ဆူဒန်နိုင်ငံ၊ မြောက်ဒါဖာပြည်နယ်က နောက်ထပ်ဒေသ ၂ ခုမှာ အာဟာရချို့တဲ့မှုက အစာရေစာငတ်မွတ် ခေါင်းပါးမှုအဆင့်ထိ ရောက်နေပြီလို့ ကုလသမဂ္ဂကလေးများရန်ပုံငွေအဖွဲ့ (UNICEF)က  ဖေဖော်ဝါရီ ၁၀ ရက်မှာ ပြောပါတယ်။ 

လူသန်းပေါင်းများစွာ အိုးမဲ့အိမ်မဲ့ဖြစ်ပြီး လူမျိုးရေးအရ အကြမ်းဖက်မှုတွေ ဖြစ်ခဲ့တဲ့ ဆူဒန် ပြည်တွင်း စစ်အတွင်း ကမ္ဘာလုံးဆိုင်ရာ ငတ်မွတ်ခေါင်းပါးမှု စောင့်ကြည့်ရေးအဖွဲ့ရဲ့ အစီရင်ခံစာကို ကိုးကားပြီး ပြောလိုက်တာပါ။ 

ဆူဒန်နိုင်ငံက အခြေအနေဟာ အာဟာရချို့တဲ့မှုအတွက် အစာရေစာငတ်မွတ် ခေါင်းပါးမှု စံနှုန်းတွေ ကို ကျော်လွန်နေတာကို ကုလသမဂ္ဂ ကျောထောက်နောက်ခံပြုထားတဲ့ ပေါင်းစပ် စားနပ်ရိက္ခာ လုံခြုံရေး အဆင့်ခွဲခြားမှုအဖွဲ့ (IPC) ကဖေဖော်ဝါရီ ၅ ရက်မှာ တွေ့ရှိခဲ့ပြီး အသက် ၅ နှစ်အောက် ကလေးတွေရဲ့ အစာရေစာငတ်မွတ်ခေါင်းပါးမှုနှုန်းက အစာရေစာငတ်မွတ်ခေါင်းပါးမှု စံနှုန်းထက် နှစ်ဆနီးပါး မြင့်နေတာကို အမ်ဘာရူနဲ့ ခါနွိုင်းဒေသတွေမှာ တွေ့ခဲ့ရပါတယ်။ 

IPCရဲ့ သတိပေးချက်ဟာ တရားဝင် အစာ ရေစာ ငတ်မွတ်ခေါင်းပါးမှုဆိုင်ရာ ခွဲခြားမှုမဟုတ်ပေမယ့် နောက်ဆုံးရဒေတာတွေအပေါ် အခြေခံပြီး စိုးရိမ်စရာ အစာရေစာငတ်မွတ်ခေါင်းပါးမှုအဆင့်တွေကို မီးမောင်းထိုးပြထားပါတယ်။ 

အရင်က အစာရေစာငတ်မွတ် ခေါင်းပါးမှုရှိတယ်လို့ ဆုံးဖြတ်ထားတဲ့ အယ်လ်ဖှာရှီယား ခရိုင်ကနေ ထွက်ပြေးလာတဲ့ ထောင်ပေါင်းများစွာသော လူတွေကို ချဒ်နိုင်ငံနဲ့ နယ်စပ်နားက ဆူဒန်ရဲ့ ဒေသနှစ်ခုဟာ ပြီးခဲ့တဲ့နှစ်နှောင်းပိုင်းမှာ လက်ခံရရှိခဲ့ ပါတယ်။ 

အဲဒီနောက်မှာ အမ်ဘာရူနဲ့ ခါနွိုင်းဒေသတွေဟာ RSF အဖွဲ့က ထိန်းချုပ်မှုကို ပေါင်းစည်းဖို့ ကြိုးပမ်း နေချိန်မှာ ပဋိပက္ခတွေကို ကြုံတွေ့ခဲ့ရပါတယ်။ 

RSF နဲ့ ဆူဒန်စစ်တပ်အကြား လွန်ခဲ့တဲ့ သုံးနှစ်နီးပါးကစခဲ့တဲ့ ပြည်တွင်းစစ်ဟာ ငတ်မွတ် ခေါင်းပါး မှုကို ကျယ်ကျယ်ပြန့်ပြန့် ဖြစ်ပေါ်စေခဲ့ပါတယ်။ 

နိုဝင်ဘာလမှာ ကမ္ဘာလုံးဆိုင်ရာ ငတ်မွတ်ခေါင်းပါးမှု စောင့်ကြည့်ရေးအဖွဲ့က အယ်လ်ဖာရှာနဲ့ ကာဒူဂလီတို့တွင် ပထမဆုံးအကြိမ်အဖြစ် အစာရေစာငတ်မွတ်ခေါင်းပါးမှု အခြေအနေတွေကို အတည်ပြုခဲ့ပြီး အင်္ဂါနေ့မှာ ဆူဒန်စစ်တပ်က မြို့ကို နှစ်ပေါင်းများစွာ ဝိုင်းရံထားမှုကို ဖြိုခွင်း နိုင်ခဲ့တယ်လို့ ပြောခဲ့ပါတယ်။ 

နိုင်ငံအတွင်း ပြင်းထန်တဲ့ အာဟာရ ချို့တဲ့မှု မြင့်တက်လာနေပြီး ၂၀၂၅ ခုနှစ်မှာ ငတ်မွတ်သူ ၃ ဒသမ ၇ သန်းရှိခဲ့ရာကနေ ခုတော့ ခန့်မှန်းခြေအားဖြင့် ၄ ဒသမ ၂ သန်းနီးပါး ရှိလာပြီလို့ IPC က ပြောပါတယ်။ 

Source:Reuters