ရခိုင်ပြည်နယ်နဲ့ မလေးရှားနိုင်ငံဆီကိုပို့မယ့် မူးယစ်ဆေးဝါး တန်ဖိုးငွေကျပ် သန်းပေါင်း ၁၂၀,၀၀၀ လောက်ကို ဧရာဝတီတိုင်း၊ ပုသိမ်မြို့မှာဖမ်းဆီးမိတယ်လို့ စစ်ကောင်စီ ပြန်ကြားရေးသတင်းမှာ နိုဝင်ဘာ ၁၈ ရက်ညက ဖော်ပြပါတယ်။
လုံခြုံရေးတပ်ဖွဲ့ဝင်တွေရဲ့သတင်းရယူဖော်ထုတ်ချက်တွေအရ နိုဝင်ဘာ ၅ ရက် ညပိုင်းက ပုသိမ်မြို့နယ်၊ ၁ ရပ်ကွက်က ဂိုဒေါင်ရဲ့ မြေအောက်ခန်းမှာ ဖွက်ထားတဲ့ အိုက်စ် (ICE) မူးယစ်ဆေးဝါး ၄,၀၀၀ ကီလိုဂရမ်နဲ့အတူ AA ရဲ့ ထောက်ပံ့ရေးတာဝန်ခံ ခင်ထွန်း၊ ပုသိမ်မြို့မှာ မူးယစ်ဆေးဝါးတွေ ထိန်းသိမ်းပေးသူ လမင်းခန့် တို့ကို ဖမ်းဆီးရမိခဲ့တယ်လို့ ဆိုပါတယ်။
ဖော်ထုတ်ချက်အရ နိုဝင်ဘာ ၆ ရက်က ရန်ကုန်တိုင်း၊ လမ်းမတော်မြို့နယ်က ရွှေလမင်းဆေးရုံ၊ ပုသိမ်မြို့နယ်၊ ၉ ရပ်ကွက်၊ ထင်းပုံဆိပ်ကျေးရွာတို့ကနေ ဆက်စပ်သူ ၂ ယောက်ကို ဖမ်းမိသလို တနင်္သာရီတိုင်း၊ ကျွန်းစုမြို့နယ်၊ မအိုင်ကျေးရွာအုပ်စုမှာ မူးယစ်ဆေးတွေသယ်ရာမှာသုံးတဲ့ ကုန်တင်သင်္ဘော ၁ စင်းနဲအတူ လှေလုပ်သား ၁၀ ယောက်၊ ချောင်းသာမြို့၊ အမှတ် ၃ ရပ်ကွက်နဲ့ အမှတ် ၂ ရပ်ကွက်၊ ပုသိမ်မြို့နယ်၊ သလပ်ခွာကျေးရွာအုပ်စု၊ မော်တော်ကုန်းကျေးရွာ၊ မြိတ်မြို့၊ နောက်လယ်ရပ်ကွက်၊ ပိတောက်ရွှေဝါလမ်းတို့ကနေ ဆက်စပ်သူ ၃ ယောက် တို့ကို ဖမ်းမိခဲ့တယ်လို့ ဆိုပါတယ်။
နိုဝင်ဘာ ၇ ရက်မှာလည်း မူးယစ်ဆေးတွေသယ်ရာမှာသုံးတဲ့ MV ရွှေဝတီ ကုန်တင်သင်္ဘောကို ဆိပ်ကြီးခနောင်တိုဆိပ်ကမ်းက လွန်းကျင်းမှာ၊ မူးယစ်ဆေးဝါးတွေကို ပုသိမ်မြို့ကနေ မလေးရှားနိုင်ငံကိုပို့ဆောင်ခိုင်းသူ ဘောဇဝတီ ဆန်လုပ်ငန်းနဲ့ Utopia Future အိမ်ခြံမြေ ရောင်းဝယ်ရေးလုပ်ငန်းလုပ်ကိုင်သူ မောင်ငယ်ကို ရန်ကုန်အပြည်ပြည်ဆိုင်ရာလေဆိပ်မှာ ဖမ်းဆီးမိတယ်လို့ ဖော်ပြပါတယ်။
နိုဝင်ဘာ ၈ ရက်မှာလည်း ဧရာဝတီတိုင်း၊ ရွှေသောင်ယံမြို့၊ အမှတ် ၂ ရပ်ကွက်မှာ လှေလုပ်သား ၂ ယောက်၊ နိုဝင်ဘာ ၉ ရက်နေ့က မြိတ်မြို့၊ နောက်လယ်ရပ်ကွက်မှာ ဆက်စပ်သူ တယောက်တို့ကို ဆက်ဖမ်းမိတယ်လို့ ဆိုပါတယ်။
မူးယစ်ဆေးဝါးတွေပို့ခိုင်းသူ အားဝေ (ခ) ရှောက်ထန် (ခ) သန်းမောင် ရဲ့ တာချီလိတ်မြို့ကအိမ်ကို နိုဝင်ဘာ ၁၁ ရက်က သွားရောက်ရှာဖွေရာမှာ အမေရိကန်နိုင်ငံထုတ် M-4,A-1 သေနတ် ၁ လက်၊ ကျည်အိမ် ၂ ခု၊ ၅ ဒသမ ၅၆ ကျည် ၂၆ တောင့်၊ အီတလီနိုင်ငံထုတ် BERETTA အမျိုးအစား ပစ္စတို ၁ လက်၊ ကျည်အိမ် ၁ ခု၊ အမေရိကန်နိုင်ငံထုတ် SIG SAUER အမျိုးအစား ပစ္စတိုသေနတ် တလက်၊ ကျည်အိမ် ၂ ခု ကို သိမ်းဆည်းရမိပြီး လူကိုတော့ မမိဘူးလို့ ဆိုပါတယ်။
နိုဝင်ဘာ ၁၆ ရက်မှာလည်း ကျောင်းကုန်းမြို့နယ်၊ ၁ ရပ်ကွက်၊ ဌာနလမ်း၊ ပုသိမ်မြို့၊ ၃ ရပ်ကွက်၊ မြကျွန်းသာအိမ်ရာက ရွှေမင်းသမီးဟိုတယ်တို့ကနေ ဆက်စပ်သူ ၂ ယောက်ကို ထပ်ဖမ်းမိတာကြောင့် လူ ၂၄ ယောက်ကို ဖမ်းထားတယ်လို့ ဖော်ပြပါတယ်။
စစ်ကောင်စီဟာ ရခိုင်ပြည်နယ်ကိုပို့မယ့် မူးယစ်ဆေးတွေနဲ့ပတ်သက်ရင် AA နဲ့ ဆက်စပ်ပတ်သက်တယ်လို့ မကြာခဏဖော်ပြလေ့ရှိပြီး AA ကတော့ ဒါကို ငြင်းဆိုထားပါတယ်။
