ပစ်ချခံရသည့် တိုက်လေယာဉ်နှင့်လေယာဉ်မှူး ၂ ဦး၏ ရုပ်အလောင်းအပိုင်းအစများ တွေ့ရှိ

ဖားဆောင်းမြို့မှာ ဖြစ်ပွားနေတဲ့ တိုက်ပွဲအတွင်း ဇူလိုင် ၂ ရက် မနက် ၁ နာရီလောက် ဗုံးလာကြဲတဲ့ စစ်ကောင်စီ တိုက်လေယာဉ် ၁ စီးအား ကရင်နီတပ်ပေါင်းစုံ တော်လှန်ရေးတပ်ဖွဲ့ဝင်တွေက ပစ်ချနိုင်ခဲ့တယ်လို့ ကရင်နီတပ်ပေါင်းစုံ စစ်ဦးစီးအဖွဲ့က ဒီနေ့ သတင်းထုတ်ပြန်ပါတယ်။

ဒီနေ့မနက်အစောပိုင်း ၁ နာရီလောက်မှာ ဗုံးလာကြဲတဲ့ တိုက်လေယာဉ် ၄ စီးထဲက တရုတ်နိုင်ထုတ် FTC-2000G အမျိုးအစား တိုက်လေယာဉ် ၁ စီးအား ပစ်ချနိုင်ခဲ့တယ်လို့ ဆိုပါတယ်။

အဆိုပါ ပျက်ကျသွားတဲ့ တိုက်လေယာဉ် ကိုယ်ထည်အပျက်အစီးတွေနဲ့အတူ လေယာဉ်မှူး ၂ ယောက်ရဲ့ ရုပ်အလောင်းအပိုင်းအစတွေကို ကရင်နီတပ်ပေါင်းစုံ တော်လှန်ရေးတပ်ဖွဲ့ဝင်တွေက ဇူလိုင် ၃ ရက် မွန်းလွဲ ၂ နာရီလောက် ဖားဆောင်းမြို့အနီး ရှာဖွေတွေ့ရှိခဲ့တယ်လို့ ထုတ်ပြန်ချက်မှာ ဖော်ပြထားပါတယ်။

ဖားဆောင်းမြို့ အခြေစိုက် စစ်ကောင်စီ ခလရ ၁၃၄ နဲ့ ခလရ ၁၃၅ တို့ကို ကရင်နီတပ်ပေါင်းစုံ တော်လှန်ရေးတပ်ဖွဲ့ဝင်တွေက ပြီးခဲ့တဲ့ ဇွန် ၂၅ ရက်က စတင်တိုက်ခိုက်ခဲ့ပြီး ဇွန် ၃၀ ရက်မှာ ခလရ ၁၃၄ ကို သိမ်းပိုက်နိုင်ခဲ့ပါတယ်။

အဆိုပါ တပ်ရင်း ၂ ခုကို စတင်ထိုးစစ်ဆင်တဲ့ နေ့ကစပြီး ဒီနေ့အထိ စစ်ကောင်စီက ဂျက်ဖိုက်တာအမျိုးမျိုးအပြင် Y12၊ FTC-2000G၊ Military Transport Aircraft တို့နဲ့ လေကြောင်းကနေ အပြင်းအထန် တိုက်ခိုက်နေတယ်လို့ ဆိုပါတယ်။

ကရင်နီတပ်ပေါင်းစုံ တော်လှန်ရေးတပ်ဖွဲ့ဝင်တွေအနေနဲ့ စစ်ကောင်စီရဲ့ လေကြောင်းတိုက်ခိုက်မှုတွေအပါအဝင် သာလွန်လက်နက်တွေ အသုံးပြု တိုက်ခိုက်နေတာကို အစွမ်းကုန် တန်ပြန် တိုက်ခိုက်သွားမယ်လို့ ထုတ်ပြန်ချက်မှာ ဖော်ပြထားပါတယ်။

စစ်အာဏာသိမ်းပြီးနောက်ပိုင်း စစ်ကောင်စီ လေတပ်ရဲ့ တိုက်လေယာဉ်၊ ရဟတ်ယာဉ် ၁၂ စီးကို တော်လှန်ရေးဘက်က ပစ်ချထားပါတယ်။