မန်ယူနိုက်တက် ပူးတွဲပိုင်ရှင် ဆာဂျင်ရတ်ကလစ်ဖ်နဲ့ နည်းပြအာမိုရင်တို့ဟာ မန်ချက်စတာမှာ တွေ့ဆုံဆွေးနွေးခဲ့ကြတယ်လို့ သိရပါတယ်။

ဆာဂျင်ရတ်ကလစ်ဖ်ဟာ စက်တင်ဘာ ၁၈ ရက်က ရဟတ်ယာဉ်နဲ့ မန်ချက်စတာဆီ သွားရောက်ခဲ့ပြီး အသင်းရဲ့ အနာဂတ်ကိစ္စတွေကို ဆွေးနွေးခဲ့တယ်လို့ သိရပါတယ်။

မန်ယူအသင်းဟာ အခုနှစ်အပြောင်းအရွှေ့မှာ ပေါင်သန်း ၂၀၀ ကျော် ငွေကြေးသုံးစွဲခဲ့ပေမဲ့ မျှော်မှန်းသလောက် မဖြစ်ခဲ့ဘဲ ပရီးမီးယားလိဂ် ၄ ပွဲ ကစားအပြီးမှာ နိုင်ပွဲတပွဲသာရခဲ့ပြီး အဆင့် ၁၅ မှာ ရပ်တည်နေတာပါ။

မန်ယူပူးတွဲပိုင်ရှင်အနေနဲ့ လက်ရှိအသင်းရဲ့ ရလဒ်ပိုင်း ဆိုးရွားမှုနဲ့ နည်းပြ အာမိုရင်ရဲ့ အနာဂတ်ကိစ္စအပေါ် ဆွေးနွေးတာမျိုး ရှိနိုင်ပေမဲ့ နည်းပြအာမိုရင်နဲ့ တွေ့ဆုံမှုဟာ အရင်ကတည်းက ကြိုတင်စီစဉ်ထားတာဖြစ်ကြောင်း The Athletic သတင်းမှာ ဖော်ပြပါတယ်။