မြန်မာ့ရုပ်ရှင်အကယ်ဒမီ ၁၂ ဆု စာရင်းနဲ့ အကယ်ဒမီရမဲ့ အနုပညာရှင်တွေရဲ့ စာရင်းတချို့ အကယ်ဒမီဆုပေးပွဲ မတိုင်ခင် ပေါက်ကြားလာပါတယ်။

ပေါက်ကြားလာတဲ့အထဲမှာ မြေစာရုပ်ရှင်ဇာတ်ကားမှာ အဓိကသရုပ်ဆောင်တဲ့ မြင့်မြတ်က အမျိုးသားဇာတ်ဆောင်ဆုကို ရမယ်လို့ ဖော်ပြထားပြီး အမျိုးသမီးဇာတ်ဆောင်ဆုကို ဗြောသံ ရုပ်ရှင် ဇာတ်ကားနဲ့ ခင်ဝင့်ဝါ ရမယ်လို့ ဖော်ပြထားတာတွေ့ရပါတယ်။

ဒါ့အပြင် မြေစာရုပ်ရှင်ဇာတ်ကားနဲ့ အမျိုးသားဇာတ်ပို့ဆုကို ဆင်မ၊ ဗြောသံရုပ်ရှင်ဇာတ်ကားနဲ့ အမျိုးသမီး ဇာတ်ပို့ဆုကို မျိုးသန္တာထွန်း၊ ပန်းမြိုင်လယ်မှ ဥယျာဉ်မှူး ရုပ်ရှင်ဇာတ်ကားနဲ့ အကောင်းဆုံး ရုပ်ရှင်ဒါရိုက်တာဆုကို ဒါရိုက်တာ ဝင်းလွင်ထက်တို့ ရမယ်လို့ ဖော်ပြနေကြပါတယ်။

အကောင်းဆုံးဇာတ်ညွှန်းဆုကိုတော့ မေတ္တာအမွေပုဂံမြေ ရုပ်ရှင်ဇာတ်ကားနဲ့ အကယ်ဒမီ ငြိမ်းမင်း၊ အကောင်းဆုံး ဇာတ်ကားဆုကို နတ်ဝင်သည် ရုပ်ရှင်ဇာတ်ကားနဲ့ ဝတ်မှုံရွှေရည်၊ အကောင်းဆုံးဓာတ်ပုံဆုကို မြစ်လက်တက်ပေမဲ့ ရေစီးကကြမ်းတယ် ရုပ်ရှင်ဇာတ်ကားနဲ့ ပီကေ တို့ ရမယ်လို့ သတင်းထွက်ပေါ်နေပါတယ်။

ဒါ့အပြင် ဗြောသံ ရုပ်ရှင်ဇာတ်ကားနဲ့ အကောင်းဆုံး တေးဂီတဆု၊ နတ်ဝင်သည် ရုပ်ရှင်ဇာတ်ကားနဲ့ အကောင်းဆုံး တည်းဖြတ်ဆု၊ ပန်းမြိုင်လယ်ကဥယျာဉ်မှူး ရုပ်ရှင်ဇာတ်ကားနဲ့ အကောင်းဆုံး အသံဆု၊ နှင်းပွင့်စေရာ ရုပ်ရှင်ဇာတ်ကားနဲ့ ဒါရိုက်တာ JZ ဒေါင်လွဏ်း အထူးဆုရရှိမယ်လို့ သတင်းထွက်ပေါ်နေပြန်ပါတယ်။

သတင်းပေါက်ကြားနေတဲ့အပေါ် အကယ်ဒမီဆု ရွေးချယ်စိစစ်ရေးဘက်ကတော့ အဲဒီ ပေါက်ကြားနေတယ် ဆိုတဲ့စာရင်းဟာ ခန့်မှန်းချက်တွေပဲဖြစ်တယ်လို့လည်း ပြန်လည်တုံ့ပြန် ပြောဆိုနေတာ တွေ့ရပါတယ်။