DVB

ကရင်နီပြည်နယ်၊ လွိုင်ကော်အကျဉ်းထောင်မှာ အောက်တိုဘာလထဲ နိုင်ငံရေးအကျဉ်းသား ၃ ယောက် လွှတ်ပေးပေမဲ့ ၃ ‌ယောက်ထဲက တယောက်ကိုတော့ တခြားအမှုတခုတပ်ပြီး ရဲစခန်းမှာ ပြန်ဖမ်းထားတယ်လို့ နိုင်ငံရေးအကျဉ်းသားများအစည်းအရုံး (KPPA) အဖွဲ့ တာဝန်ရှိသူက အောက်တိုဘာ ၃၀ ရက်မှာ ပြောပါတယ်။

အောက်တိုဘာ ပထမအပတ်မှာ ၅၀/၂ ပုဒ်မနဲ့ နိုင်ကျဉ်းတယောက်၊ တတိယအပတ်မှာ ၅၀/၂ ပုဒ်မနဲ့ နိုင်ကျဉ်းတယောက်၊ စတုတ္ထအပတ်မှာ ၁၇/၁၊ ၅၀၅(က) နဲ့ နိုင်ကျဉ်းတယောက်တို့ လွတ်ရက်စေ့လို့ လွတ်ပေမဲ့ စတုတ္ထအပတ်က လွတ်တဲ့ နိုင်ကျဉ်းကတော့ နောက်အမှုတခုနဲ့ အမှုထပ်တပ်ခံရပြီး ရဲစခန်းမှာ ဖမ်းခံထားရတယ်လို့ သိရပါတယ်။

KPPA တာဝန်ရှိသူတယောက်က “၁၇/၁၊ ၅၀၅(က) တယောက်က သူက လွတ်ပြီ၊ လွတ်ပြီဆိုသော်လည်း သူ့ကို အမှုထပ်စွဲဖို့အတွက် ရဲစခန်းမှာ ထိန်းသိမ်းထားတဲ့ အခြေအနေ ရှိတာပေါ့နော်။ လောလောဆယ်ကတော့ ဘာအမှုနဲ့စွဲတယ် ဆိုတာ မသိရသေးဘူး” လို့ ပြောပါတယ်။

လွိုင်ကော်အကျဉ်းထောင်မှာ နိုင်ငံရေးအကျဉ်းသား ၁၅၄ ယောက်၊ အကျဉ်းသူ ၂၁ ယောက် အကျဉ်းကျခံနေရပြီး နိုင်ငံရေးအကျဉ်းသားတွေက ခုလက်ရှိအချိန်အထိ ထောင်ဝင်စာ ဧည့်တွေ့ခွင့် မရဘူးလို့ ဆိုပါတယ်။

အကျဉ်းထောင်အတွင်းမှာ ဆန်ပြုတ်၊ ပဲဟင်းနဲ့ ငပိ၊ အထူးရက်တွေမှာ ငါးခြောက်တို့ကိုပဲ စားရပြီး အသီးအရွက်အပင်တွေကို အကျဉ်းသားတွေက စိုက်ပျိုးနေရပေမဲ့ ရိတ်သိမ်းချိန်မှာတော့ ထောင်ပိုင်က အကျဉ်းသားတွေကို ပြန်ရောင်းစားတာတွေ ရှိနေတယ်လို့ သိရပါတယ်။

၂၀၂၅ ခုနှစ် မတ်လထဲမှာလည်း နိုင်ငံရေးအကျဉ်းသူတယောက်နဲ့ အကျဉ်းသား ၃ ယောက်တို့ လွတ်ရက်စေ့ပေမဲ့ ရဲစခန်းမှာပဲထားပြီး အကြမ်းဖက်ပုဒ်မတွေနဲ့ ထောင်ထဲ ပြန်ဖမ်းထားတာတွေ ရှိတယ်လို့ KPPA ကတဆင့် သိရပါတယ်။