မန္တလေးတိုင်း၊ စဉ့်ကူးမြို့နားမှာ အောက်တိုဘာ ၁၆ ရက် ဒီမနက် ၁၁ နာရီ ၇ မိနစ်က ငလျင်တခု လှုပ်ခတ်သွားတယ်လို့ အမျိုးသားညီညွတ်ရေးအစိုးရ၊ လူသားချင်းစာနာထောက်ထားရေးနဲ့ ဘေးအန္တရာယ်ဆိုင်ရာ စီမံခန့်ခွဲရေးဝန်ကြီးဌာနက ထုတ်ပြန်ပါတယ်။
စဉ့်ကူးမြို့နယ်၊ လက်ပန်လှရွာနားမှာ မြေအောက်အနက် ၁၀ ကီလိုမီတာကိုဗဟိုပြုပြီး ရစ်ချ်တာစကေး ၄ ဒသမ ၆ အဆင့်၊ အင်အားအတော်အသင့်ရှိတဲ့ ငလျင်လှုပ်ခဲ့တာလို့ ဆိုပါတယ်။
ငလျင်အန္တရာယ်ကြောင့် ထိခိုက်ဆုံးရှုံးတာတွေ လျော့နည်းစေဖို့ ဆောင်ရန်၊ ရှောင်ရန်၊ သတိပြုရန်တွေနဲ့အညီ နေထိုင်ကြဖို့နဲ့ မြေငလျင်တိုင်းတာစက်တွေကသုံးတဲ့ စကေးနဲ့ တိုင်းတာတဲ့ နည်းလမ်းတို့အပေါ်မူတည်ပြီး ငလျင်အင်အားပမာဏ နည်းနည်းကွာနိုင်တယ်လို့လည်း ထုတ်ပြန်ဖော်ပြထားပါတယ်။
စစ်ကောင်စီဩဇာခံ မိုးလေဝသဌာနကလည်း အင်အားပြင်းစစ်ကိုင်းငလျင်ကြီးရဲ့ နောက်ဆက်တွဲ ငလျင်အဖြစ် ဒီမနက် ၁၁ နာရီ ၇ မိနစ်က မန္တလေးတိုင်း၊ တံတားဦးမြို့ရဲ့ အရှေ့မြောက်ဘက် ၃ မိုင်လောက်အကွာကို ဗဟိုပြုပြီး အင်အား ၃ ဒသမ ၈ ရစ်ချ်တာစကေးနဲ့ လှုပ်ခတ်သွားတယ်လို့ ထုတ်ပြန်ပါတယ်။
အောက်တိုဘာ ၁၃ ရက် နေ့လယ် ၁၂ နာရီ ၁၀ မိနစ်ကလည်း စစ်ကိုင်းတိုင်း၊ မင်းကင်းမြို့နားမှာ မြေအောက်အနက် ၉၀ ကီလိုမီတာကိုဗဟိုပြုပြီး ရစ်ခ်တာစကေး ၄ ဒသမ ၆ အဆင့် ငလျင်လှုပ်ခတ်ခဲ့တယ်လို့ အမျိုးသားညီညွတ်ရေးအစိုးရ၊ လူသားချင်းစာနာထောက်ထားရေးနဲ့ ဘေးအန္တရာယ်ဆိုင်ရာ စီမံခန့်ခွဲရေးဝန်ကြီးဌာနက ထုတ်ပြန်ပါတယ်။
