ရန်ကုန်၊ မင်္ဂလာဒုံမြို့နယ်၊ ထောက်ကြန့်က စစ်ကောင်စီတပ်ဖွဲ့ဝင်တွေရှိနေတဲ့ လုံခြုံရေးဘန်ကာကို ဇွန် ၁၃ ရက်၊ ည ၈ နာရီ မိနစ် ၂၀ လောက်က အဝေးထိန်းမိုင်း ၂ လုံးနဲ့ တိုက်ခိုက်ခဲ့ပြီး စစ်ကောင်စီဘက်က ထိခိုက်နိုင်တယ်လို့ Operation Flame OF တပ်ဖွဲ့က ပြောပါတယ်။

အမှတ် ၃ လမ်းမကြီးနဲ့ အမှတ် ၇ လမ်းဆုံက အဲဒီဘန်ကာဟာ အမြန်လမ်းဇီးရိုးမိုင် မရောက်ခင်မှာ အစစ်အဆေးများတဲ့နေရာဖြစ်ပြီး အဝေးပြေးကားတွေနဲ့ ကုန်တင်ကားတွေကို တရားမဝင် ငွေကြေးကောက်ခံနေတဲ့ နေရာဖြစ်ပါတယ်။

လုံခြုံရေးယူထားတဲ့ စစ်ကောင်စီတပ်ဖွဲ့ဝင် ၃ ယောက် ဘန်ကာအပြင်ဘက်ထွက်လာချိန်မှာ OF အဖွဲ့က ဖောက်ခွဲတိုက်ခိုက်ခဲ့တာဖြစ်ပြီး စစ်ဆင်ရေးအောင်မြင်သလို စစ်ကောင်စီ တပ်ဖွဲ့တယောက် လဲကျသွားတာ တွေ့ခဲ့ရတယ်လို့ ပြောပါတယ်။

Operation Flame OF အဖွဲ့ သတင်းပြန်ကြားတာဝန်ရှိသူက “အဝေးထိန်း ၂ လုံး သုံးခဲ့ပါတယ်။ ၁ လုံးပဲ ကောင်းကောင်းအောင်မြင်ခဲ့ပါတယ်။ ၁ လုံးက ပေါက်ကွဲအားနည်းသွားခဲ့ပါတယ်။ စစ်ခွေးအစောင့် ၃ ကောင် အပြင်ထွက်ချိန်ဆွဲလိုက်တာ ၁ ကောင်ပဲထိပြီး လဲကျသွားပါတယ်။ နောက်ဆက်တွဲ မြေပြင်ထောက်လှမ်းနေဆဲဖြစ်ပါတယ်။ ရဲဘော်အားလုံးပြန်ရောက်ပါပြီ။ ဘေးကင်းပါတယ်”လို့ ပြောပါတယ်။

ဒီတိုက်ခိုက်မှုဟာ ရန်ကုန်မြို့ပြပြောက်ကျားအဖွဲ့တခုဖြစ်တဲ့ Operation Flame OF အဖွဲ့ရဲ့ ၂၀၂၅ ခုနှစ်ထဲမှာ ၉ ကြိမ်မြောက် စစ်ဆင်ရေးဖြစ်ပြီး အဝေးထိန်းမိုင်းနဲ့ ဖောက်ခွဲတိုက်ခိုက်ခိုက်မှု ၇ ကြိမ်၊ လက်ပစ်ဗုံးနဲ့ ပစ်ခတ်တိုက်ခိုက်မှု ၂ ကြိမ် ရှိခဲ့ပါတယ်။

ပြီးခဲ့တဲ့ မေ ၂၁ ရက် မနက် ၁၀ နာရီလောက်ကလည်း သန်လျင်မြို့နယ်၊ မြို့ဟောင်းအနောက်ရပ်ကွက် သန်လျင်တံတားအဆင်း၊ လတ်မှတ်ဂိတ်မှတ်တိုင်အနီးမှာ ပြည်သူဆီကနေ ပိုက်ဆံတောင်းနေတဲ့ စစ်ကောင်စီတပ်ဖွဲ့ဝင်တွေနဲ့ ယာဉ်ထိန်းရဲတွေကို အဝေးထိန်းမိုင်းနဲ့ ဖောက်ခွဲတိုက်ခိုက်ခဲ့ပါသေးတယိ။

ဆက်လက်ပြီးတော့လည်း ရန်ကုန်တော်လှန်ရေးမဟာမိတ်အားလုံးနဲ့အတူ လက်တွဲပြီး အကြမ်းဖက်စစ်ကောင်စီကို အရှိန်မြင့်တိုက်ခိုက်ချေမှုန်းသွားမယ်လို့ အသိပေးထားပါတယ်။