ဗမာနိုင်ငံလုံးဆိုင်ရာ ကျောင်းသားသမဂ္ဂများအဖွဲချုပ် (ဗကသ) ကျောင်းသားခေါင်းဆောင်ဟောင်း၊ နိုင်ငံရေးတက်ကြွလှုပ်ရှားသူ ကိုဂျိမ်းစ် (ခ) ကိုလင်းထက်နိုင်ဟာ ဧပြီ ၁ ရက်က ဧရာဝတီတိုင်း၊ မြောင်းမြအကျဉ်းထောင်ကနေ လွတ်ရက်စေ့နဲ့ ပြန်လည်လွတ်မြောက်လာခဲ့ပါတယ်။
ဇနီးဖြစ်သူ မဖြိုးဖြိုးအောင်က ကိုဂျိမ်းစ် (ခ) ကိုလင်းထက်နိုင် ဧပြီ ၁ ရက်နေ့မှာ ပြန်လည်လွတ်မြောက်လာပြီဖြစ်ကြောင်း အင်တာနက် လူမှုစာမျက်နှာမှာ ရေးသား ဖော်ပြထားပါတယ်။
အာဏာသိမ်းစစ်တပ်က ကိုဂျိမ်းစ်ကို ၂၀၂၂ ခုနှစ် ဇွန် ၁၈ ရက်က ရန်ကုန်မြို့၊ ဗိုလ်တထောင်မြို့နယ်မှာ ဖမ်းဆီးထိန်းသိမ်းခဲ့တာပါ။
ကိုဂျိမ်းစ်ကို ပုဒ်မ ၅၀၅ (က) နဲ့ သုံးနှစ်၊ ၅၂ (ခ) နဲ့ ၅ နှစ် ထောင်ဒဏ်ချမှတ်ခဲ့ပြီး ၅၀၅ (က) က လွတ်ငြိမ်းချမ်းသာရခဲ့တာကြောင့် အင်းစိန်ထောင်နဲ့ မြောင်းမြထောင်တို့မှာ ၄ နှစ်နီးပါး အကျဉ်းကျခံခဲ့ရပြီးနောက် ပြန်လည်လွတ်မြောက်လာခဲ့တာလို့ သိရပါတယ်။
၂၀၁၅ ကျောင်းသားသပိတ်မှာ ဦးဆောင်ပါဝင်ခဲ့တဲ့ ကိုဂျိမ်းစ် အပါအဝင် ကျောင်းသားခေါင်းဆောင်တွေကို ၂၀၁၅ ခုနှစ်၊ မတ်လတုန်းက ဦးသိန်းစိန်အစိုးရဟာ ပုဒ်မများစွာနဲ့ ဖမ်းဆီးတရားစွဲဆိုခဲ့ပြီး ၂၀၁၆ ခုနှစ်၊ အစိုးရသစ်လက်ထက်မှာ အမှုတွေ ရုပ်သိမ်းပေးခဲ့ပါတယ်။
ဒါပေမဲ့ ကိုဂျိမ်းစ်ကို တရားစွဲဆိုထားတဲ့ အမှုတစ်မှုဖြစ်တဲ့ ပုဒ်မ-၄၆၈ ကို လူဝင်မှုကြီးကြပ်ရေးနဲ့ အလုပ်သမားဝန်ကြီးဌာနက ရုပ်သိမ်းပေးခဲ့ခြင်းမရှိဘဲ ၄ နှစ်ကျော်ကြာ တရားရင်ဆိုင်ခဲ့ရပြီး ၂၀၂၀ ပြည့်နှစ်၊ ဩဂုတ် ၂၆ ရက်နေ့မှာ ထောင်ဒဏ် ၆ လ ချမှတ်ခံခဲ့ရပါတယ်။ ၂၀၁၂ ခုနှစ် ဇန်နဝါရီလမှာ ပြန်လည်လွတ်မြောက်ခဲ့ပြီး အာဏာသိမ်းပြီးနောက် ၂၀၂၂ ခုနှစ်မှာ ထပ်မံ ဖမ်းဆီးခံခဲ့ရတာလည်း ဖြစ်ပါတယ်။
၂၀၂၂ ခုနစ် အောက်တိုဘာ ၁၉ ရက်က ကိုဂျိမ်းစ်ရဲ့ မိခင်ဖြစ်သူ ဒေါ်ကြည်ကြည်မြင့်ဟာ သားဖြစ်သူကို ထောင်ဝင်စာ လာတွေ့ရင်း အင်းစိန်ထောင်ရှေ့ ပေါက်ကွဲမှုထဲမှာ ထိခိုက်ပြီး ဆုံးပါးသွားခဲ့ရတာလည်း ဖြစ်ပါတယ်။
