စစ်ကောင်စီတပ်က ပြည်သူ့သဘောဆန္ဒမပါဘဲ လုပ်မယ့် အတုအယောင်ရွေးကောက်ပွဲကို ဆန့်ကျင်ကြဖို့အတွက် ကမ်ပိန်းတခုကို အောက်တိုဘာ ၃၁ ရက်က ကယန်းဒေသတနေရာမှာ ပြုလုပ်ခဲ့တယ်လို့ ဖယ်ခုံမြို့နယ် အခြေခံပညာကျောင်းသားများသမဂ္ဂက နိုဝင်ဘာ ၁ ရက်မှာ ထုတ်ပြန်ပါတယ်။
ဖယ်ခုံမြို့နယ် အခြေခံပညာကျောင်းသားများသမဂ္ဂအမှုဆောင်တယောက်က “အတုအယောင် ရွေးကောက်ပွဲလို့ပဲ မြင်ပါတယ်။ သူတို့အကျိုးစီးပွားကို ဆက်လက်ကာကွယ်ဖို့ အစိုးရလုပ်ချင်လို့ ဒီရွေးကောက်ပွဲနည်းလမ်းကို သုံးတယ်လို့ မြင်မိပါတယ်။ ကျောင်းသားထု၊ ပြည်သူလူထုကို ဟောပြောပွဲတွေ၊ ရွေးကောက်ပွဲဆန့်ကျင်ရေး လက်ကမ်းစာစောင်တွေ လိုက်လံဝေမျှတာတွေ လုပ်ပါတယ်” လို့ ပြောပါတယ်။
စစ်ကောင်စီတပ်က ကရင်နီပြည်နယ်ထဲက မြို့နယ် ၇ ခုမှာ ရွေးကောက်ပွဲလုပ်မယ်လို့ သြဂုတ် ၁၅ ရက်က ကြေညာခဲ့ပေမယ့် မြို့နယ် ၄ ခုမှာပဲ ရွေးကောက်ပွဲ လုပ်နိုင်တော့မယ်လို့ ဆိုပါတယ်။
လွိုင်ကော်မြို့နယ်နဲ့ ဘောလခဲမြို့နယ်မှာ ပထမအဆင့် ရွေးကောက်ပွဲကို ဒီဇင်ဘာလထဲ ပြုလုပ်ပြီး ဒီးမော့ဆိုမြို့နယ်နဲ့ ဖရူဆိုမြို့နယ်မှာတော့ လာမယ့်နှစ် ဇန်နဝါရီလထဲမှာ ဒုတိယအဆင့် ရွေးကောက်ပွဲအနေနဲ့ ပြုလုပ်သွားမယ်လို့ အောက်တိုဘာလထဲမှာ စစ်တပ်က ထုတ်ပြန်ထားပါတယ်။
ဖယ်ခုံမြို့နယ် အခြေခံပညာကျောင်းသားများသမဂ္ဂအမှုဆောင်တယောက်က “ဒီးမော့ဆိုမြို့ ရွေးကောက်ပွဲလုပ်ဖို့ ကြေညာချက်မှာ ပါတယ်။ ဒါပေမဲ့ သူတို့လုပ်နိုင်တဲ့ အခြေအနေမရှိပါဘူး” လို့ ပြောပါတယ်။
ကရင်နီပြည်ထဲမှာ ရွေးကောက်ပွဲလုပ်မယ်လို့ ကြေညာထားပေမယ့် စစ်ကောင်စီတပ်နဲ့ တော်လှန်ရေးအင်အားစုတွေကြား ထိတွေ့တိုက်ပွဲတွေ ဆက်တိုက်ဖြစ်ပွားနေပြီး စစ်မျက်နှာ ၅ ခုထက်မနည်း ရှိနေတယ်လို့ မြေပြင်ရဲဘော်တွေက ပြောပါတယ်။
