ကမ္ဘာကျော်ရုပ်ရှင်တွေဖြစ်တဲ့ Star Wars ၊ Spider Man နဲ့ Elf ဇာတ်ကားတွေမှာ ပါဝင်တဲ့ အသုံးအဆောင်ပစ္စည်းတွေကို လာမယ့် ဒီဇင်ဘာလမှာ လေလံတင်ရောင်းချမှာဖြစ်ပါတယ်။
အမှတ်တရပစ္စည်းပေါင်း ၁,၃၅၀ ကျော်ကို ပေါင် ၈ သန်းဝန်းကျင်နဲ့ ရောင်းချမှာဖြစ်ပြီး ဒီဇင်ဘာ ၅ ရက်ကနေ ၇ ရက်အထိ Propstore ရဲ့ ဆောင်းရာသီအမှတ်တရလေလံပစ္စည်း ရောင်းချမယ့် အစီအစဉ်မှာ ထည့်သွင်းထားပါတယ်။
အဲ့ဒီအထဲမှာ ၁၉၈၀ ပြည့်နှစ်က ထွက်ရှိခဲ့တဲ့ Star Wars: The Empire Strikes Back ဇာတ်ကားမှာ ဘော့ဘာဖိရဲ့ ရိုင်ဖယ်သေနတ်လည်း ပါဝင်ပြီး ပေါင် ၃၅၀,၀၀၀ ကနေ ၇၀၀,၀၀၀ အထိ ရောင်းချဖွယ်ရှိပါတယ်။
၁၉၈၃ ခုနှစ်က ထွက်ရှိခဲ့တဲ့ Return of the Jedi ဇာတ်ကားမှာပါဝင်တဲ့ ခေါင်းဆောင်းနဲ့ Stromtropper E-11 သေနတ်လည်း လေလံမှာပါဝင်မှာဖြစ်ပါတယ်။
Indiana Jones and the Temple of Doom ဇာတ်ကားမှာ သရုပ်ဆောင်တဲ့ ဟာရီဆင်ဖို့ဒ်ရဲ့ အညိုရောင် ဦးထုပ်လည်း ဒီလေလံပွဲမှာ ပါဝင်မှာပါ။
ဒါ့အပြင် ခရစ်စမတ်ရုပ်ရှင်ဖြစ်တဲ့ Elf ဇာတ်ကား ဇာတ်ကောင် ဖာရယ်ရဲ့ အစိမ်းရောင်ဝတ်စုံလည်း လေလံတင်မှာဖြစ်ပြီး Spider-Man 3 ဇာတ်ကားရဲ့ အနက်ရောင်ဝတ်စုံလည်း ပါဝင်မှာဖြစ်ပါတယ်။
ရုပ်ရှင်သရုပ်ဆောင် တိုဘီမက်ဂွိုင်းယားဝတ်ဆင်ခဲ့တဲ့ စူပါဟီးရိုးဝတ်စုံဖြစ်တဲ့ Spider Man ဝတ်စုံကလည်း လူတွေစိတ်ဝင်စားတဲ့ ဝတ်စုံဖြစ်ပါတယ်။
ဒီလေလံပွဲမှာ Back to the Future ဇာတ်ကားမှာပါတဲ့ မာတီမက်ဖလိုင်းရဲ့ ဟိုဗာဘုတ်လည်း ပါဝင်ကာ The Red Shoes ဇာတ်ကားမှာပါတဲ့ ဘဲလေးဖိနပ်လည်း ပါဝင်မှာဖြစ်ပါတယ်။
Source: Reuters
