ရုရှားနိုင်ငံက ဒုံးကျည်နဲ့ တိုက်ခိုက်တာ ခံရတယ်လို့ ယူကရိန်းအာဏာပိုင်တွေက ပြောအပြီး ဧပြီ ၆ ရက် အစောပိုင်းမှာ ရုံးခန်းအဆောက်အအုံတွေ ဆိုးဆိုးရွားရွား ပျက်စီးပြီး လူ ၃ ယောက်ထက်မနည်း ဒဏ်ရာရခဲ့ပါတယ်။
တိုက်ခိုက်ခံရအပြီး နောက်ပိုင်းမှာ ယူကရိန်းမြို့တော်က ရုံးခန်းအဆောက်အအုံတခုမှာ အက်ကွဲကြောင်းကြီးတခုကို မြင်တွေ့ခဲ့ရပြီး အပျက်အစီးတွေ ပြန့်ကျဲနေပါတယ်။ အဝေးကနေ မီးခိုးငွေ့တွေ ထွက်နေတာလည်း တွေ့ရပါတယ်။
ပိုလန်နိုင်ငံနဲ့ နယ်နိမိတ်ချင်း ထိစပ်နေတဲ့ ဒေသတွေ အပါအဝင် ယူကရိန်း တနိုင်ငံလုံးကို တိုက်ခိုက်မှုကို လေတပ်က သတိပေးပြီးတဲ့နောက် ဂရင်းဝစ်ချ်စံတော်ချိန် မနက် ၂ နာရီမှာ ယူကရိန်းတနိုင်ငံလုံး လေကြောင်းသတိပေးချက်အောက်မှာ ရှိနေခဲ့ပါတယ်။
NATO အဖွဲ့ဝင် ပိုလန်နိုင်ငံကလည်း လေကြောင်းဘေးကင်းရေး သေချာစေဖို့ လေယာဉ်ကို အရေးပေါ် ချက်ချင်း ပျံတက်ခိုင်းခဲ့ပါတယ်။
ဧပြီ ၅ ရက် နှောင်းပိုင်းက ရုရှားရဲ့ တိုက်ခိုက်မှုအတွင်း လူ ၃ ယောက် ဒဏ်ရာရတယ်လို့ ယူကရိန်းတောင်ပိုင်း မိုင်ကိုလေဒေသ တာဝန်ရှိသူတွေက ပြောအပြီး ကိယက်ဗ်မြို့တော်ကို တနင်္ဂနွေနေ့က တိုက်ခိုက်ခံခဲ့ရတာပါ။
ခရီဗီရီးမြို့ကို ဧပြီ ၄ ရက် တိုက်ခိုက်မှုအတွင်း ကလေးငယ် ၉ ယောက် အပါအဝင် လူ ၁၉ ယောက်ထက်မနည်း သေဆုံးခဲ့ပါတယ်။ ရုရှားဘက်ကတော့ အခုတိုက်ခိုက်မှုကို ချက်ချင်း မှတ်ချက်မပေးသေးပါဘူး။
လွန်ခဲ့တဲ့ ၃ နှစ်က ရုရှားနိုင်ငံက အိမ်နီးချင်း ယူကရိန်းနိုင်ငံကို လုံးလုံးလျားလျား ကျူးကျော်ဝင်ရောက်ရင်း စတင်ခဲ့တဲ့ စစ်ပွဲအတွင်း အရပ်သားတွေကို ပစ်မှတ်ထားတာကို နှစ်ဖက်စလုံးက ငြင်းဆိုထားပါတယ်။
ပဋိပက္ခအတွင်း အရပ်သား ထောင်ပေါင်းများစွာ သေဆုံးခဲ့ပြီး အများစုက ယူကရိန်းနိုင်ငံသားတွေ ဖြစ်ပါတယ်။
Source : Reuters
