ပြင်သစ်နိုင်ငံ ဘူလွန်းဆူမဲရ်ဆိပ်ကမ်းအနီး အင်္ဂလိပ်ရေလက်ကြားအတွင်း ဩဂုတ် ၄ ရက်က ရွှေ့ပြောင်းဒုက္ခသည်တွေကို တင်ဆောင်လာတဲ့ လှေတစင်း မီးလောင်မှုကနေ လူပေါင်း ၁၅၇ ယောက်ကို ပြင်သစ်ကမ်းခြေစောင့်တပ်က ကယ်ဆယ်နိုင်ခဲ့တယ်လို့ ဒေသဆိုင်ရာ အုပ်ချုပ်ရေးအဖွဲ့က ထုတ်ပြန်ပါတယ်။
ကမ်းခြေစောင့်သင်္ဘော ၃ စင်းဟာ အဲဒီလူတွေကို ကယ်ဆယ်ခဲ့တယ်လို့ အင်္ဂလိပ်ရေလက်ကြားနဲ့ မြောက်ပင်လယ်ဆိုင်ရာ ဒေသန္တရ ပြင်သစ်အုပ်ချုပ်ရေးအဖွဲ့က ပြောပါတယ်။
၂၀၁၅-၁၆ တုန်းက ဆီးရီးယားစစ်ပွဲကြောင့် ထွက်ပြေးလာကြတဲ့ စစ်ဘေးဒုက္ခသည်တွေ အပါအဝင် လူပေါင်း ၁ သန်းကျော် ဥရောပကို ဝင်ရောက်လာခဲ့ပြီးနောက်ပိုင်း ရွှေ့ပြောင်းဒုက္ခသည် ပြဿနာဟာ ဥရောပမှာ နိုင်ငံရေးအရ အကြီးအကျယ် သဘောထားကွဲလွဲစရာ ကိစ္စတခု ဖြစ်လာခဲ့ပါတယ်။
ပြီးခဲ့တဲ့ သီတင်းပတ်ကလည်း အင်္ဂလိပ်ရေလက်ကြားကို လှေငယ်လေးနဲ့ ဖြတ်ကူးဖို့ ကြိုးစားရင်း လူ ၃ ယောက် သေဆုံးခဲ့ပါသေးတယ်။
လူမှောင်ခိုကူးသူတွေက မခိုင်ခန့်တဲ့ လှေငယ်တွေပေါ်မှာ ရွှေ့ပြောင်းဒုက္ခသည်တွေကို မတန်တဆ ပြည့်ကျပ်နေအောင် တင်ဆောင်နေကြတာကြောင့် အခုလို ရေလက်ကြားဖြတ်ကူးမှုတွေဟာ အန္တရာယ် ပိုကြီးလာနေတာကို ဒီဖြစ်စဉ်က မီးမောင်းထိုးပြနေပါတယ်။
ဩဂုတ် ၂ ရက်ကလည်း ဗြိတိန်ဝန်ကြီးချုပ် အန်ဒီ ဘန်နမ်က ဒီလို လှေငယ်တွေနဲ့ ခိုးဝင်လာမှုတွေကို "မရပ်မနား" တားဆီးသွားမယ်လို့ ကတိပြု ပြောကြားထားပါတယ်။
Source: Reuters
