်ခဲ့ရပြီး ၁၉၉၅ ခုနှစ်မှာ အမေရိကန်ကို ရောက်ရှိခဲ့သူ ဖြစ်ပါတယ်။

၂၀၀၀ ပြည့်နှစ်မှာ အမေရိကန်နိုင်ငံသား ဖြစ်လာတဲ့ အိုမာဟာ ၂၀၁၈ ခုနှစ်မှာ အမေရိကန်အောက်လွှတ်တော်ကို ပထမဆုံး ရွေးကောက်ခံရတဲ့ ဆိုမာလီနွယ်ဖွား အမေရိကန်နိုင်ငံသူ ဖြစ်လာခဲ့ပါတယ်။

အမေရိကန်သမ္မတ ဒေါ်နယ်ထရမ့်ပ်ကတော့ အိုမာရဲ့ ဆိုမာလီယာနောက်ခံကို အကြောင်းပြုပြီး သူ့ကို ဆိုမာလီယာ ပြန်သွားဖို့နဲ့ အမေရိကန်ကနေ ပြန်နှင်ထုတ်ဖို့ အရင်ကတည်းက ပြောဆိုခဲ့ဖူးပါတယ်။

အောက်တိုဘာ ၁၂ ရက်မှာလည်း ထရမ့်ပ်က အိုမာလာခဲ့တဲ့ ဆိုမာလီယာနိုင်ငံကို “နိုင်ငံလို့တောင် မခေါ်နိုင်တဲ့နိုင်ငံ” လို့ နှိမ့်ချပြောဆိုခဲ့ပါတယ်။

“လွန်ခဲ့တဲ့ ၁၀ နှစ်လုံး ထရမ့်ပ်က ကျမကို အခြေအမြစ်မရှိတဲ့ လိမ်ညာမှုတွေနဲ့ နာမည်ဖျက်မှုတွေ လုပ်ပြီး ပစ်မှတ်ထားခဲ့ပါတယ်” လို့ အိုမာက တုံ့ပြန်ပါတယ်။

ဒီရှာဖွေမှုဟာ နိုင်ငံရေးပြိုင်ဘက်တွေကို ခြိမ်းခြောက်ဖို့ တရားဥပဒေစိုးမိုးရေးအဖွဲ့တွေကို အသုံးချတာဖြစ်ပြီး “ကျမကို နှုတ်ပိတ်လို့ရမှာ မဟုတ်ပါဘူး” လို့လည်း အိုမာက ပြောပါတယ်။

ထရမ့်ပ်ကတော့ ဒီစုံစမ်းစစ်ဆေးမှုနဲ့ သူ မပတ်သက်ဘူးလို့ ငြင်းဆိုထားပြီး သက်တမ်းဝက် လွှတ်တော်ရွေးကောက်ပွဲမတိုင်မီ ၂၂ ရက်အလိုမှာ အခုလို ရှာဖွေခဲ့တာကို ဒီမိုကရက်တွေက နိုင်ငံရေးအရ ပစ်မှတ်ထားမှုဆိုပြီး ဝေဖန်နေကြပါတယ်။

Source: Reuters