ဂါဇာကမ်းမြောင်ဒေသမှာ အခြေအနေတွေ ဆိုးရွားနေပြီး တိုးတက်မှုမရှိရင် အငတ်ဘေးကို ကုလသမဂ္ဂ ကမ္ဘာ့စားနပ်ရိက္ခာအစီအစဉ် (WFP) က တရားဝင်ကြေညာနိုင်တယ်လို့ တာဝန်ရှိသူတယောက်က ပြောပါတယ်။

အဲဒီနေ့မှာ ထုတ်ပြန်ခဲ့တဲ့ ဘက်စုံပေါင်းစည်းထားတဲ့ စားနပ်ရိက္ခာဖူလုံရေး အဆင့်သတ်မှတ်ချက် အစီရင်ခံစာအရ ဂါဇာမှာ အငတ်ဘေးအဆင့် ၃ ခုအနက် ၂ ခုဖြစ်တဲ့ အစားအစာစားသုံးမှု ကျဆင်းခြင်းနဲ့ ပြင်းထန်တဲ့ အာဟာရချို့တဲ့မှုကို စောင့်ကြည့်လေ့လာထားပါတယ်။

ဂါဇာမှာ စားနပ်ရိက္ခာ ခေါင်းပါးမှုဟာ အာဟာရချို့တဲ့မှုကြောင့် သေဆုံးမှုတွေနဲ့ သက်ဆိုင်တဲ့ တတိယညွှန်ပြချက်အဖြစ်တော့ မကြေညာနိုင်သေးဘူးလို့ အစီရင်ခံစာမှာ ဖော်ပြထားပါတယ်။

ဒါပေမဲ့ ကျယ်ကျယ်ပြန့်ပြန့် ငတ်မွတ်ခေါင်းပါးမှု၊ အာဟာရချို့တဲ့မှုနဲ့ ရောဂါတွေဟာ ငတ်မွတ်မှုနဲ့ ဆက်နွှယ်တဲ့ သေဆုံးမှုနှုန်းကို မြင့်တက်စေတယ်ဆိုတဲ့ အထောက်အထားတွေ တိုးပွားလာနေပါတယ်။

ဂါဇာကမ်းမြောင်ဒေသမှာ လူ ၃ ယောက်မှာ တယောက်ထက်မကတဲ့ လူတွေဟာ ရက်ပေါင်းများစွာ အစာမစားဘဲ ရှိနေကြပြီး ဂါဇာလူဦးရေရဲ့ ၄ ပုံ ၁ ပုံ နီးပါးဖြစ်တဲ့ လူ ၅၀၀,၀၀၀ ကျော်ဟာ “အစာရေစာ ခေါင်းပါးမှုလို အခြေအနေ” ကို ကြံ့ကြံ့ခံ ရင်ဆိုင်နေကြရတယ်လို့ IPC က မှတ်ချက်ပြုခဲ့ပါတယ်။

ဧပြီလကစပြီး ပြင်းထန်တဲ့ အာဟာရချို့တဲ့နေတဲ့ ကလေးငယ်ပေါင်း ၂၀,၀၀၀ ကျော်ကို ဆေးရုံတွေက ကုသပေးခဲ့ပြီး ဇူလိုင်လလယ်ကစပြီး ငတ်မွတ်မှုနဲ့ပတ်သက်တဲ့ အကြောင်းရင်းတွေကြောင့် အနည်းဆုံး အသက် ၅  နှစ်အောက် ကလေး ၁၆ ယောက် သေဆုံးခဲ့တယ်လို့ IPC အချက်အလက်တွေက ဆိုပါတယ်။

မေလမှာ IPC ဟာ ငတ်မွတ်ခေါင်းပါးမှုနဲ့ သေဆုံးမှုတို့နဲ့ မှတ်သားထားတဲ့ IPC ရဲ့ အဆိုးရွားဆုံး အမျိုးအစားခွဲအဆင့်ဖြစ်တဲ့ အဆင့် ၅ မှာ အနည်းဆုံး လူတသန်းခွဲလောက်ရှိမယ်လို့ ခန့်မှန်းထားပါတယ်။

ဂါဇာက လူဦးရေတခုလုံးအတွက် ကပ်ဘေးအဆင့်က စက်တင်ဘာလမှာ ဆိုက်ရောက်မယ်လို့ ခန့်မှန်းထားပါတယ်။

WFP ရဲ့ စားနပ်ရိက္ခာဖူလုံရေးနဲ့ အာဟာရဆိုင်ရာ ခွဲခြမ်းစိတ်ဖြာမှုဆိုင်ရာ ဒါရိုက်တာ ယွန်းမာတင် ဘူဝယ်က ကုလသမဂ္ဂအတွင်းရေးမှူးချုပ် အန်တိုနီယိုဂူတာရက်စ်ရဲ့ ကြောက်ရွံ့စိုးရိမ်မှုကို ပဲ့တင်ထပ်ရင်း ဂါဇာဟာ အငတ်ဘေးကြုံနေရတယ်လို့ နောက်ဆုံးထုတ်ပြန်တဲ့ အစီရင်ခံစာထဲမှာ ဖော်ပြပါတယ်။

Source: Reuters