ရှမ်းပြည်နယ်တောင်ပိုင်း၊ ညောင်ရွှေမြို့နယ်၊ အင်းလေးဒေသထဲက ကျေးရွာတွေကို စစ်ကောင်စီတပ်က လက်နက်ကြီးနဲ့ ပစ်ခတ်တာ၊ ဒရုန်းနဲ့ ဗုံးကြဲတာကြောင့် နေအိမ် ၃ လုံး ပျက်စီးခဲ့တယ်လို့ အင်းလေးဒေသလူ့အခွင့်အရေးအဖွဲ့က မတ် ၃၁ ရက်မှာ ထုတ်ပြန်ပါတယ်။

မတ် ၃၀ ရက် ညနေ ၆ နာရီမှာ အင်းလေးတောင်ဘက်ခြမ်းက ဘုရားတောင်ရွာကို စစ်ကောင်စီနဲ့ PNO ပြည်သူ့စစ်က လက်နက်ကြီး၊ ဒရုန်းနဲ့ ၆ ကြိမ် ကြဲချတိုက်ခိုက်ခဲ့လို့ နေအိမ်တလုံး ပျက်စီးခဲ့ပါတယ်။

မတ် ၃၁ ရက် မနက် ၆ နာရီကနေ ညနေ ၆ နာရီလောက်အထိ လက်နက်ကြီးနဲ့ ဒရုန်း ၈ ကြိမ်ထိ ကြဲချတိုက်ခိုက်လို့ ရေပူကျေးရွာက နေအိမ် ၂ လုံး ပျက်စီးခဲ့ပါသေးတယ်။

အင်းလေးပြည်သူ့ကာကွယ်ရေးတပ် IPDF တပ်ဖွဲ့ တာဝန်ရှိသူက “အင်းလေးဒေသမှာ စစ်ရှောင်နေရတဲ့ကြားထဲ စကစနဲ့ PNA, PNO ပူးပေါင်းအဖွဲ့တွေက အတင်းအဓမ္မ စစ်သားစုဆောင်း ငွေကြေးကောက်ခံတာတွေ လုပ်နေလို့ ပြည်သူတွေ ဒုက္ခရောက်ပြီး ခုလို ငလျင်ဘေးဒဏ်ပါ ခံစားရတဲ့အချိန်မှာ လက်နက်ကြီး Drop Drone တို့နဲ့ ကျူးကျော်တိုက်ခိုက်နေတာတော့ လက်ခံနိုင်စရာအကြောင်း မရှိပါဘူး” လို့ ပြောပါတယ်။

အမျိုးသားညီညွတ်ရေးအစိုး (NUG) က ငလျင်ဒဏ်သင့်ဒေသတွေကို ကူညီကယ်ဆယ်နိုင်ဖို့ မတ် ၃၀ ရက်ကစပြီး ဧပြီ ၁၂ ရက်အထိ ထိုးစစ်တွေရပ်နားမယ်လို့ ထုတ်ပြန်ထားပေမဲ့ စစ်ကောင်စီတပ်ကတော့ လေကြောင်းကနေ ဗုံးကြဲတိုက်ခိုက်မှုတွေ၊ လက်နက်ကြီးနဲ့ ပစ်ခတ်တာတွေ၊ ဒရုန်းနဲ့ ဗုံးကြဲတာတွေကို ဆက်တိုက်ပြုလုပ်နေတာပဲ ဖြစ်ပါတယ်။

IPDF တပ်ဖွဲ့ တာဝန်ရှိသူက  “ငလျင်ဘေးသင့်ပြီး နာရီပိုင်းမခြားဘဲ တနိုင်ငံလုံးရဲ့ အရပ်သားပစ်မှတ်တွေကို လေကြောင်းကနေ ဗုံးကြဲတိုက်နေတာကိုတော့ ပြည်သူတွေရော နိုင်ငံတကာကပါ ဒီတိုင်းကြည့်နေမယ်ဆိုရင် လက်ခံသလို ထောက်ခံသလို ဖြစ်မှာပေါ့” လို့ သူက ဆက်ပြောပါတယ်။

အင်းလေးမှာ ငလျင်ဒဏ်ကြောင့် ဒေသခံပြည်သူ ၁၀၀ ကျော်အထိ သေဆုံးခဲ့ပြီး အင်းလေးဒေသက ကျေးရွာတွေရဲ့ ၈၀ ရာခိုင်နှုန်း ပျက်စီးခဲ့ရတဲ့အတွက် စားဝတ်နေရေးနဲ့ ရေသန့်တွေ လိုအပ်နေတယ်လို့ ဒေသခံတွေက ပြောပါတယ်။