ပီအက်စ်ဂျီအသင်းနည်းပြ လူးဝစ်အင်နရီကေးဟာ စက်ဘီးစီးရင်း မတော်တဆဖြစ်ခဲ့လို့ ခွဲစိတ်ကုသမှု ခံယူခဲ့ရပါတယ်။
အသက် ၅၅ နှစ်ရှိ စပိန်လူမျိုးနည်းပြဟာ စက်ဘီးစီးတာ ဝါသနာပါသူဖြစ်ပြီး စက်တင်ဘာ ၅ ရက်က မတော်တမှုဖြစ်ခဲ့တာပါ။
စက်ဘီးမတော်တဆမှုကြောင့် လည်ညှပ်ရိုးကျိုးသွားခဲ့ပြီး ခွဲစိတ်ကုသမှုခံယူခဲ့ရတာပါ။
ပီအက်စ်ဂျီအသင်းဘက်ကလည်း နည်းပြအင်နရီကေး ခွဲစိတ်ကုသမှုခံယူခဲ့ရကြောင်း ၊အမြန်ဆုံးပြန်လည် သက်သာပါစေကြောင်းနဲ့ ဘယ်လောက်အထိ အနားယူရမလဲဆိုတာ ဆက်လက် ထုတ်ပြန်ပေးမှာဖြစ်ကြောင်း သတင်းထုတ်ပြန်ပါတယ်။
ပီအက်စ်ဂျီအသင်းဟာ နိုင်ငံတကာပွဲစဉ်တွေအပြီးမှာ လန်းစ်နဲ့ လီဂူးဝမ်းပွဲကစားရဖို့ ရှိသလို ချန်ပီယံလိဂ်အဖွင့်မှာ အက်တလန်တာနဲ့လည်း ကစားရမှာပါ။
လည်ညှပ်ရိုးကျိုးဒဏ်ရာက ၆ ပတ်ကနေ ၈ ပတ်အထိ အနားယူရနိုင်ပြီး အကာအကွယ်ပစ္စည်းကိရိယာတပ်ဆင်ထားဖို့လည်း လိုအပ်တာကြောင့် အသင်းကို ကွင်းထဲကနေ တာဝန်ယူဖို့ အချိန်ယူရယူနိုင်ကြောင်း သတင်းတွေမှာ ဖော်ပြကြပါတယ်။
Photo: Reuters
