မန္တလေးမြို့မှာ အတုအယောင်ရွေးကောက်ပွဲကို ဆန့်ကျင်ဆန္ဒပြခဲ့တဲ့ မန္တလေး လူထုသပိတ်လှုပ်ရှားမှုခေါင်းဆောင်တယောက် ဖြစ်တဲ့ ကိုထက်မြတ်အောင်ဟာ စစ်ကောင်စီရဲ့ ဖမ်းဆီးတာခံထားရလို့ အသက်အန္တရာယ် အထူးစိုးရိမ်နေရတယ်လို့ သိရပါတယ်။
အာဏာရှင်စနစ် ဆန့်ကျင်ရေး ပြည်သူ့အင်အားများ ချိတ်ဆက် ညှိနှိုင်းရေးကော်မတီ (မန္တလေး) (AFCC-MDY)၊ ရတနာပုံတက္ကသိုလ်ကျောင်းသားများသမဂ္ဂ (ရ.တ.က.သ)နဲ့ အထွေထွေသပိတ် ပေါင်းစပ်ညှိနှိုင်းရေးအင်အားစု (GSCB)တို့က ဒီဇင်ဘာ ၁၇ ရက် ညမှာ အရေးပေါ် ပူးတွဲသတင်း ထုတ်ပြန်လာတာပါ။
GSCB အဖွဲ့ဝင် မအေးမြင့်အောင်အောင်က “ကျနော်တို့ နောက်ဆုံး သူနဲ့ အဆက်အသွယ်ရတာက ဒီဇင်ဘာ ၁၄ ရက်နေ့ပေါ့နော်။ ၁၄ ရက်နေ့ ညကတည်းက သူနဲ့ တောက်လျှောက် အဆက်အသွယ် ပြတ်တောက်သွားတယ်။ အဲဒီကတည်းက ကျနော်တို့ ကိုထက်မြတ်အောင် ဖမ်းခံရတယ်ဆိုတာကို နည်းမျိုးစုံနဲ့ လိုက်ပြီးတော့ အတည်ပြုတယ်။ ဖမ်းခံရပြီဆိုတာကို ကျနော်တို့ ကွန်ဖန်းဖြစ်ပြီဆိုမှပဲ သတင်းထုတ်တယ်။ စစ်ကောင်စီက သူ့ကို နည်းမျိုးစုံနဲ့ နှိပ်စက်မှာ၊ စိတ်ပိုင်းဆိုင်ရာရော ရုပ်ပိုင်းဆိုင်ရာရော နှိပ်စက်မှာကို စိတ်ပူတယ်။ တဖက်မှာ လက်လွတ်စပယ် သတ်ဖြတ်တဲ့ကိစ္စတွေကို စိတ်ပူတယ်။ ဒါကြောင့်မို့ ကျနော်တို့အနေနဲ့ နိုင်ငံတကာသံရုံးတွေ၊ သတင်းမီဒီယာတွေကိုလည်း ဆက်သွယ်တယ်”လို့ ပြောပါတယ်။
အသက် ၂၄ နှစ်အရွယ် ကိုထက်မြတ်အောင်ဟာ ကျန်းမာရေး အထူးကောင်းမွန်ပြီး စစ်အုပ်စုက ဖမ်းဆီးတုန်းမှာ ပြင်းပြင်းထန်ထန် အကြမ်းဖက် ရိုက်နှက်ထိုးကြိတ်ခံခဲ့ရတဲ့အပြင် အခုတော့ သူ့ရဲ့ အသက်အန္တရာယ်အတွက်ပါ အလွန်အမင်းစိုးရိမ်ပူပန်ရတဲ့ အခြေအနေဖြစ်နေတာကို သိရှိရတယ်လို့ ဆိုပါတယ်။
သူဟာ ရတနာပုံတက္ကသိုလ် ကျောင်းသားများသမဂ္ဂရဲ့ ဥက္ကဋ္ဌတာဝန် ထမ်းဆောင်ခဲ့တဲ့ ကျောင်းသားခေါင်းဆောင်တယောက် ဖြစ်သလို အာဏာရှင်စနစ်ဆန့်ကျင်ရေး ပြည်သူ့အင်အားများ ချိတ်ဆက်ညှိနှိုင်းရေးကော်မတီ (မန္တလေး) (AFCC-MDY) နဲ့ အထွေထွေသပိတ် ပေါင်းစပ်ညှိနှိုင်းရေးအင်အားစု (GSCB) တို့ရဲ့ အဖွဲ့ဝင်တယောက်လည်း ဖြစ်ပါတယ်။
စစ်အာဏာရှင်စနစ်ဆန့်ကျင်ရေးအတွက် သူ့ယုံကြည်ချက်နဲ့ သဘောထားဆန္ဒကို အကြမ်းမဖက် ငြိမ်းငြိမ်းချမ်းချမ်း ရဲရဲရင့်ရင့် ထုတ်ဖော်ပြသခဲ့တဲ့ သူ့ရဲ့ ကျန်းမာရေးနဲ့ အသက်အန္တရာယ် ထိခိုက်ယိုယွင်းတာ တစုံတရာဖြစ်ပေါ်ခဲ့ရင် စစ်အုပ်စုက လုံးဝ တာဝန်ယူ၊ တာဝန်ခံရမယ်လို့လည်း ထုတ်ပြန်ချက်မှာ ဖော်ပြထားပါတယ်။
သူဟာ ဒီဇင်ဘာ ၃ ရက်က မန္တလေးမှာ ဒေါက်တာတေဇာဆန်းတို့နဲ့အတူ စစ်ကောင်စီ လုပ်မဲ့ရွေးကောက်ပွဲကို ဆန္ဒပြခဲ့ကြပြီး သူတို့ ၁၀ ယောက်ကို စစ်ကောင်စီက အမှုဖွင့်ထားပါတယ်။
