ရုရှားနိုင်ငံတောင်ပိုင်း ဒါဂစ္စတန်ဒေသ ရဲတပ်ဖွဲ့ကို သေနတ်သမားတွေက မေ ၅ ရက်မှာ ပစ်ခတ်မှုကြောင့် ရဲတပ်ဖွဲ့ဝင် ၃ ယောက် သေဆုံးပြီး အနည်းဆုံး လူ ၄ ယောက် ဒဏ်ရာရရှိခဲ့ကြောင်း ဒေသအာဏာပိုင်တွေက ပြောကြားခဲ့ပါတယ်။
ယာဉ်ထိန်းရဲတွေဟာ တိုက်ခိုက်သူတွေ မောင်းနှင်လာကြတဲ့ မော်တော်ကားကို လမ်းဘေးချ ရပ်ခိုင်းနေချိန်မှာပဲ ပစ်ခတ်မှု ဖြစ်ပွားခဲ့တာလို့ ဒါဂစ္စတန် ဒေသခေါင်းဆောင် ဆာဂျီ မဲလိကို့ဗ်က ပြောပါတယ်။
ဒီတိုက်ခိုက်မှုဟာ ဒေသမြို့တော် မာခက်ချ်ကာလာမြို့မှာ ဒေသစံတော်ချိန် နေ့လယ် ၂ နာရီ မိနစ် ၂၀ လောက်မှာ ဖြစ်ပွားခဲ့ကြောင်း ပြည်ထဲရေးဝန်ကြီးဌာနက ပြောကြားခဲ့ပါတယ်။
သေနတ်သမား ၂ ယောက် သေဆုံးခဲ့ကြောင်း မြို့တော် အုပ်ချုပ်ရေးမှူးရုံး ပြောရေးဆိုခွင့်ရှိသူက တယ်လီဂရမ်မှာ ရေးသားခဲ့ပြီး သူတို့တွေကို နာမည်ဖော်ထုတ်ခဲ့ကာ ၂၀၀၀ ခုနှစ် မွေးဖွားသူတွေ ဖြစ်တယ်လို့ ဆိုပါတယ်။
သေနတ်သမားတွေ ဘယ်နှယောက်လောက် ပါလာတယ် ဆိုတာတော့ ချက်ချင်း မသိရသေးဘဲ တခြားပြစ်မှုကျူးလွန်သူတွေကတော့ မော်တော်ကားနဲ့ ထွက်ပြေးသွားကြကြောင်း နိုင်ငံပိုင်မီဒီယာက ဖော်ပြပါတယ်။
သေနတ်သမား ၂ ယောက်၊ ရဲအရာရှိ ၂ ယောက်နဲ့ အသက် ၁၇ နှစ်အရွယ် မိန်းကလေးတယောက် အပါအဝင် ဒဏ်ရာရ အရပ်သား အများအပြားကို ဆေးရုံပို့ဆောင်ခဲ့ပြီး သူတို့ထဲက တယောက်ဟာ နောက်ပိုင်းမှာ သေဆုံးသွားခဲ့ကြောင်း နိုင်ငံပိုင်မီဒီယာက ဖော်ပြခဲ့ပါတယ်။ ဒီဖြစ်ရပ်နဲ့ပတ်သက်ပြီး အာဏာပိုင်တွေက ရာဇ၀တ်မှုနဲ့ အမှုဖွင့်ထားပါတယ်။
Source: Reuters
