အပစ်ရပ်တယ်ဆိုတဲ့ စစ်ကောင်စီရဲ့ကြေညာချက်ဟာ လီဆယ်လှည့်ဖြားတာပဲဖြစ်ပြီး ဧပြီ ၃ ရက် ဒီနေ့မှာ မန္တလေးတိုင်း၊ ညောင်ဦးမြို့နယ်ကို စစ်ကြောင်းထိုးနေတာကြောင့် ပြည်သူ ၂၀,၀၀၀ လောက် ထွက်ပြေးနေကြရတယ်လို့ အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာနက ဧပြီ ၃ ရက် ဒီနေ့ညနေပိုင်းမှာ ထုတ်ပြန်ပါတယ်။

ဒီမနက် ၆ နာရီလောက်မှာ ညောင်ဦးမြို့နယ်၊ ငါ့သရောက်ရဲစခန်းက တင့်ကား ၂ စီးနဲ့ စစ်ကြောင်းထိုးလာတဲ့ အကြမ်းဖက်စစ်ကောင်စီတပ်ဟာ လမ်းတလျှောက်က မြေသန့်တောင်၊ မအူပင်၊ ကြအိုကျေးရွာတို့ကို ပွိုင့် ၅ စက်သေနတ်ကြီး အပါအဝင် လက်နက်မျိုးစုံနဲ့ ပစ်ခတ်တိုက်ခိုက်နေတာကို သတင်းရရှိတယ်လို့ ဆိုပါတယ်။

အင်အား ၆၀၀ လောက်ပါတဲ့ ရန်သူ့စစ်ကြောင်း မတ် ၂၀ ရက်နေ့ကတည်းက ညောင်ဦးမြို့နယ်နဲ့ ချောက်မြို့နယ်ကြားက ကျေးရွာတွေကို စစ်ကြောင်းထိုးဝင်ရောက်လာပြီး ပြည်သူပိုင်နေအိမ်တွေကို မီးရှို့တာ၊ ဒေသခံပြည်သူတွေကို ဖမ်းဆီးတာနဲ့ ပြည်သူပိုင်တန်ဖိုးရှိ ပစ္စည်းတွေကို အဓမ္မခိုးယူလုယက်တာကြောင့် ဒေသခံပြည်သူ ၂၀,၀၀၀ လောက် စစ်ရှောင်နေကြရတယ်လို့လည်း ဆိုပါတယ်။

ငလျင်ဘေးကယ်ဆယ်ကူညီဖို့ အမျိုးသားညီညွတ်ရေးအစိုးရ (NUG) ကာကွယ်ရေးဌာနက မတ် ၃၀ ရက်ကနေ ၂ ပတ်ကြာအပစ်ရပ်ဖို့ ကြေညာခဲ့ပြီး MNDAA၊ TNLA၊ AA နဲ့ KIA တို့က အပစ်ရပ်တယ်လို့ ကြေညာပြီးနောက်မှာ စစ်ကောင်စီကလည်း ၂၁ ရက်ကြာအပစ်ရပ်မယ်လို့ ဧပြီ ၂ ရက်မှာ ထုတ်ပြန်လာတာပါ။

ဒါပေမဲ့ စစ်ကောင်စီဟာ မတ် ၂၈ ရက် အင်အားပြင်း ငလျင်ကြီး လှုပ်နေတုန်းနဲ့ လှုပ်ပြီးနောက်ရက်တွေမှာ လေကြောင်းကနေ နေ့တိုင်း တိုက်ခိုက်နေခဲ့တာဖြစ်ပါတယ်။