အင်အားပြင်းငလျင်ကြီးကြောင့် မန္တလေးတိုင်း၊ အင်းဝ ရှေးဟောင်းနယ်မြေမှာ မှတ်တမ်းတင်ထားတဲ့ သမိုင်းဝင်ရှေးဟောင်းအဆောက်အအုံ ၇၅ ရာခိုင်နှုန်းလောက် ထိခိုက်ပျက်စီးခဲ့ရတယ်လို့ စစ်ကောင်စီ လက်အောက်ခံ ရှေးဟောင်းသုတေသနနဲ့ အမျိုးသားပြတိုက်ဦးစီးဌာနက နေသိရပါတယ်။

အရင်ကမတွေ့ခဲ့ရတဲ့ ၂ ထပ်စေတီတွေနဲ့ ၃ ထပ် လိုဏ်ဂူဘုရားတွေကိုလည်း မြေငလျင်ကြောင့် ပြိုကျတာမှာ တွေ့ခဲ့ရတယ်လို့ ဆိုပါတယ်။

မတ် ၂၈ ရက်ကလှုပ်ခဲ့တဲ့ အင်အားပြင်းငလျင်ကြောင့် မန္တလေးနဲ့ အင်းဝဒေသတို့က ရှေးဟောင်း အဆောက်အအုံတွေ ထိခိုက်ပျက်စီးခဲ့ရပြီး အရင်ကတော့ အင်းဝ ရှေးဟောင်းသုတေသနဇုန်မှာ ဘုရား၊ စေတီ၊ အုတ်ကျောင်းအများကြီးရှိတာကို စာရင်းကောက်ယူခဲ့ပေမဲ့ မျက်မြင် အနေအထားအရ ၂ ထပ်စေတီမရှိခဲ့ဘူးလို့ ထုတ်ပြန်ထားတာပါ။

ငလျင်ကြောင့်ထိခိုက်ပျက်စီးမှုစာရင်းကို ကောက်ယူရာမှာ ပြိုပျက်နေတဲ့စေတီတွေထဲက မူလစေတီငယ်ကိုငုံပြီး တည်ထားတဲ့ နှစ်ထပ်စေတီ ၁၃ ဆူကို စိစစ်တွေ့ခဲ့ရတယ်လို့ ဆိုပါတယ်။

သောတပန်ဘုရားအနီး အမှတ် ၉၃ စေတီမှာ ၁ ဆူ၊ ဒေါ်ဂျမ်းဘုရားစုအတွင်း အမှတ် ၃၁၆ နဲ့ ၃၁၈  မှာ ၂ ဆူ၊ အမှတ် ၂၁ ကြေးနီမုဌောမှာ ၁ ဆူ၊ မြသိန်းတန်ဘုရားအနီး ကိုစံငွေယာခင်းနားမှာ ၁ ဆူ၊ မင်္ဂလာရပ်ကျောဘက် ဦးထွန်းနိုင်ယာခင်းနားမှာ ၂ ဆူ၊ ရှင်ပင်ခရေသီးမှာ ၁ ဆူ၊ အနောက်ရိပ်သာဝင်းမှာ ၁ ဆူ၊ ပုလိပ်ဘုရားစုမှာ ၁ ဆူ၊ ကျောက်ဆည်မြို့၊ အင်ရောင်းဘုရားစုမှာ ၁ ဆူ၊ ကျောက်ဆည်မြို့နယ်၊ တောတွင်ရွာမှာ ၁ ဆူ၊ မန္တလေးမြို့၊ ဘုရားနီဘုရားမှာ ၁ ဆူ၊  စုစုပေါင်း ၁၃ ဆူ ဖြစ်ပါတယ်။

ဒါ့အပြင် ၃ ထပ်လိုဏ်ဂူဘုရားတွေကို ပင်းယမှာ ၁ ဆူ၊ မြစ်ငယ်မှာ ၃ ဆူ၊ စာတိုး မြို့ပြင်ကြီးမှာ ၁ ဆူ စုစုပေါင်း ၃ ဆူကို စိစစ်တွေ့ရှိရတယ်လို့လည်း ဆိုပါတယ်။

ပဏာမ ကွင်းဆင်းစစ်ဆေးချက်အရ မန္တလေးမြို့၊ ၈၁ လမ်းပေါ် ၂၁ x ၂၂ ကြားက ဘုရားနီဘုရားမှာ ငလျင်ဒဏ်ကြောင့် အပေါ်ယံအုတ်တွေကွာကျလို့ အတွင်းမှာ အင်းဝခေတ်နှောင်းပိုင်းကတည်းက တည်ထားခဲ့တယ်လို့ ယူဆရတဲ့စေတီရှိပြီး အဲဒီစေတီကို အမရပူရခေတ်မှာ တကြိမ်ထပ်ငုံပြီး တည်ထားတာကို တွေ့ရတယ်လို့ ဆိုပါတယ်။

အင်းဝဒေသမှာလည်း ပထမအင်းဝခေတ်မှာတည်ထားခဲ့တဲ့ ဘုရား ၉ ဆူအနက် တချို့ဘုရားတွေကို ညောင်ရမ်းခေတ်မှာ ဒုတိယအကြိမ်ငုံပြီး မွမ်းမံပြင်ဆင်ထားတာ၊ တချို့ကတော့  ပထမအင်းဝခေတ်နှောင်းပိုင်းမှာပဲထပ်ငုံပြီး မွမ်းမံပြင်ဆင်ထားတာကို စိစစ်တွေရတယ်လို့ ဆိုပါတယ်။

စစ်ကောင်စီဩဇာခံ မန္တလေးမြို့တော် စည်ပင်သာယာရေးကော်မတီကတော့ အင်းဝ-ပင်းယ ရှေးဟောင်းဇုန်မှာ မှတ်တမ်းတင်ထားတဲ့ ရှေးဟောင်းအဆာက်အအုံ ၉၆၀ ရှိပြီး ၇၀ ရာခိုင်နှုန်းလောက် ပျက်စီးတယ်လို့ ရှေးဟောင်းသုတေသနနဲ့ အမျိုးသားပြတိုက်ဦးစီးဌာန မန္တလေးဌာနခွဲကို ကိုးကား ထုတ်ပြန်ထားပါတယ်။