တနင်္သာရီတိုင်း၊ ကော့သောင်းမြို့နယ်၊ ခမောက်ကြီးမြို့ ခမရ ၄၃၁ တပ်ရင်းက စစ်ကောင်စီတပ်သား တယောက် လက်နက်ခဲယမ်းနဲ့တကွ ထွက်ပြေးတိမ်းရှောင်လာပြီး ဘက်ပြောင်းခိုလှုံလာခဲ့တယ်လို့ မြိတ်ခရိုင်ပြည်သူ့ကာကွယ်‌ရေးတပ်ရင်း ၃ ရဲ့ ပြန်ကြားရေးတာဝန်ခံက ပြောပါတယ်။

ထွက်ပြေးလာတဲ့ တပ်သားဟာ အသက် ၂၂ နှစ်အရွယ် ကိုချစ်ကို ဖြစ်ပြီးတော့ စစ်မှုထမ်းအပတ်စဥ် ၈ အတွက် အတင်းအဓမ္မ ဖမ်းဆီးစုဆောင်းခံရကာ ပလောက်မြို့က တိုင်းဗဟိုအမှတ် ၁၂ တပ်မတော်တန်းမြင့်လေ့ကျင့်ရေးသင်တန်းကျောင်းမှာ အခြေခံစစ်သင်တန်း တလသင်ကြားပြီးနောက် ကော့သောင်းခမရ ၄၃၁ တပ်ရင်းကို ပို့ဆောင်ခံလိုက်ရတယ်လို့ ပြောပါတယ်။

ခမရ ၄၃၁ တပ်ရင်းကနေ မေ ၁၅ ရက်နေ့ညမှာ ထွက်ပြေးလာပြီးနောက် လက်နက်တွေနဲ့အတူ ဘက်ပြောင်းခိုလှုံလာခဲ့တယ်လို့ မြိတ်ခရိုင်ပြည်သူ့ကာကွယ်ရေးတပ်ရင်း ၃ ရဲ့ ပြန်ကြားရေးတာဝန်ခံက ပြောပါတယ်။

“သူက မြဝတီမှာ နေတယ်။ ပေါ်တာဆွဲခံရပြီး ပလောက်က တိုင်းဗဟို ၁၂ မှာ သင်တန်းတက်ရတာ တလလောက်ပဲ ရှိသေးတယ်။ ပြီးတော့ ခမရ ၄၃၁ ကနေ သိန်ခွန်းရှေ့တန်းကို ပါလာတာပါ။ သိန်ခွန်းရှေ့တန်းကို ပို့ခံရတော့ ထွက်ပြေးလာတာပါ။”

ကိုချစ်ကို ဆီပါလာတဲ့ MA-1အမျိုးအစားမောင်းပြန် ၁ လက်၊ ကျည် ၁၄၇ တောင့်နဲ့ကျည်ဘောက် ၃ ခုကို လွှဲပြောင်းရယူခဲ့ပြီးတော့ ထိုက်သင့်တဲ့ ဆုငွေတွေကိုလည်း ပေးအပ်ဖို့ စီစဥ်ထားတယ်လို့ သိရပါတယ်။

ပြီးခဲ့တဲ့ဧပြီ ၁၆ ရက်နေ့ကလည်း ကော့သောင်းခမရ ၄၃၁ တပ်ရင်းမှာ စစ်မှုထမ်းစုဆောင်းခံထားရသူ ၃ ယောက် ထွက်ပြေးလာပြီးတော့ တယောက်က ကော့သောင်းမြို့နယ် ပကဖအဖွဲ့ဆီ ဆက်သွယ်ခိုလှုံခဲ့တယ်လို့ သိရပါတယ်။

လက်ရှိ ထိတွေ့တိုက်ပွဲတွေ ဖြစ်နေတဲ့ ထုံခါ-မောတောင်ကားလမ်းပိုင်းက သိန်ခွန်း‌ရှေ့တန်းတိုက်ပွဲမှာ စစ်ကောင်စီဘက်က ၁၄ ယောက် တော်လှန်ရေးတပ်ဖွဲ့ဆီ ဘက်ပြောင်းခိုလှုံလာခဲ့တယ်လို့ မြိတ်ခရိုင်ပြည်သူ့ကာကွယ်ရေးတပ်ရင်း ၃ ဆီက သိရပါတယ်။