ဆူဒန်နိုင်ငံ မြောက်ပိုင်း အယ်လ်-ဒက်ဘာမြို့က အကူအညီပေးရေး အဖွဲ့အစည်းတွေဟာ နိုဝင်ဘာ ၃ ရက်မှာ ဒုက္ခသည်စခန်းတွေနဲ့ အကူအညီပေးရေး အစီအစဉ်တွေကို ပြင်ဆင်နေကြပါတယ်။

အယ်လ်-ဖာရှီးရ်မြို့ ပဋိပက္ခကနေ ထွက်ပြေးလာတဲ့ နေရပ်စွန့်ခွာရသူတွေ ပိုပြီး ရောက်လာမယ်လို့လည်း မျှော်လင့်နေကြပါတယ်။

ဆူဒန်အနောက်ပိုင်း ဒါဖာဒေသက ဆူဒန်စစ်တပ်ရဲ့ နောက်ဆုံးခံတပ်ဖြစ်တဲ့ အယ်လ်-ဖာရှီးရ်မြို့ကို အမြန်ထောက်ပံ့ရေးတပ်ဖွဲ့တွေက သိမ်းပိုက်လိုက်တာဟာ ဆူဒန်ပြည်တွင်းစစ်မှာ မှတ်တိုင်တခု ဖြစ်ခဲ့တာပါ။

နိုင်ငံရဲ့ နယ်မြေ လေးပုံတပုံကျော်ကို စစ်ဘက်ဆိုင်ရာတပ်ဖွဲ့တွေက လက်တွေ့ ထိန်းချုပ်နိုင်ခဲ့ပါတယ်။

မြို့ကျဆုံးချိန်မှာ အရပ်သား ရာပေါင်းများစွာနဲ့ လက်နက်မဲ့ တိုက်ခိုက်ရေးသမားတွေ သေဆုံးခဲ့နိုင်တယ်လို့ ကုလသမဂ္ဂ လူ့အခွင့်အရေးရုံးက သောကြာနေ့မှာ ပြောပါတယ်။

RSF တိုက်ခိုက်ရေးသမားတွေဟာ အမျိုးသားတွေနဲ့ အမျိုးသမီးတွေ၊ ကလေးတွေကို ခွဲထုတ်ပြီးတဲ့နောက် သေနတ်သံတွေ ထွက်လာတယ်လို့ မျက်မြင်သက်သေတွေက ဖော်ပြခဲ့ကြပါတယ်။

RSF က အရပ်သားတွေကို ထိခိုက်နစ်နာအောင် မလုပ်ခဲ့ဘူးလို့ ငြင်းပါတယ်။

ဆူဒန်နိုင်ငံရဲ့ အခြေအနေဟာ ကြောက်စရာကောင်းတယ်လို့ နိုင်ငံတကာကြက်ခြေနီကော်မတီ (ICRC) ရဲ့ ဥက္ကဋ္ဌ မီရီယာနာ စပိုယာရစ်ခ်က ဆော်ဒီအာရေဗျနိုင်ငံရဲ့ မြို့တော် ရိယာ့ဒ်ဆီ ခရီးစဉ်အတွင်း သီတင်းပတ်ကုန်ရက်က လူတွေ့မေးမြန်းခန်းမှာ ရိုက်တာသတင်းဌာနကို ပြောခဲ့ပါတယ်။

RSF က မြို့ကို သိမ်းပိုက်ပြီးတဲ့နောက် အယ်လ်ဖာရှီးရ်မြို့ကနေ လူထောင်ပေါင်းများစွာ ထွက်ပြေးခဲ့ကြပါတယ်။

နောက်ထပ် လူထောင်ပေါင်းများစွာဟာလည်း အစားအစာ၊ ရေနဲ့ ဆေးဝါးကုသမှု မရဘဲ ပိတ်မိနေနိုင်တယ်လို့ သူက ပြောပါတယ်။

ဒါဖာဒေသထဲက တာဝီလာ အပါအဝင် ဆူဒန်နိုင်ငံထဲက တခြားမြို့တွေအပြင် အယ်လ်ဒါဘာမြို့ဟာ မကြာသေးမီလတွေအတွင်း အယ်လ်ဖာရှီးရ်မြို့ကနေ ထွက်ပြေးလာတဲ့ နေရပ်စွန့်ခွာသူတွေကို လက်ခံနေခဲ့ပါတယ်။

လာမယ့်ရက်မှာ နေရပ်စွန့်ခွာသူ ၂,၅၀၀ နီးပါး အယ်လ်ဒါဘာမြို့ဆီ ရောက်လာဖို့ မျှော်လင့်ထားတယ်လို့ ဆူဒန်လခြမ်းနီအဖွဲ့ ကိုယ်စားလှယ်တယောက်က တနင်္လာနေ့မှာ ရိုက်တာသတင်းဌာနကို ပြောခဲ့ပါတယ်။

Source: Reuters