မြန်မာနိုင်ငံသားတွေ အပါအဝင် တရားမဝင်ရွှေ့ပြောင်းနေထိုင်သူ နိုင်ငံခြားသား ၆,၀၀၀ ကျော်ကို တလခွဲအတွင်း ဖမ်းဆီးခဲ့တယ်လို့ မလေးရှားလူဝင်မှုကြီးကြပ်ရေးဌာနကို ကိုးကားပြီး ပြည်ထဲရေးဝန်ကြီးဌာနက ဖေဖော်ဝါရီ ၁၄ ရက်မှာ ထုတ်ပြန်ပါတယ်။
၂၀၂၆ ဇန်နဝါရီလကစလို့ တနိုင်ငံလုံးမှာ စစ်ဆေးမှုပေါင်း ၁,၇၀၀ လောက်လုပ်ခဲ့ပြီး နိုင်ငံခြားသား ၂၇,၀၀၀ ကျော်ကို စစ်ဆေးခဲ့တယ်လို့ ဆိုပါတယ်။
အဲဒီ ပူးပေါင်းစစ်ဆေးမှုတွေအတွင်း လူဝင်မှုကြီးကြပ်ရေးဥပဒေအမျိုးမျိုးကို ဖောက်ဖျက်ကျူးလွန်တယ် ဆိုတဲ့ မြန်မာ၊ တရုတ်၊ အင်ဒိုနီးရှားနဲ့ ဘင်္ဂလားဒေ့ရှ်အပါအဝင် နိုင်ငံခြားသား ၆,၂၀၀ကို ဖမ်းဆီးရမိခဲ့သလို အလုပ်ရှင် ၂၃၀ ကိုလည်း အရေးယူခဲ့တယ်လို့ ဆိုပါတယ်။
မလေးရှားပြည်ထဲရေးဝန်ကြီးက “အစိုးရအနေနဲ့ နိုင်ငံတော်လုံခြုံရေးနဲ့ ပြည်သူလူထုရဲ့ သာယာဝပြောရေးအတွက် ပိုဗျူဟာကျပြီး ပစ်မှတ်ထားတဲ့၊ ဂုဏ်သိက္ခာရှိတဲ့ စမတ်ကျကျ နှိမ်နင်းရေး နည်းလမ်းကိုအသုံးပြုပြီး လူဝင်မှုကြီးကြပ်ရေးဥပဒေတွေကို အပြည့်အဝ လိုက်နာစေဖို့ သန္နိဋ္ဌာန်ချထားပါတယ်” လို့ ပြောပါတယ်။
ဒါ့အပြင် စီးပွားရေးလုပ်ငန်းခွင်တွေ၊ လူစည်ကားရာနေရာတွေမှာသာမက လာမဲ့ ရမ်ဇာန် ဥပုသ်လထဲမှာလည်း အလုပ်ပါမစ်အလွဲသုံးစားလုပ်တာ၊ ဈေးတွေမှာ တရားမဝင် ရောင်းချတာမျိုးတွေ မရှိစေဖို့ ပိုပြီး စစ်ဆေးသွားမယ်လို့ ထုတ်ပြန်ထားပါတယ်။
